مين في كلية طب الاسنان؟؟؟

[سمبل سمايل^_^]

السلام عليكم
انا كنت عايزا اعرف نظام دراسه طب الاسنان في مصر,اصل هنا في الامارات بيدرسو طب اسنان 6 سنوات وبعديها لازم سنتين خبره عشان تاخد الرخصة
كنت عايزا اعرف النظام في مصر ازاي . كم سنه يعني وكدا؟؟؟
وكنت عايزا اعرف طب الاسنان معتمد على ايه بالضبط ومواد ايه؟ يعني انا اعرف اني بحب طب الاسنان وهمشي فيه ازاي؟
وهوا معتمد على الحفظ بنسبة كام تقريبا ؟؟؟ لاني مبحبش الحفظ خااااااالص
وانا مستوايا مش اد كدا في الانجليزي ..ممكن امشي فيه ومستوايا يتحسن في الانجليزي بالممارسه ولا رايكم ايه؟؟
وكنت عايزا اعرف كمان ايه افضل الجامعات الي بدرس طب اسنان وبتوفر المعدات والادوات .. وايه رايكم في جامعة المنصورة؟؟
اتمنى الاقي حد يجاوب على اسالتي ويقلي رايه ولو عندكم اي معلومات عن المجال ده متبخلوش عليا

[د\ الاء]

السلام عليكم
اولا نظام الكليه
هي برده ست سنوات (خمس سنين دراسه+سنه امتياز)
وبعد سنه الامتياز دي بتستلمي تكليفك وبتشتغلي
لكن موضوع الخبره ده والسنتين دول معتقدتش انه هنا ف مصر
بس بعد الدراسه دي فيه تخصصات برده زي طب بشري كده
يعني مثلا فيه تخصص تقويم وجراحه وتجميل الوجه والفك وطب اسنان الاطفال وشويه تخصصات كده
المفروض ان بعد الدراسه كل دكتور يتخصص ف تخصص معين
نظام الدراسه بقي
فهي خمس سنين
اول سنه اسمها اعدادي ودي بندرس فيها مواد ملهاش علاقه بالكليه
يعني بناخد كيميا وفيزيا وحيوان ونبات تعتبر زي ثانويه عامه بالظبط بس بالانجلش
اما ف الاربع سنين الباقيين
فبندرس مواد اسنان +بعض مواد من طب بشري

وبالنسبه لان الدراسه بالانجلش فده عادي ف الاول مش هتبقي فاهمه حاجه وهتحتاجي ترجمه كتير
بس بعد المذاكرة ومعرفه المصطلحات وكده بتبقي سهله
والدراسه ملهاش دعوة خالص بمستواكي قبل كده ف الانجلش
يعني ف الدراسه هتعتمد علي معرفتك بالمصطلحات والكلمات وطبعا بتبقي معظمها حاجات جديده ماخدتيهاش قبل كده فبتتحفظ مع الوقت
وبالنسبه لجامعه المنصورة او اي جامعه تانيه فمش عارفه
بس جامعه المنصوره كويسه
بالنسبه للادوات فطبيعي فيه ادوات بتشتريها انتي علشان تشتغلي بيها
....................
اتمني اني اكون افدتك
والسلام عليكم

[سمبل سمايل^_^]

مرسي اوي يا دكتوره آلاء على ردك وربنا يخليكي يارب بس كنت عايزا اسال عن حاجه كمان معلش
يعني المنهج فيه حفظ كتير ؟؟ لاني مش اد كدا في الحفظ فخايفه معرفش امشي فيها
وكمان في حاجه ...الدكاتره بيشرحو بالانجليزي صح .. والمفروض تسجلي كل كلمه وراهم مش كدا؟؟ بتلحقي ازاي ؟؟ انا في انتظار الردود

[د\ الاء]

بالنسبه للمهنج
ففيه مواد بتبفي فيها نسبه حفظ كبيره وفيه مواد لاء
ده بالنسبه لاول سنه لاني معرفش غيرها
يعني مثلا انتي عندك كيميا
الكيميا منقسمه لتلت فروع كيميا عضويه
ودي بتحفظي فيها المعادلات والتفاعلات بس لما بتفهمي المعادله بتبقي سهله ف الحفظ ولو جتلك اي معادله شبيهه بتعرفي تحليها لوحدك
والفرع التاني والتالت فهو كيميا تحليليه وكيميا فيزيائيه ودول سهلين اوي وكلهم مسائل ومعتمد ع الفهم خصوصا الفيزيائيه
كلها فهم تقريبا حتي امتحانها بييجي ام سي كيو
والماده التانيه كانت فيزيا ودي كانت متقسمه لعده اجزاء كتير كده منها قسم خاص بمواد الاسنان والمواد المستخدمه ف الحشو وكده وجزء خاص بشرايح العظام وخصائص المكونات بتاعتها بتبقي حاجات لذيذه بس حفظ
والجزء التاني من الفيزيا بتبقي فيزيا زي ثانويه عامه بالظبط
يعني كده عندك مادتين معتمدين ع الفهم بس فيهم نسبه حفظ برده
وفيه كمان مع الفيزيا احصا ودي طبعا مفيهاش كلام
فهم كلها مع شويه تعريفات بتحفظيهم وخلاص
اما بقي النبات فده اعماده الكبير ع الحفظ بالذات الميكروبيولوجي فنسبه الحفظ فيه عاليه جدا
اما الفسيولوجي فكان بيتكلم عن مكونات الخليه النباتيه والوظايف الللي بتقوم بيها زي التنفس وفيه حاجات كتير من الثانوي وهو بسيط جدا
والفرع التالت من النبات دي وراثه وهي تقريبا نفس منهج ثانويه بس متوسع شويه وكلها فهم والامتحان بيعتمد بنسبه عاليه ع الفهم
انتي بس بتحفظي الحالات اللي بتدل علي كل حاله علشان تعرفي تحلي المساله زي الثانوي كده
وفيه بقي حيوان ده تقريبا من اكبر المواد
كان فيه فسيولوجي وده سهل جدا كان نفس منهج كتاب الاحياء بتاع الثانوي يعني كان فيه الهضم والتنفس والهرمونات وكده زي ثانوي بالظبط
وفيه الهستولوجي وده بيتكلم عن الانسجه هو بصراحه كان رخم شويه وعايز حفظ
اما الكورداتا فدي بقي كلها حفظ بس هي سهله وتقريبا بيلغوا نص المنهج
اما البارا فدي كلها دورات حياه بتحفظيهم حوالي 11 دوره حياه بيتحفظوا قبل الامتحان يعني بسيطه جدا برده
والامبريولوجي برده سهل جدا وبتجاوبي فيه من اللي انتي فاهماه وكله حاجات من ثانوي
اما الاورال بقي فده هيبقي حلو لانه بيتكلم عن مكونات الفم وتقسيم الاسنان وحاجات لذيذه كده بس فيه نسبه حفظ برده
ده بالنسبه لمواد اعدادي
اما مواد السنين اللي بعد كده ففيها مواد من طب بشري والباقي تبع التخصصات بتاعتنا ف اسنان يعني ان شاء الله تبقي مواد كويسه وهتبقي دراستها مفيده جدا
.......................
وبعدين انتي ليه خايفه من مساله الحفظ دي حفظ اي ماده مش بييجي من اول مره
يعني لو قراتي المواد اكنر من مره هتلاقي نفسك حفظتيها لوحدك مع الوقت
.......................................
اه طبعا الدكاتره بيشرحوا بالانجلش
بس مش كل المحاضرة بتبقي انجليزي فيه حاجات كتير بيوضحوها بالعربي علشان نفهم
خصوصا ف الاول هما بيراعوا حاجه زي كده ان الطالب مش عارف المصطلحات واللغه فبيبقي الشرح بالنجلش وبعدين يوضح بالعربي ومساله الكتابه دي بتبقي مع الوقت سهله
كمان معظم الدكاتره بتعتمد ع الداتا شو فيبقي الكلام كله قدامك علي شاشه العرض وممكن تاخديه منهم بالفلاشه
بس طبعا فيه حاجات بتتقال زياده ف المحاضرة لازم تكتبيها
كمان فيه دكاتره زي دكاتره الحيوان بيعتمدو علي الكتب والمذاكرة بتبقي من الكتاب
غير ان المعيدين اصلا بيسجلوا المحاضرات وبينزلوها ف الكتبات بتشريها وبتبقي حلوة اوي ف المذاكره
تقريبا كنت معتمده ف المذاكره ع الورق ده

.....................
فانتي متقلقيش ان شاء الله وكلنا كنا زيك كده مش فاهمين حاجه وكده بس خدي الامور ببساطه وكل حاجه بتعدي
وف اخر السنه بتبقي الامور ماشيه كويس بس انتي زاكري اول باول
وربنا يوفقك ان شاء الله

[سمبل سمايل^_^]

والله يا لولو مش عارفه اقلك ايه انتي كتبتيلي تقرير كامل ومفصل كمان وده الي انا كنت عايزا بجد مرسي اوييييييييي
وصراحه عندي كمان سؤالين معلش عارفه اني تعبتك بس انا معتبراكي زي اختي (مش عايزا اقول الكبيره مدام الفرق سنه واحده)
اول حاجه انا اعرف ان اول سنتين او ثلاثه مش بينحسبو في شهاده التخرج يعني مش مهم التقدير المهم تنجحي وخلاص دا حقيقي؟؟؟
وعايزا اعرف في كليه طب اسنان المنصوره في سنه الامتياز يتعلجي مرضى ولا ايه ؟؟؟ يعني في قسم زي مستشفى كدا عشان الطلبه يتدربو؟؟؟

[د\ الاء]

لالالالالالالالالا مين قالك كده
الكلام ده ف اعدادي بس وبيبقي عليها نسبه قليله ف التقدير العام
تقريبا 6% بس بس ده الكلام اللي سمعناه بس احنا لما حسبناها طلعت حوالي11%
والله اعلم
لكن بعد كده كل سنه وحسب مجموع درجاتها بالنسبه للمجموع الكلي
لكن الكلام بتاع التلت سنين ده مش مظبوط خالص
...........................................
اها ف سنه الامتياز بنشتغل ف العيادات
فيه كده جنب مبني الكليه علي طول مبني للعيادات ده بيشتغل فيه دكاتره الامتياز
وطبعا بيييجي مرضي كتير بتلاقيهم اكتر من طلاب الكليه
متقلقيش يعني هتلاقي ناس تعالجيهم

[خوخة مصر]

ازيك يا دكتورة ألاء ما تتخيليش قد ايه انا سعيدة بردك ده
لاني محتارة جدا في الموضوع ده
انا والحمد لله اخدت الثانوية العامة من قطر والحمد لله جبت 97%
كتييير اوي بيضغطوا عليا عشان ادخل طب بشري بس انا في الاخر الي عارفة نفسي
صليت صلاة استخارة كتييير اوي وحاسة اني مرتاحة جدا في طب الاسنان ويا سبحان الله سمعت
كلام كتير اوي عن طب الاسنان فعلا يعقد بس برغم كده نفسي ادخله اوي والكلام ده زي ايه
بلاش تدخلي طب الاسنان ده 5 سنين و3 امتياز بقوا 8 سنين غير الماجيتير والدكتوراه وإلا ولا هيبقا ليكي قيمه
وكتب طب الاسنان نفس الطب البشري بس فيه حاجة بسيطة بس في موضوع الاسنان
وفي حاجة كمان ان الي زيي وجايب المجموع ده وجاله طب بشري واستغنى عنه ودخل اسنان ممكن يحس بالغيرة والندم عشان ما دخلش بشري هل فعلا ده ممكن يحصل
يا ريت تجاوبيني بكل صراحة لاني خلاص هقدم رغباتي كمان يومين ارجوكي لو تقدري توضحيلي الفرق بالظبط بين طب الاسنان والطب البشري