ضع رأيك بكل امانه

[مصراوى22]

كنت اشترى بعض مستلزمات المنزل من احد البائعين ويعلم اننى معلم وبدون مقدمات قال لى بصوت شديد اللهجه معاك رقم وكيل الوزاره بتاع التربيه والتعليم قلت خير قال لى حاتجه خاصه قلت له هوه كان مدير عام مدرستى قبل الترقيه وعلاقتى به طيبه ولو عاوز حاجه اخلصها لك ولاتزعل
فرد لا انا عاوز اشتكى له من لجنه ابنتى بالصف الثالث الاعدادى الترم الاول كانت كلها غش فى غش
وابنتى مش عاوزه تروح الامتحان علشان احسست بالظلم من حصول طالبات اقل منها على درجات تساويها
وقفت وسرحت لثوانى ( لو انت مكانى ) ماذا تفعل
الرد من خلالك له اهميه
هل العيب فى الطلاب ام ماذا

[الأستاذة أم شاهندة]

للأسف ده بيحصل
بل وبعض أولياء الأمور بيطلبوا من المراقبين أنهم يسهلوا اللجان ويدعوا لهم لو عرفوا من الاولاد بعد اللجنة أن المراقبين سابوهم يغشوا من بعض او حتى غششوهم بنفسهم
أنا شاهندة بنتى فى سنة تالتة ابتدائى فى امتحان التيرم الأول المراقبة فى مادة الدين لما لقيتها خلصت والحمد لله ورقتها إجابات نموذجية
أخدت ورقتها تقرأ منها للأولاد فى اللجنة التانية وأعطتها ورقة إجابة البنت اللى وراها تكمل لها اللى ناقص فيها
تصوروا و مادة الدين (هم يضحك وهم يبكى )
طبعا البنت رجعت زعلانة جدا ومنهارة وتقولى خلاص بلاش تضغطى عليا فى المذاكرة وهما حيقولولى اللى مش عارفاه
وطبعا قلت لها حتروحى من ربنا فين ومن غشنا فليس منا والكلام ده كله
وتانى يوم رحت المدرسة وحاولت اقابل حد طبعا انتم عارفين تالتة لجنة خارجية وممنوع الدخول والكلام ده كله وادارة المدرسة تقول لى معلش المدرسين مش من عندنا
صراحة مسكتش قابلت البنت اللى غشت من بنتى عارفين كان ردها ايه ؟
(مش بذاكر الدين عشان مش لاقية وقت كفاية باقى المواد )
لكن إحقاقاً للحق تانى يوم كانت اللجنة صارمة وممتازة وممنوع الغش وآخر انضباط
يعنى مش كل المراقبين أو المدرسين كدة
وفى النهاية عرفت بنتى ان ربنا شايف وعارف
وكانت الصدمة يوم النتيجة
لأن شاهندة لم تذهب للمدرسة التيرم الأول عشان انفلونزا الخنازير أخدت جيد جداً فى النشاط لكن تقديرات كل المواد ممتاز
أما الصديقة التى نقلت عنها (اللى بنتى كتبت لها بخط إيدها فى ورقتها) كانت تذهب للمدرسة فأخدت ممتاز فى النشاط وفى باقى المواد أيضاً وهكذا تفوقت على شاهندة والأمر لله

أنا لو مكان حضرتك أعطيه الرقم ولازم يقدم شكوى والناس دى لازم تقف عند حدها وقتها الأولاد حيعرفوا أن الغش ليس له سبيل وطريق النجاح الوحيد هو المذاكرة وبذل الجهد
والطلبة دى بكرة يكونوا دكاترة غشاشين
ومهندسين غشاشين
ومدرسين غشاشين
وحرفين غشاشين
وضباط غشاشين

وحسبى الله ونعم الوكيل