ويبقى السؤال؟،،، ماهى نظرة الاخرين لك بعد ارتكاب الخطا؟!!

[طـفـلـة الامـس]

بعد التحية،،،،،،،،،

فى الاول اقولكم سبب كتابتى لهذا الموضوع

كنت عند جدتى يوم السبت فلقيت عندها جريدة الاهرام فالمهم قعدت اقرا ايه؟!!

بريد الجمعة ،،،.. والقصة كانت تدور حول شاب مصرى بدا حياته وهو فى مقتبل عمره للاسف فى تعاطى المخدرات ولكن مع الوقت ربنا هداه الى تركها تماما وكانت بتحصله الاعراض بتاعة اى حد لما بيسيبها ولكنه كان يتحمل املا ان يعيش حياة محترمة كما يقول

بعدها اتقدم لفتاة ووافقت عليه واخبرها انه كان كذا كذا بس هو دلوقتى خلاص الموضوع ده انتهى بالنسبة له وكده

من باب الامانة يعنى وهى وافقت وبعدين تزوج بها

وبيقول انه بدات تتكاثر عليه الديون فاضطر الى اللجوء اليها مرة اخرى وبدات زوجته تحس بالامر ده

فاخبرها ولما هى طلبت منه الطلاق كان هو متعلق بها بشدة فترك المشوار ده وبعد عنه نهائى للمرة التانية

المهم ان زوجته دى مابقتش واثقة فيه اطلاقا

كل شوية تطلب موضوع الطلاق ده وهو بيقول انه متمسك بيها ومش هايقدر يسيبها ابدا

فلما لقاها مصرة جدا قالها انه فيه برنامج تنظمه احدى المراكز للمدمنين للاقلاع عنه تماما

وذهب هو وهى وكان وحتى الان مستمر فى اتباع خطوات البرنامج ده عشان مايرجعش للموضوع ده تانى ابدا

المهم انها برده اقتنعت شوية بكلامه وبعد كده حست انها لسة خايفة منه برده

وهو مش عارف يقنعها ازاى ان الموضوع ده انتهى فعلا وعمره ماهايفكر فيه تانى

وكان فى اخر المقال بيطلب من الكاتب انه يقوله ازاى يقنعها وانه لو اقنعها هايقوله على اسماء تجار كان يعرفهم اثناء تلك الفترة وكان كاتب اسم موقع بس انا فاتنى انى افتحه وانا هناك او حتى اكتبه

انا كل اللى اثر فيا فى الحكاية دى انه بيقول فى نهاية القصة

هو معنى ان الانسان غلط فى حياته يبقى ده خلاص منبوذ من الجميع وماحدش هايثق فيه ابدا لمجرد غلطة هو ارتكبها وندم عليها؟

اليست هناك من شىء يدعى توبة؟

ومالحتقش اقرا حتى رد الكاتب عليه

عشان ماما كانت ماشية وسابتنى اكملها بعد طول محايلة

هو ده بقى موضوعى بيدور حول تلك القصة

الغلط هنا بقى عند مين؟!!!!!!!!

عند زوجته لانها مش قادرة وده غصب عنها انها تثق فيه

ولا عنده هو

زى ماصاحبتى قالتلى

قالتلى انه هو ماكانش المفروض يقولها من البداية لما اتقدم لها انه كان كذا كذا

لانه لو كان فكر انه يقدم على الخطوة دى تانى خوفه من انها تعرف الموضوع ده للمرة الاولى كان هايمنعه من الاقدام على الموضوع ده تانى

ايه معنى ان الانسان يغلط ؟

انسان مش كويس صح؟ بس امتة؟!!

حينما يصر على غلطه ومايحاولش انه يقلع عنه

انا بصراحة لما حطيت نفسى مكانها لقيت ان غصب عنى هاكون كده زيها وهاتصرف نفس تصرفها

وفى نفس الوقت ،،،

هو حاله يرثى له

لان كل الناس هاتبقى نظرتهم ليه كده لغلطة ارتكبها وندم عليها

هايعيش حياته كلها متعذب بسبب كده؟!!!!!!!!!!!!!!!!!