ثانى قصائد محمد على

الشاعر/محمد علي · #1 30-11-2008, 12:00 AM

حبيتك يا بت

حبيتك يابت
وقلبى رفرف فى الفضا
لما إيديكى اتمكنت وتبتت على خيط دوباره
مربوط فى طرفه بسمتك
فوق شفتك
وقلبى طاير طيران فراشه
فوق غيطانك داخت يا بت
حبيتك يا بت لما بلادى ضلمت مالقيتشى نور
أو حتى سور أمشى بجواره
واروح معاه لمنتهاه لما صخوره اتهدمت والشمس طلعت
بعد ماسنين طويلة روحت
صحيت لقيتك
ولقيت عينيكى نورت
عمرى يا بت

حبيتك يا بت
واوعى تقولى عنى لابوكى والا لاخوكى
إنى شاعر وبتاع كلام عايش وباحلم فى الحقيقة وفى المنام
اوعى تقولى إنى كاتب 200 قصيدة
نصهم شعر ف عنيكى
اوعى تقولى ليحشوكى
ويحوشو طيفك عن منامى
ياللى كلامى ويا حروفى بيعشقوكى
اوعى تقولى ليحوشوكى
وابقى انا مت