هو الى بيحصل ده حلال ولا حرام ؟؟؟

[Dr.diamond]

انهارده وانا قاعده فى ساعه صفا ( مش البرنامج)جه فى بالى اعد عدد المسلسلات الموجوده فى رمضان ده.الصراحه قعدت كتييير اوى ومكنتش بخلص ابدا كل شويه افتكر مسلسل واضيفه مع الباقى والى استغربتله اكتر انى بعد فى مسلسلات ( رمضان )!! يا سبحان الله ! بقى هى دى طريقه استقابلنا لشهر الصوم والعباده ؟؟
اشمعنا رمضان الى بيحشدوله كل هذا الطوفان من البرامج والمسلسلات التافهه. ده بدل ما يشجعوا الناس على الصلاه والقرأن وذكر الله ؟؟ غريب والله امرنا .تخيلوا المسلسلات التافهه دى كلها ادفع فيها كام ؟؟ واجر الممثلين كام ؟؟ يااااااااااه ! مبالغ طائله . مش دى كان أولى بيها الناس الغلابه الى مش لاقيين رغيف العيش فى هذا الشهر الكريم.؟ مش كان أولى بيها المرضى فى المستشفيات الحكوميه الى حالها أسوء من حاله السجون ؟؟
أصبحت بالنسبه للمرضى جحيم لا مكان لتلقى العلاج . مش كانت الاموال دى توجه للجمعيات الخيريه ،الاصلاحيات او موائد الرحمن .لو كانت أنفقت فى اى عمل نافع لهان الامر .ولكنهم استغلوها فى الانفاق على المسلسلات التافهه والبرامج التى لا يجنى منها المرء الا اكتساب الذنوب والمعاصى واللهو عن الصلاه والابتعاد عن اداب الشهر الكريم .بجد تفكير غريب الى بيعملوه ده ؟يعنى هو ده الوقت المناسب للمسلسلات والاغانى ؟ والاهم من كده . هى دى الطريقه المناسبه لاستغلال الاموال ؟؟على اساس ان الناس كلها مرتاحه ومش ناقصها غير الترفيه ؟؟ وحتى فى غير رمضان , ازاى يدفعوا فلوس فى الحاجات دى وهما مش عارفيين يحلوا ازمه العيش ؟هو عادى انهم يعملوا كل ده فى رمضان ؟ عشان الصيام بقى واللمه !! ولا هو عادى انهم كل الفلوس دى والناس مش لاقيه تاكل ؟؟ انتوا شايفين ده عادى ولا ايه ؟؟