من كتاباتي .. أغاني مسرحية "هلوسة" ..تعالوا نهلوس شوية

[أحمـدنجـم]

أغاني درامية

من كتاباتي

أغاني مسرحية (هلوسة)

المسرحية من تأليف أ/ رجب سليم

أشعار / أحمد نجم

إخراج أ/ أحمد عجيبة

تم تقديمها على مسرح نادي هيئة قناة السويس ببورسعيد

في 10 / 6 / 2008

الافتتاحية

أغنية حوارية

الكورس

الليلة الليلة بلاش كلاسيكا وليه القرفصة

هنرقص ليلى على المزيكا يا لولا يا هندسة

وف قرية لولا .. نلم الشلة .. ونعمل إيه؟

هنهلوس هلوسة

صورة .. صورة كلنا هنبان في الصورة

جنبك يا ورد بيه .. ورد عليك .. يا ورد بيه

ورد بيه

إخواني

الكورس

ايه

ورد بيه

أيتها الشعب

الكورس

إيه

ورد بيه

الحكاية مش حكاية القرية

كورس

أمال حكاية ايه

ورد بيه

أصلها فزورة .. حلوة صغيورة

وف وسط الصحرا .. وبنحلب بقرا

وبنقرا الكف .. بنحط الواحدة .. تنبت ألف

والألف بيولد .. أرانب خضرا .. تطلع م الصحرا

تهرب على بره

وهلوس هلوسة

قيس

كم جئت ليلى بأسباب ملفقة

ليلى

معلش قيسي أصل أنا باكل مفتقة

قيس

ليلى أفيقى أنا المجنون

ليلى

طب اعقل .. وروق .. احنا ف زمان الانترنت

طبلي وورق .. حزمني هرقصلك ع التت

دا زمانك ولى وشعرك راح

وجه مكانه الإس إم إس

تيكاواي الحب يا قيسي ارتاح

بقى اسمي لولا ولولي ومس

وهلوس هلوسة
~*~*~*~*~*~*~*~*~*~*~
~*~*~*~*~*~*~*~*~*~*~

تتر إعلان لافتتاح القرية السياحية(ليلى العامرية)

ليلى العامرية دي قرية فيها الهموم بتـ (بوش)

اغطس وبلبط وزقطط وحلبش الحلـ (بوش)

كل اللي زارك يا ليلة في ليلة ولا ألف ليلة

مسكه الجنان مسا (بوش)

في ليلى العامرية الشلة ابتغددت

وكله جاب لمراته شازلونج ومددت

تعالوا نشوف شفيقة ونشوف اللي جرا

فتح مخك دقيقة رجع ضهرك ورااااااا

تتر نهاية الإعلان

عمرنا الصحرا بليلى وف ليلى عمر عمر

لو تدخل مطبخى ليلى تلاقى رز معمر

شيخ محضر يا شيخ محضر ويعيني لو تتأخر

خضرنا الصحرا بليلى واحنا معاها هنتخدر

كل الدنيا هتتخدر

~*~*~*~*~*~*~*~*~*~*~
~*~*~*~*~*~*~*~*~*~*~

أغنية القرار

(بعد ضرب بطل المسرحية على وجهه من ورد بيه صاحب القرية السياحية
طلب منه مدير أعمال صاحب القرية أن يعتذر
مع أنه هو المجني عليه لا الجاني فنزلت هذه الأغنية)

لامك مخاصمها الألف .. وبتئتلف نونك في كلمة عم

صلح كمان القفا ... بالغ في وقفة صفااااا

نفسي في ساعة صفا .. رجليك بقى تنضم

متخافش مرة وقول .. دا ورد بيه مسطول

زكيبة متبخرة .. شافك جبان بقى غول

متقولها يلا يا عم

لااااااااااااااااااااااااااااااااااا

~*~*~*~*~*~*~*~*~*~*~
~*~*~*~*~*~*~*~*~*~*~

يا مسحسح

(ورد بيه مزاج حضرته اتعكنن فطلب يسمع أغنية
شعبية وطبعاً دا ذوق حضرته تعالوا نشوف هيسمع ايه)

لو المزاج انضرب قوم عمر الطاسة

نفسين وكاس العنب والمزة مصاصة

وكرس اللي وكرس اللي لك

وحط محشي في محشي شيلي ومحشي شلك

يا مسحسح يا جميل يا مسحسح

يا ما نفسي في القرية اتفسح

من غير ما اتشهنف واتنحنح

ليموني ع الفكة وانا افسح

درمغني ف كاسك يا معلم

دم تك تك ع الطبلة وقسم

فرغلي ولف البنورة

سنيرلي الحلوة السنيورة

خد واكتم من غير ما اتكحكح

يا مسحسح

(طبعاً دا ذوق ورد بيه في الأغاني)

~*~*~*~*~*~*~*~*~*~*~
~*~*~*~*~*~*~*~*~*~*~
الحلم

(هذه الأغنية نزلت بعدما قرر بطل المسرحية تدمير القرية
السياحية رافضاً الظلم والذل الواقع عليه ..
وهذه الأغنية على لسان خطيبته في المسرحية (ليلى))

إنت وأنا عايشين .. نمسح دموع العين

الأولى بالشقى يمكن في يوم نقدر

نتعب نقول ع اللقا دا نصيب ومتقدر

جوانا شوق إحساس بيشدنا أكتر

معدش غير حلين طب قولي مين أصدق

الأولاني هروب والتانية نار تحرق

يا خسارة آه عايشين والحلم تالتنا

يا خسارة آه يا عين .. والصبر كان قوتنا

~*~*~*~*~*~*~*~*~*~*~
~*~*~*~*~*~*~*~*~*~*~

الصرخة

(نزلت هذه الأغنية بعدما عاد قيس التراثي من التاريخ
ليشاهد الزيف الذي ملأ الأجواء وليرى الأرض التي دارت عليها
أحداث قصة قيس وليلى الحقيقية تتخذ قرية سياحية للإتجار
في المخدرات وما شابه ذلك من الرذائل)

آه وألف آهة .. بقت الوشوش زي المتاهة

البرئ .. يطلع بلاستيك .. بعد ما شالك وهشتك

سبحته.. عداد ضحايا

سحبته تحت العبايا

تمسخك تمثال بلاستيك .. بعد ما شالك وهشتك

آآآآآآآآآآآه وألف آهة
~*~*~*~*~*~*~*~*~*~*~
~*~*~*~*~*~*~*~*~*~*~

الزفة

(هذه الأغنية نزلت عندما قرر ورد بيه والكبير
وهو القوة الأجنبية
أن يقدموا لقيس التراثي الذي احتل القرية
عروسة (تكنولوجية) تشبه حبيبته الأصلية ليلى العامرية
ولكنها عروسة (ريبوت) بداخله قنبلة تدمر (قيس) التراثي
وفي هذا المشهد تتقدم العروسة وتقترب من قيس)

يا عريسنا يا ولهان .. يئسنا والوله .. هان

مبروك عليك العروسة .. وقلبها الفاضي

الكل راضي يشهدك

يوم مولدك تِنْزَف

كلام قيس

(ليلى بجانبي كل شيء إذاً حضر ..
أي حلم أنتِ يا ليلى هل يقتل حلماً صاحبُه أم يأتي ليعلن مولده ..
ليلى .. ليلى)

وتنفجر العروسة ويموت قيس وتستكمل الأغنية

الكل راضي يشهدك .. يوم مولدك تِنْزَف

ويكون (فنال) مشهدك .. حبك عماك تِنْـــزِف

كلام قيس بعدما مات صوته فقط

(آه يا ليلى آه لو تعلمين .. أني ما كنت لأعرف أن الحب يباع .. ما كنت لأعرف هذي الأقوال .. باع .. يباع .. باعت .. بيع .. لكني أدركت الآن أن رجالاً كالأطفال .. تضيع)

~*~*~*~*~*~*~*~*~*~*~
~*~*~*~*~*~*~*~*~*~*~

أغنية الفنال

الكبير يقول

بالقانون وبالنظام .. بالفوضى وبحبة كلام

بالهرجلة جلا جلا .. دي قنبلة ومبرجلة

بالبيضة بلعب بالحجر .. وأكون أنا بين البشر

وعيوني طالة م القمر

عشان كدا بقيت كبير

الكورس

يا مسحورين انفضوا .. تعويذة السحرا

مدوا الادين انجدوا .. الخضرة والصحرا

انت اصحى وصحي اخوك وقوله ينده ع اللي جنبه

هزوا راسكم فوقوا كونوا جسم واحد حر قلبه

ازحفوا الزحف المقدس والهدف هو الضمير

اقتلوا كل اللي دنس اخلعوا ناب الكبير

دا الكبير ابداً ما يقدر ع اللي راضع يوم كرامة

والسكات آخر علامة

بعدها اااااااااااااااااااا

بعدها تقوم القيامة

وآسف للإطالة أردت أن تحيوا معي تلك الحالة الدرامية