لو داخل اولي جامعة اسأل مجرب

[vampire1188]

لكل الناس بقي الـ Freshmen اللي لسه على عتبة سنة اولي ..

كل سنة وانتوا طيبيبن بمناسبة بدأ الدراسة .. وحبيت انوه على بعض الحاجات كدا عشان ابقي تميت جميلي بقي

> شيك على محفظتك وشيكي على شنطتك كويس .. واتأكد ان يكون معاك ورقة وقلم على الاقل عشان لو فيه حاجة كتبها الدكتور تكون متابعة اول بأول

> كل واحد ياريت يقوم دلوقتي حالا يحط بطاقة الترشيح بتاعتة في جيبه عشان ماينساش .. عشان السنة اللي فاتت كان الدخول ببطاقة الترشيح .. لازم يكون مرفق معاها اي اثبات شخصية (بطاقة شخصية او انشالله حتى كارنيه تأمين صحي) عشان السكيوريتي بتاع الجامعة بيبقي خنيق اوي اول يوم .. فلو سيادتك نسيتها .. يبقي تسمعني سلام سواح !!

> كل واحد يراجع جدول محاضراته تاني .. ويتأكد من صحته .. خاصة في المواعيد .. عشان مايتسوحش ..

> البعض منكوا ان مكانش معظمكوا هايبقي داخل خايف وكاشش .. اول ماتخش قول باسم الله الرحمن الرحيم يارب اجعلها سنة كويسة عليا وعلى اللي زيي .. عشان الملايكة ترد عليك وتقولك ولك مثل هذا ..

> البعض منكوا هايخش هايتلاقي نفسه سايح في الجامعة ومش عارف يروح فين ولا ييجي منين .. متخافش .. اقرب حد اسأله وماتتكسفش .. احنا كلنا طلبة في الجامعة واللي عارف بيقول اللي مش عارف .. فيه ناس ممكن تسألها وتبصلك بإستحقار .. دول ناس عندهم امراض نفسية .. ماتكتأبش .. واللي بعده واسأله وهكذا لغاية ماتوصل للحتة اللي انتا عايزها ..

> بالنسبة للناس اللي في جامعة القاهرة (داخل الحرم الجامعي) "تجارة/حقوق/اداب/دار علوم" .. اول ماهتيجوا تخشوا .. هاتتلاقوا ناس نضيفة كدا لابسه لبس الكشافة لو تعرفوه (قميص ابيض وحاجة كدا زي الكرافته خضرا) .. ولاد وبنات من كلا الجنسين ..

المهم .. الناس دي تبع فريق اسمه فريق الجوالة .. الفريق دا بيختص بالرحلات والانشطة الثقافية والاجتماعية ومايتصل بذلك من مواضيع .. الناس دي دائما ما بتستلم الناس بتوع اولي ويروحوا لكل واحد ويسمعوه الاسطوانه المشروخة بتاعة مزايا الجماعة ونشاطاتها .. ومن ضمن المزايا اللي تجذبك انه هايقولك هانديك كارنية عضوية لمدة سنة في نادي البحرية اللي في الجيزة .. طبعا انتا هاتفرح اوي .. كارنية نادي بقي وكدا .. هايقولك عهشان تشترك معانا لازم تحرر استمارة .. الاستمارة دي بكام ياعم الحاج ؟ بجنيه واحد فقط .. هاتروح زي الزبون تدفع الجنيه ويقولك تعالانا بكره ومعاك صورة .. هاتيجي بكره ومعاك الصورة .. هايخدها منك ويقولك تعالانا بعد شهر بقي .. يعدي الشهر .. وتيجي تدور عليهم ماتلاقيهومش !!

هما مش نصابين عشان ماظلمش حد .. بس اللي عايز يعيش في دور الانشطة والرحلات وكدا الطريق مفتوح قدامه من خلال المجموعة دي .. ومجموعة تانية اسمها المجموعة العلمية

> بنبه كتير اوي على أهمية حضور المحاضرة الاولي .. لإنك ماتنساش انك لسه جديد .. ماشوفتش منظر المدرج حتى .. فحاول بقدر الامكان تحضر اول محاضرة عشان تكسر حاجز الرهبة الاولاني دا ..

محاضرة في التانية في التالته هاتبدأ تتعرف على ناس وتكون جروب .. ويبدأ عصر دراسة جديد معاك وهوا عصر الدراسة الجامعية

> بالنسبة لإجرائات الدفع بتاعة المصاريف والكارنيه ..

مصاريف انتساب وانتظام .. ممكن تكون اتغيرت .. عشان مابقاش بقولكوا معلومات غلط روحوا واسألو في شئون الطلبة عشان تبقي المعلومة موثوقة منها ...

ازاي تدفع المصاريف ؟ .. بتروح مكاتب شئون الطلبة للفرقة بتاعتك .. بتقول الموظف المسئول .. انا عايز اذن دفع مصاريف .. هايقولك هات بطاقة الترشيح بتاعتك .. هاتديهاله .. هايتأكد من المعلومات اللي في البطاقة ويكتب اسمك على ورقة كبيرة كدا .. هاتاخدها وتروح بيها للخزنة .. هاتدفع المصاريف هناك .. بعد ماتدفع .. تستني شوية هايديك وصل استلام (اثبات دفع المصاريف) .. ولعلمكوا الوصل دا مهم جدا .. لإنه مالوش بدل فاقد .. عشان لو ضاع انسوا !!

المهم هتاخد الوصل بتاع الخزنة دا وترجع بيه لشئون الطلبة تاني .. وتدي الموظف اللي قاعد الوصل ومعاه صورة شخصية ليك .. وياريت تنقوا صورة عدلة والنبي .. صور الثانوية العامة العار دي سيبوكوا منها !!

هاتديله صورتك وتستني مدة اسبوعين كدا .. لغاية مالكارنية بتاعك يطلع .. هاتروح بعد كدا تقوله انا عايز الكارنيه بتاعي .. هاتقوله اسمك .. هايدور عليه ويديهولك بس طبعا بعد مايتأكد من ان وشك مطابق للصورة اللي في الكارنيه ..

وطول مانتا معاكش الكارنيه .. الدخول والخروج من اي باب في حرم الجامعة لأي كلية .. ببطاقة الترشيح

> وانتا قاعد في اول محاضرة .. ياريت ورجاء تعمل الموبايل سايلنت وتبطلوا حركات المعيلة بتاعة ان واحد مزنوق في اغنية وحبك معاه يسمعها اثناء المحاضرة .. عشان بتيجي فوق دماغ الناس اللي معاك لو الدكتور سمع الموبايل .. عشان فيه دكاترة بيتلككوا من اول محاضرة .. وفيه ناس بتتطرد من اول محاضرة .. عادي يعني .. هاتقولولي ازاي واحنا ماعناش كارنيهات .. هايقولك هات البطاقة الشخصية .. معاكش ؟ .. يبقي تتشمس بره معا امن المدرج بقي !!

انا الكلام اللي قايله دا خاص بالفترة الاولي بتاعة اول اسبوع ..

هوا بالظبط بعد مرور اسبوعين .. هاتكونوا بدأتوا تتأقلموا على الجامعة وبقي الحال ماشي ميه ميه ..

وساعتها بقي ماتحتاجونيش

كل سنة وانتوا طيبين يا جماعة .. ويارب تكون سنة سعيدة علينا وعليكوا يارب ..