بابا مش قادر يفهمنى.... ماما مش عارفة تنزل لمستوى تفكير

[doaa shedid]

المشاركة الأصلية كتبت بواسطة لمى 2016

السلام عليكم و رحمة الله و بركاته

ازيكم كلكم؟
بعيداً عن المقدمات اللى انا اصلاً مش بعرف اكتبها اصلا دى
فانا النهاردة جاية اتكلم فى موضوع لاحظته موجود فى مصر بالذات
و الموضوع دة هو ما يسمى ب "صراع الاجيال"
دايما اللى اكبر مننا سناً
مش فاهمينا خالص
و دايما حاسين اننا تفكيرنا غلط
و احيانا كمان بيحسوا(( اننا مش بنعرف نفكر اصلاً))
و اننا مش لينا حق اننا نبدى راينا
او نناقشهم فى اى قرار هما ياخدوه
حتى لو كان القرار دة يخصنا احنا
يعنى مثلا تلاقى واحد عايز يدخل كلية ما
يقوموا اهله يقولوله لا
انت هتدخل الكلية دى
و مش يقبلوا منه اى نقاش
كأن كلامهم دة "قرآن" و غير قابل للجدال او المعارضة
و لو حد لقى والده و والدته بيتكلموا فى حاجة
و هو موجود و قال رأيه
للاسف رايه دة لا يُقابل إلا بكلمة واحدة
"اسكت انت ، انت مش فاهم حاجة"
ليه يعنى؟!
و بعدين هو هيفضل لحد امتى مش فاهم
و دايماً لما ييجى حد من أهلنا يتكلم عننا يقولوا
"جيل بايظ مش فالح فى حاجة"
احنا جيل" بايظ"!!
احنا مش فالحين فى حاجة!!
و ليكن
بس مش كلنا
و حتى لو كلنا
المفروض انكم تقومونا و ترشدونا للصح
مش تشتمونا
و بعدين هو احنا لو جيل "بايظ"
ايه اللى خلانا بقينا كدا
مش هما بيقولوا
" هذا الشبل من ذاك الاسد"
و
"من شابه اباه فما ظلم"
يبقى اصلاً الجيل "البايظ" دة
الكبار هما السبب فى وجوده
و فى انه يبقى بايظ
رغم اقتناعى التام اننا مش جيل " بايظ " و لا حاجة زى ما هما بيقولوا
لاننا لو جيل "بايظ" مكانش فيه حد مننا قدر انه يبقى دكتور ناجح
او مهندس كويس
أو........أو.........
و الامثلة على نجاح الشباب كتيرة جداً
لكن بردو مصرين يطلقوا علينا لقب و ( وصمة ) الفشل
السؤال بقى اللى بجد اموت و اعرف له اجابة هو :
ليه كل دة؟!!
ليه دايماً احنا _الصغيرين_ اللى وحشين؟
ليه احنا اللى مش بنعرف نفكر كويس؟
_مش يمكن حضرتك اللى تكون شايف الموضوع غلط_
ليه احنا جيل "بايظ"؟
ليه و ليه و ليه......
اسئلة كتيرة فى دماغى و مش لاقيالها اجابة
ياريت اللى يعرف اجابتها يقولى
(ملحوظة: أنا عارفة ان معظم المنتدى شباب لكن اللى بطلبه هو ان الكبار هما اللى يردوا على اسئلتى و الشباب بردو احب اعرف رأيهم فى التعسف اللى بيمارس علينا و على ارائنا).
اخر كلامى:
solving of the problem is on finding out the people who will solve it

حل المشكلة يكمن فى ايجاد من يستطع ان يحلها!!

المقوله دى قالها على بن ابى طالب رضى الله عنه وارضاه

بمعنى ان المشكله السبب فيها الاباء

لانهم عايزين يحاسبوا ولادهم بمنطق زمنهم - الابقاء طبعا - ورافضين نهائى انهم ياحسبوا الاولاد بمنطق زمن الاولاد نفسم

هنا دور الابن او البنت وده عن تجربه شخصية

حاول تفكر فى قرارات كتتتير قبل عرضها عليهم وقبل تنفيذها علشان يكون عندك ردود مقنعة جدا لهم مع الاخذ فى الاعتبار ان ارائهم كثيرا ما تكون صائبة

لكن الي بيحكم الموضوع ما هو القرار؟ ومتى ينفذ؟ ولماذا اتخدته؟ وما يترتب عليه من تبعات؟

والحمدلله بيكون عندى رد على الاربع اشئله وبعدها بيكون واضح القرار خاص بى لوحدى ولا متعلق باحد؟
ارجو ان مشاركتى تفيد