مسألة فى الرياضيات(أرشيف تجميعى )

[kevok.m]

يا جماعه مشكلتى انى حاسه انى ضايعه فى الرياضه وقلقانة منها جدا ولما بتقابلنى مسأله صعبه بقف قدامها

ومش بعرف افكر والامتحان هيجى صعب وانا مخى مش رياضى خصوصا انى ادبى كمان ومش بحب الرياضيات بس

بحاول اجتهد فيها ارجوكوا قولوا لى اعمل ايه وازاى اتغلب على اى مسأله صعبة سواء كانت فى التفاضل او الجبر او

المثلثات انا حفظت قوانين المثلثات الباب الاول فيها سهل بس الباب التانى مش اوى وفى الجبر انا كويسة فى

اللوغاريتمات والمتتابعات يمكن مسأل قليلة اللى بتقف قصادى وفى التفاضل بقى هو اللى خايفة منه انا عامه

خايفة من الرياضة كلها ياريت تساعدونى انا بتقبل اى ضغط على نفسى فى سبيل انى اوصل لهدفى ولكم جزيل

الشكر

[kakarootz]

يا اختى تزكرى مقولة نابليون هيل ( ما يتخليه عقل المرء و يراه بوضوح فانه قادر على تحقيقه)

[سويتى سوسو]

الموضوع سهل أوى
مشكلتك انك مؤمنه انك مش بتحبى الرياضه ومش بتعرفى تحلى
فده فعلا خلاكى كده
بس بجد لو اخدتى المسأله الصعبه اللى بتوقف معاكى
بتحدى
ومخوفتيش منها
هتعرفى تحليها بنفسك
وبجد نفسك هتنفتح للرياضه اوى
خصوصا ان الرياضه حل مش اكتر
وبالنسبه للقوانين
ف ماتحفظىهاش
حلى عليها كتير بس
ف الاول انقلى القوانين قدامك
وبعدين حلى بنفسك هتلاقى نفسك حفظتيها وفى نفس الوقت عرفتى افكار المسائل
وربنا معانا كلنا

[kevok.m]

بجد شكرا ليكوا كتير على ردودكوا هو انا بقرأ الأمثلة وبنقل القوانين وبحل معظم الأفكار بس انا فعلا مشكلتى انى بحس انى مخى مش بتفتح للتفكير او آفاقه مش واسعه انا فى المواد التانية كلها الحمد لله ماشية فيها بس انا خايفة من دى عموما نورتوا موضوعى والف شكر ليكم على الردود

[على الحنفى]

السلام عليكم
انا مدرس رياضيات ثانوى و انصحك بعدم القلق . اللى بيحصل ده شىء عادى علشان الامتحانات على الابواب
انصحك
1)بالثقة فى الله قال تعالى(انا لانضيع اجر من احسن عملا)
2)عدم الاستماع او الانشغال بما يقوله الاخرين عن الامتحانات و التوقعات و المراجعات و ليلة الامتحان ....كل ده مشتتات للتركيز
3)ابداى بالتعرف على نماذج الامتحانات السابقة للوزارة و من خلالها هتعرفى نقاط ضعفك وتبداى تركزى عليها
4)بلاش المسائل المعقدة و الصعبة زيادة عن اللازم الامتحان يقيس التركيز و الفهم وليس للرعب و التخويف و جربى الامتحانات السابقة
5)حاولى تذاكرى من مصدر و احد فقط ويكون به ارشادات ترجعى اليها عند الحاجة(حاولى تبعدى عن كتاب لامى او التقويم حاليا)
6)لو احتجت مساعدة نرجو التواصل ( والله المستعان )

قال الشاعر
ضاقت فلما اتحكمت حلقاتها فرجت.......وكنت اظنها لا تفرج

[kalefam]

قلقك و خوفك دى ظاهره كويسه مش وحشه
دى معناها انك حريصة فى خطواتك فى الحياة حريصة على انك ما تغلطيش حساسة جدا
وهوه ده اللى ح يخليكى تحلى بإذن الله كويس جدا و ح تجيبى درجه حلوه بإذن الله
بس حاولى متخليش حريصك و خوفك يأثر على مذاكرتك واصلى مذاكرتك المعتاده دون زيادة حتى لا تؤثر على باقى المواد و السؤال اللى يقف معاكى جميع مدرسى المنتدى ح يقفوا معاكى و مش ح يبخلوا عليكى بمعلومة اكتبى السؤال الصعب و ح تلاقى أكتر من مدرس حل ليكى السؤال
ثقتك بالله و بنفسك هما أهم عاملين من عوامل نجاحك و معاهم رضا الوالدين
اتمنى لكى التوفيق و لجميع أبنائنا الطلبة و الطالبات

[kevok.m]

شكرا لكل الاستاذة الفاضلين اللى ردوا عليا بجد انتوا بتدونى ثقة فى نفسى كدا وانا لما ابتديت اعمل بكلامكم ابتديت احس بالثقة .انا مشترتش كتاب لامى انا بحل نماذج الوزارة ولو الامتحان جى زيها يبقى كويس جدا لانى شايفاها كويسة يمكن نقطة او اتنين فى الخمسة اسئلة بس هما اللى بيقفوا وبحل من كتاب الماهر وكتاب المدرسة ومذكرة الدرس بتاعتى .بجد شكرا كتير ليكم ولمجهودكم وردودكم