أنا و ... حياتي .. دراما حياتية في حلقات

[أحمـدنجـم]

فضلت الملم في الحجج عشان تكون بينا مكالمة
طب اعمل ايه اصل الحياة من غيرها قاسية باردة ضلمة
باختصار إصرار غريب كان اللي كان كلمتها كام ألف كلمة
حكيتلها عن حياتي .. عن شريكتي عن آهاتي .. وهي تسمع كل كلمة
************
وشركتي زي عادتها طبعاً الأجازة في بيت امها
وعيشة العازب دي عشتي مليش في نومتي غير مخدة بضمها
والفرصة سانحة عشان نفضفض في الكلام أنا وحياة
حكيت وفاكر إني متعذب لوحدي لقيت (حياة) عذاب بيجري في دمها
***********
قالتلي عن زوج زي ضل خيال ملوش غير بس صوت
وحكتلي عن شبه راجل الغيرة عنده خدها الوبا وصابها الموت
قبل الجواز كانت حبيسة أب شكاك جلاد ما يرحم ضعفها المكبوت
اتقدم ال.. راجل لها وافقت عشان يخطفها ع الحصان ويفوت
**********
اتمخطري يا حلوة بشقة دي جوازة سهلة وملقوطة
محلاكي هنا جنب عريسك ... مبروك عليكي الزغرودة
تدخل (حياتي) باب أودة تبات عروسة منقوطة
تاخد يا عالم فيه مقلب .. في الحيطة راسها مخبوطة
*************
عاشت معاه سنين من غير أنين من غير ما تشكي
لكنه زود في القساوة في البعد عنها وهي أبداً مش بتبكي
تلبس وتقلع .. تخدم وتنقع .. تنام قفاها يأمر عيش
ويوم ما يحصل حاجة يعني ..بينها وبينه تكون وسيلة تريح السلطان زمانه
يقوم يسبها كأنه بارم ديله بعرق تركي
************
ياااااااااه يا (حياة) دي بلوتي جنبك ما تسوا أي بلوة
اللي شاف ضحكة عيونك قال دي عشتك جد حلوة
ومين بيعرف إن الدموع ساعات نداريها بغنوة
ومين يصدق إن العروسه يوم فرحها اتبدل الشربات بقهوة
************