حاسة اني تاية ولوحدي في الدنيا دي .....

[**تسابيح**]

الإحساس ده طبيعى فى أول دخولك الجامعة لإنك كنتى مع ناس تانية لحد ما بتفهموا بعض و بينكم عشرة كويسة و فجأة كل واحد راح مكان و بقيتوا صعب تتجمعوا سوا و اتعرفتى على ناس تانية مش قريبين ليكى
أنا فعلا حاسة بالوحدة عشان أصحابي كنت اعرفهم من 7 سنين من ابتدائي لحد الثانوي
كنا بنفهم بعض من اول كلمة
دلوقتي لما اقول كلمة اتفهم غلط
عشان كدا بقيت اريح مخي وتجنب الناس اللي بتفهم غلط دي

بس اللى عايزة أقولهولك إن الإنسان لازم يتاقلم على أى جو يدخل فيه .. يعنى انتى شعورك بالوحدة ده لازم تتأقلمى عليه أو بمعنى أحسن إنك ماتفكريش إنك وحيدة و حاولى تشغلى نفسك بأى حاجة فى الوقت اللى تكونى مضايقة فيه

أصل أنا بحس بالملل اوووي
يمكن لما بتكلم مع الناس بنسي وانا من النوع اللي بينسي بسرعة
يعني هي مش بتأثر عليه الا لما اكون مضيقة من حاجة اوووي

على فكرة الوحدة دى أصعب شىء بمر بيه السنة دى و بجد أوحش سنة مرت عليا و يا رب ماتتكرر بس أنا يمكن مش بعرف أنسى بسهولة فمهما شغلت عقلى بحاجات تانية مش بنسى الوحدة الى عايشة فيها بس بحاول أتأقلم على الجو ده علشان الحياة تمشى

ان شاء الله كل حاجة هتعدي ع خير
لكن انتى حاولى تأقلمى نفسك و لازم تقتنعى إن مفيش حد فى الزمن ده هيكون صاحب بجد .. من الآخر صاحبى نفسك و لو حصل أى نوع من الجنون أنا موجودة

ههههههههههههههه
ماشي لما اتجنن هجيلك ع طول
أنا ليه غيرك انتي
الخير والبركة
ان شاء الله هحاول اكون مع نفسي احسن برده

على فكرة كتمك للزعل أو عدم الإعتراف بالضيق انتى كده بتجمعى غضبك جواكى و ده غلط لإنك ممكن لا قدر الله يحصلك حاجة أو ممكن مرة واحدة بئر الكتمان ده ينفجر و الله اعلم هينفجر إزاى و فى مين ؟؟

ههههههههه
ربنا يستر
لازم لما تزعلى تواجهى الشخص اللى مزعلك بأى شكل من الأشكال على الأقل بينى غضبك على وشك أو ماترديش عليه أو لو صحبتك مثلاً زعلتك و رجعت تتأسف حاولى تعاتبيها
أصل انتى هتشيلى فى نفسك ليه تولع الدنيا باللى فيها
الحياة مش ناقصة حرقة دم

بصي ياموها أنا بقعد اقول لو الناس اللي مضيقاني وكدا
انا مش هسبهم وهقولهم وعرفهم شغلهم وحاجات من هذا القبيل
أول ما اشفهم بقلهم خلاص ياجماعة مفيش حاجة
معظم الاوقات بتبقي صادقة لاني مش بحب اني اكون مزعلة حد
وبحب اني اكون علاقتي كويسة مع كل الناس
اما بقي اللي يغلط في حقي ..زي واحدة غلطت في حقي ...مع اني والله عملتها معاملة
عمري ما عملتها مع ناس اصحابي .. وبعد في الاخر عشان هي عايزة مصلحة من واحدة تانية تقول عليه كلام مش صحيح ...أكيد طبعا لازم اعمل حساب للموقف دا
والكلام دا في ثانوي ولما دخلت الجامعة وبقت في قسمي جات وعشان مصلحة وبكل بساطة
اوعي تزعلي مني ...عشان انا مبحبش حد يزعل مني وبكدا اكون خلصت زمتي ادام ربنا ....
في الوقت دا بالذات بجد كان نفسي اجيبلها القديم والجديد
بس قلتلها بكل بساطة :: لا مفيش حاجة وسبتها ومشيت ولا كلمتها نص كلمة بعد كدا
بعدها لما اقعدت افكر كدا قلت قلة الكلام مع الاشكال دي أحسن ع الاقل
مقلش كلام اندم عليه بعد كدا ويطلع الحق عليه
يمكن المواجهه شيء كويس وانا بحاول اعمله حتي لو مش بالكلام زي ما انتي بتقول

الكسل صعب و خصوصاً لو مفيش إرادة قوية .. و دى مشكلة عندى فى بعض المواقف اللى بمر بيها زى لما اجى اذاكر اقول ايه كل الكتاب ده 900 صفحة ليه كده .. و أقوم من على المذاكرة لكن لما بأدب نفسى و أشتمنى و أقعد غصب عنى أذاكر ( أصل جوايا واحدة شريرة بتحاسبنى على طول )
أو سبحان الله تلاقينى ليلة الإمتحان عندى إرادة قوية لإن غصب عنى لازم أذاكر و تلاقينى خلصت الكتاب كله
يعنى خلاصة الكلام إن الواحد بإيده كل حاجة بس إحنا اللى بنستهبل
لو فكرنا كويس إحنا عملنا إيه و معرفناش نجاوب نفسنا أكيد هنحس إننا لازم نعمل حاجةو لازم نستعين بربنا و نقوى من نفسنا علشان نتغلب على الشعور باليأس
ربنا يقوينا

انت مش فهمتيني
انا عندي طموحات اهداف كثيرة بس كل هدف مختلف عن الثاني خالص
ومش ينفع الاهداف دي تتحد مع بعض
لازم يكون هدف واحد عشان مش يحصل تشتت
لما اجي احدد هدف منهم اقول **لا** هفشل مش هنجح
مش عارفة ايه .. حاجات كدا ..
او لما ادخل في المجال دا مش هيبقي عندي دراية بيه وهفشل برده
عشان كدا بحس باليأس في اخر المطاف

أنا آسفة جداً جداً على تاخيرى أنا دخلت و الله إنهارده علشان أرد عليكى
اوعى تقولى لا عادى مش متضايقة

ههههههههههه
يابنتي انا لو اضيقت من كل الناس اكيد منك هيبقي *لا*
احنا عندنا كام مها يعني
بجد بجد انا سعيدة اوووووي بردك
انا اصلا نسيت كل حاجة
شكرا ياموها ربنا يخليكي يارب للشعب المصري