إلى كل البشمهندسين الجدد

[ba7eb alahly awi]

المشاركة الأصلية كتبت بواسطة banzer

أرحب بجميع الضيوف معنا هنا بالقسم الهندسي

وأحب أرحب كمان بكل اللى اتقبل تنسيقهم ودخلو هندسة
واقولكم

الف الف مبروووك يا بشمهندسين

وعقبال ما نشوفكو دكاترة ومعيدين ان شاء الله

طبعاً الخبراء هنا كتير
واي حد عنده اي استفسار يحط موضوع جديد ويسأل فيه واحنا في الخدمة ان شاء الله
حنكرهكو في الكلية
قصدي حنخليكو تعشقو الكلية

بس مبدأياً عشان نكون متفقين
في حاجتين لازم تعرفهم

1- لو داخل كل هندسة عشانها كلية قمة فياريت تحول في اقرب وقت ممكن
لإنك لو مش داخل الكلية حاببها إنسى إنه نظام ثانوية عامة ينفعك

2- اوعى تاخد نصيحة حد في الكلية من جوه
لأنه حيعقدك في حياتك وحيحسسك الدنيا كلها عقد
بس برده لازم تعرف طرق تفكير الجميع وتخلي ليك فكرك الخاص
(بس متطبقش النظرية ده أوي يعني )

في حاجات بقى بسميها نصايح روتينية حقولكم عليها وعارف مش حتنفذوها
وهي كاللآتي

1- تذاكر من اول يوم>>>> معملنهاش في ثانوية عامة حنعملها هنا

2- حاول تكتب في المحاضرات في كشكول (كل المواد) وبعد ما تروح تنقل الحاجات ده في كشكول منظم وخاص
طبعاً الوقت مش حيسعفك في الحركة ده لإنك بتتطحن في الكتابة اثناء المحاضرة
انا اللى كتبته في المحاضرات اكتر من اللى ذاكرته !!!
وبرده حتلاقي اللى عايز تنقله كتير
فتحاول على الاقل وانت في المحاضرة يكون معاك قلمين بلونين مختلفين وقلم رصاص للرسم (في هندسة يبقى سنون نص ع الاقل)
وتحاول بقدر الامكان تنظم في المحاضرة نفسها وكل واحد حسب ما يشوف بقى

3-تذكر ان الدكتور هو المتحكم الاول والاخير فحاول ألا تستفزه
ففي يده درجات اعمال السنة
وفي يده درجات التيرم
وفي يده وضع الامتحانات
وفي يده يشرحلك او ميشرحلكش برده
من الآخر لو عايز يفرمك حيفرمك

4- إياك ثم إياك تنفيض المحاضرات عشان تاخد كورسات
اوعى تكرر نفس غلطة الثانوية العامة تاني
حتضيع يومك كله ومش حتعرف تعمل حاجة

ولو حتعتمد على قانون الثانوية العامة بتاع
"الدرس هو اللى بيخليني اذاكر ولوحدي مش بذاكر"
فاعلم أنك ضائع هذا العام

ليه؟
اللى بيديك الدرس ده بيكون راجل ذو خبرة في الامتحانات
لكن في الكورس بيديك معيد تحت ايد الدكتور
يبقى تسيب الدكتور اللى بيفهم المعيد وتروح للمعيد ؟؟

وكمان المعيد ده حسب الدماغ
يمكن الدرس كنت ملتزم بمواعيد
بس في الكورس الدكتور بيمشيك براحته
وياسلام ع الغلاسة بقى لو كان في مطش ولا حاجة ولغى الكورس وفرض عليكو معاد تاني فيه كورس تاني !!!

وعلى فكرة عشان في مقلب كل الناس بتقع فيه
المعيد مش بيقدر يخلصلك المادة كلها
لأنه الدكتور احياناً بيديك حاجات من عنده لازم تعرفها من المحاضرة مش في الكتاب

ياريت حتى يخلص المادة اللى في الكتاب
انا اخدت كورس رياضة التيرم التاني والله أخدنا حصتين ليلتين الامتحانات
حتقولي ما كويس مراجعة
اقولك
والله كنا بناخد فيهم حاجات جديدة !!!
حاخد حاجات جديدة يوم الامتحان .؟
واحلها امتى واخد عنها تمارين امتى ؟؟
بس حظي حلو إني كنت حاضر المحاضرة ده وفاهم الدرس ده ساعتها

بعد الكلام ده متأكد برده إنه في ناس مش حتصدق
بس صدقوني افشل ناس هي اللى بتاخد كورسات
إلا لو واحد يقدر يتابع المحاضرات والكورسات كلها
وميفوتش محاضرة
يبقى كده انت عبقري وبتعرف من هنا وهنا

في النهاية احب اقولكم اهلاً بيكم في هندسة
وحب المادة عشان المادة تبقى اسهل
وارضى دكاترتك يرضوك في الامتحانات(يرضوك يعني امتحانات صعبة ينفخوك يعني امتحانات متتحلش )

وكل حاجة حتتوفق بإذن الله
كان في موضوع عملته عن المواد اللى اخدتها التيرم الاول في اعدادي
بس مش عارف راح فين
لو قدر البشمهندس بلال يتفضل علينا ويجيبهولنا يبقى كتر خيره

يلا عايز كل واحد يدخل يقول كلمته ويقولنا كمان قبل في هندسة ايه

ايه كم النصايح الرهيب ده يا بشمهندس
والله انا كده مش عارفه راسي من رجليه
كل الحاجات ديه حعملها
ربنا يستر
علي العموم انا دخلت هندسه اسيوط
انا كنت عايزه اسأل سؤال كده
هو صحيح يوم الجمعه مش اجازه؟؟؟؟؟

[BaNZeR]

المشاركة الأصلية كتبت بواسطة EnG.BeLaL

ربنا يباركلك يا باشمهندس banzer

الله يخليك يابشمهندس بلال

المشاركة الأصلية كتبت بواسطة KeMoZzAzZ

انا الحمد لله نجحت ودخلت عين شمس
وشكرا يا بشمهندس بنذر على الموضوع الجميل ده
(يلا ياعم مظبطك اهو ماتنساش ترشينى بكيس قصب )

معلش اعلق على كام حاجه قولتها فى صفحتين ونص بس
ماتخفش انت عارفنى مش رغاى بتاتا

اولا الكتابه فى المحاضرات مهمـــــــــــــــــــــــــــــــــــــــــــــة جدا جدا ...واوعى تقول هنقلها من صديق السوء
ولا حتى تصورها ....لا فعلا الكتابه دى بتخليك تركز فى المحاضره ده اولا ...ثانيا انت بيبقى ليك ملاحظات ليك انت لازم انت اللى تكتبها مش حد تانى .....ثالثا انا كنت جايب الكشكول من الاخر شخبطه ماكنتش ببيض ولا محاضره
بس عموما مش فارقه لان انت اللى كاتب فيه فأكيد هتفهم انت كاتب ايه
المهم تكتب اكنك بتشرح وساعتها مش هتحتاج حاجه تانيه
بالنسبه للورق اللى بنشتريه من بره ..هنحتاجه فى مواد كتير
من الاخر فى عين شمس فى مواد هتذاكر من المحاضرات والسكاشن و المجموعه و الورق اللى بره والشيتات وحل الشيتات .....الخ زى الفيزيا

المهم
حوار الكورسات فاكس جدا ياجدعاااان بجد
الكورس الوحيد اللى تاخده هو اللى تلاقى كل الكلية بتاخده (زى الوصفيه عندنا)
من الاخر موضوع الكورسات ده فاكس فى الكلية يابشمهندسين

أكيد برده ضيفو الكام نصيحة دول

المشاركة الأصلية كتبت بواسطة KeMoZzAzZ

احنا عندنا الكيميا ترمين
ايه التفرقه العنصريه دى

وسؤال بيطرح نفسه كمان
انتوا بتمتحنوا بجد الرسم الهندسى والوصفيه فى نفس الامتحان!!!
يعنى بيبقى فيه الsteel و ال machine و الوصفيه فى نفس الامتحان !!
لا ماتخفيش ما اكيد هسيب بصمتى يعنى

احنا في الرسم الهندسي بناخد التماسات ثم القطاعات ثم الاستيل (مش عارف فين الماشين ده)
والوصفية عندنا خفيفة اعتقد اسهل من عندكو
الامتحان 4 ساعات مخصص ساعة ونص (بناخدهم ساعة) للوصفية والباقي للرسم الهندسي اللى مش بنلحق نعمل فيه حاجة

المشاركة الأصلية كتبت بواسطة ba7eb alahly awi

ايه كم النصايح الرهيب ده يا بشمهندس
والله انا كده مش عارفه راسي من رجليه
كل الحاجات ديه حعملها
ربنا يستر
علي العموم انا دخلت هندسه اسيوط
انا كنت عايزه اسأل سؤال كده
هو صحيح يوم الجمعه مش اجازه؟؟؟؟؟

أهلاً بيكي في هندسة اسيوط <طبعاً هندسة اسيوط ليهم امتيازات خاصة >

يوم الجمعة حتاخديه اجازة اول اسبوعين بس
وبعد كده حيبقى عندك كل جمعة امتحان ميد تيرم - او بالمدرسي امتحان الشهر- بس هو امتحان واحد في التيرم
حتفضلي تاخدي كل اسبوع امتحان من الساعة 9 لحد وقت الامتحان بنروح نصلي الجمعة وبعدين نروح
يعني اول ما تبدأ امتحانات انسى إنك تسهر الخميس او حتى تنام الجمعة شوية

لحد ما الامتحانات ما تخلص تكون دخلت فترة ما قبل الامتحان (المراجعة يعني)