قصيدة في حب الريس

[اسلام رشوان]

<div align="center">أنا مبخافشى وحفضل أقول

كلمـة حــق عليها مسئـول

إن الريس راجــل طيــب

وبشعبه دايما مشغـــــول



مشغول انه يلم فلوسنا

بره سويسرا يحوشهالنا

وف حسابات سريه يشيلها

نفسه يأمن مستقبلنا



شفتو ازاى بقى قلبه رحيم

عنده ايمان وضميره سليم

بيجوعكوا لجل تخسوا

آه ياشعب يا محتاج لرجيم



من جهلكوا بتقولوا بطاله

وان الاحوال مش شغّاله

دا الراجل نفسه يريحكم

هى الراحه تبقى عواله؟



أما حكاية المنتجعات

ليه تسموها المعتقلات؟

ليه الظن

وسوء النيّه

نفسه يفسحكوا يا بهوات



أما الكرسى واللى اتقال

دا كلام مش محتاج لسؤال

الغلطه دى غلطتنا يا عالم

إن مجبناش كرسى تيفال



والله انتم ظالمين الراجل

ضيّع عمره ومين يستاهل

حتى الاكل بياكله بدالنا

طالع واكل نازل واكل

بعد دا كلّه........ماله الريس؟؟؟؟؟</div>

[أحمد2025]

الحمد لله.

[The_Relativistic200]

بالصحة والسلامة

تشكر يا اسلام على القصيدة
اقابلك فى القسم ان شاء الله

[wa_islamah2100]

شكراا يااسلام
ربنا يسترها معاك ويتولاك برحمته

[اسلام رشوان]

شكرا يا جماعة


ربنا يسهل ومطولش في القسم

و لا يمكن حروح امن الدولة

[~¤ô_ô¤~ شاعر الحب ~¤ô_ô¤~]

بعد دا كلّه........ماله الريس؟؟؟؟؟
حلو الريس
خلى الشعب يهيص
ماله الريس
شكرا يا اسلام على الموضوع
جميل جدااا

[اسلام رشوان]

ههههههههههه

شكرا

[هند ابراهيم]

يا حرام الراجل مظلوم

ههههههههههه
شكرا يا اسلام
واستلقى وعدك بقى

[اسلام رشوان]

ههههههههه


شكرا هند