الامتحان على البيبان بيخبط .. جرى ايه؟ .. هتتلخبط؟!!!

[أحمـدنجـم]

الامتحان على البيبان بيخبط .. جرى ايه؟! .. متلخبط؟!

الامتحان على البيبان بيخبط

الكل متلخبط

والطالبات أنواع

يا إما حاسة بالصداع

يا إما بتكون للجميع

من ضمن أسباب الصداع

أي ينعم

الكل رايح للقلم

اللي بيرسم بيه

واللي بيكتب بيه

وأخينا بيشخبط

ولو نقرب م البيوت

نلاقي ادام الكتاب

في واحدة سهرانة

وواحدة ماسكة للريموت

يا عيني حيرانة

ازاي هغمض عيوني

من دريم وروتانا؟

والرابعة نعسانة والصبح كسلانة

في الخط بتبلط

مع إن الامتحان

بيدق ع البيبان .. وبيخبط

في واحدة عاملة للمذاكرة جداول

لو مامتها عازتها

تلقاها ايدها بايدها

دايماً وبتناول

في واحدة عايزة تكون

أحسن وبتحاول

والتالتة بتشوف الكتاب

عفريت

بعبع

أمنا الغولة

أبو رجل مسلوخة

تايهة وملبوخة

زهقانة م الكتاب

- يا بنتي ذاكري

- حاضر يا مامي يعني اقطع نفسي؟

وهي في المراية

واقفة بتتحفلط

مع إن الامتحان

ع البيبان

بيدق .. بيخبط

مع إن الامتحان

كان .. يا ما كان

كان زمان ..

بيقيس تعبنا ف الشهور

بيقيس طلبنا لعلمنا

اللي وهبنا النور

كان يا مكان الامتحان

يا طالباتي .. مسحراتي

ع الطبلة بينقر

اصحى يا نايم

وحد الدايم .. سبحانه من .. صور

شقشق صباح ..

بينادي حي ع الفلاح

بالعلم نحفر طريق

ما بين الصخر للقمحة

بالعلم تفضل برئ

بيه القلوب صالحة

بريء ووقت اللزوم

بتكنولوجيا العلوم

نصبح طيور .. جارحة

اصحى يا نايم .. يا نايم ..

اصحى

كان يا مكان الامتحان ..

كنا نخش اللجان

الوش .. ف الورقة

ونسمي بالرحمن ..

نلقى العسير .. رقة

والغش عين الخيانة

مش غش لا... سرقة

مين غشنا مش مننا

دا ديب بناب .. زرقة

عمر المراقب ما قالي

بس يا غشاش

أصل اللي ييجي بلاش

أكيد يروح ببلاش

والنجاح من غير كفاح

والله ما يسواش

النجاح؟

الله على الكلمة

وأمي كانت تقولي ..

- عارف يا واد يا أحمد ..

أجمل الأفراح النجاح

يوم نتيجتك فرحتك

دي أسعد الأفراح

اسمعوها م العندليب هترتاحو

وحياة قلبي وأفراحه

وهناه ف مساه وصباحه

ما لقيت فرحان ف الدنيا

زي الفرحان بنجاحه

الناجح يرفع ايده

الله يزيده كمان وكمان

ودي فرحة هتفضل دايماً

جوايا ف كل مكان

صورة ومهما تمر سنين

عمر خطوطها ما تتلخبط

لولا العلم ما كان الطين

يقدر لحياته يظبط

الامتحان ع البيبان

بينادي ع الإنسان

لو مش هتلحق مكان

يدوب على باب الحياة

هتتشعبط

هتتشعبط