تجميع اعمال ياسر زكى3

[ياسر زكي3]

#خدماتفرديةsocial
وجهة نظر مواكبة للتطور فى خدمة الفرد
..
الأخصائى الاجتماعي ممكن يغريه إنه يلبس دور ووش الأب أو الأم المعتاد للمجتمع ويلبس عباية وعمامة وأوقات كمان عصاية النصيحة
وده بيلمس مع بعض الناس وأوقات بيحبوه فممكن العميل يحب حتة الزعيق ولهجة الأمر والنصيحة والشد ويحب إن فيه حد بيمثله صورة الأب المعاقب المحاسب أو الناصح الرشيد اللي بيشيل عنه هم مسئولية ونتايج القرار
..
العلاقة المهنية
لا هي علاقة قرابة ولا صحوبية ولا أخوة
وبيحكمها قواعد مهمة لصالح العميل
جلسات التدخل المهني مش دورها أمر ولا نصيحة ولا عقاب ولا حل مباشر متفصل لمشكلة معينة ولا دورها اللوم أوالتبرير
لكن ممكن يكون واحد من أدوارها المساعدة في رؤية الصورة كاملة علشان العميل يقدر هو بنفسه اللي ياخد قرار متناسب مع ظروفه

[ياسر زكي3]

*الشخص اللى مش بيقدر يقوم م السرير بسبب الإكتئاب مش "كسول"
* و الست اللى عندها اكتئاب الحمل أو ما بعد الولادة و بتبكى و تشتكى كتير و مش قادرة تنضف بيتها و تهتم بنفسها و أولادها مش "نكدية و مأڤورة و مُهملة"
* و الشخص اللى بيخاف يخرج من بيته بسبب اضطراب القلق أللى عنده أو اكتئابه مش "صديق سىء"
* و الشخص اللى بيفكر ينتحر و بيتكلم فى ده مش "بيحب يشد الإنتباه"
* و الشخص اللى أوقات يجيله نوبة اكتئاب و أوقات بعدها نوبة هوس و هايبره و فرفشه على توتر بسبب اضطراب المزاج ثنائى القطب مش "مجنون"
* و صديقك أو صديقتك متقلبى المزاج و قراراتهم عاطفية، المندفعين الحساسين بزيادة و تعلُّقهم بكل اللى يحبوه زيادة مش بالضرورة "منفسنين و سوداويين"
* و الشخص اللى إتعرض لصدمة أو صدمات فى حياته و بأه مش بيبطل تفكير فيها فى اليقظة و النوم لدرجة إنه كأنه عايش فى لحظة الصدمة، و بيتجنب كل ما يمت بصلة لصدمات حياته، و تركيزه و ذاكرته قلت جداً بسبب ده.. مش "ضعيف"
تعليق اليُفَط Labelling و اتخاذ المواقف سهل، لكن إنك تقرب و تفكر و تكون وجهة نظر فيها احتمالات الصواب و الخطأ لحكمك ع الشخص اللى قدامك صعب.
أللى فوق دى كلها اضطرابات نفسية بيصاحبها خلل كيميائى و خلل فى طريقة تنظيم الشخص لأفكارة و مشاعره "أللى هى بتترجم فى مخنا و أجسامنا لكيميا برضه" ، و كل شخص من دول محتاج مساندة من المحيطين فى رحلة العلاج سواء كان كيميائى و/أو سايكوثيراپى، و وصمك لصاحبك و اتهاماتك و لومك ليه على أعراض مرضه مش بتخفف المرض.