تعريف لمواد حاسبات و اقسامها

[lamar]

الاسم : حاسبات و معلومات القاهرة

السن / اول دفعة : 1996/1997

العنوان : ى شارع أحمد زويل .. على يمين الكلية علطول هتلاقى كلية فنون تطبيقية وعلى الشمال امشى شوية هتلاقى تمثال أحمد شوقى

قدامها مكتبة سمية وأخيرا هى خلف شارع الدقى .. مستقلة عن الحرم الجامعى خوفا على باقى الطلاب من الكليات الاخرى

________________________________________________

اولا المواد

اولا احنا كل سنة 12 مادة ... 6 ترم اول و 6 ترم تانى ان شاء الله

والدراسة كلها بالانجليزى

كل ماده ب 100 درجه

40 درجه اعمال سنه و امتحان ميد تيرم

60 درجه امتحان الفاينال

نظام التقييم عندنا حاجه غريبه كده اسمه GPA

و تتميز كليتنا بحاجه اسمها السمر كورس

ده يعني انك مثلا لو جبت في ماده جيد بس و عايز تزود الماده دي الي امتياز

تروح واخدها في السمر كورس و تزود براحتك بقي

و طبعا لو - لا قدر الله - شلت ماده بتاخدها في السمر بردو

و ينفع تاخد في السمر 3 مواد و الفرق بينها و بين التيرم العادي انها بفلوس اكتر

السنه دي كانت ب 150 الماده

يعني اغلي من مصاريف التيرم كله

الترم الاول

1 . Math1

2. تراكيب محددة (Discrete structure)

3. الكترونيات 1 electronics or physics)

4.انجليزى (English)

5. مقدمة حاسب introduction to computer)

6. ادارة (management)

الترم التانى

1. رياضة 2 (Math 2 )

2. برمجة (programming

3. احصاء (statistics)

4.اقتصاد (economy)

5. تيكنيكال رايتنج (technical writing )

6. الكترونيات 2 (Electronics )

--------------------------------------------------------

بالنسبة لاول مادة Math 1 رياضة 1

الرياضة الترم دة جميلة جدا ومعظها اخدناه بالفعل فى ثانوى وخصوصا انها بتبقى متركزة على الى قسمين فى الرياضة الا وهم تفاضل وتكامل Differentiation and integration

يعنى نظام الاتصال continuity والنهايات limits ورسم الدوال functions

____________________________

مادة الديسكريت استركشر
discrete structure


بصو يا اولاد انا الصعوبه الوحيده اللي قابلتني في الماده دي

هي اني مكنتش عارف انطق اسمها

ده في اول اسبوع

بعد كده هتعرف انها اسهل ماده في التاريخ

الددكتور بتاعها دكتور عاطف

اللي اقدر اقولهولك عنه انك لا يمكن تلاقي دكتور زيو

راجل دمه زي العسل

و هيفهمك كويس جدا

و لو حفظ اسمك اعرف انك هتاخد 40 من 40 في اعمال السنه

طيب ازاي بقي يحفظ اسمك

الناس الاذكياء كانو يستنو لحد ما يطلب مننا اسيمنت ( واجب يعني )

و يعملوه و يطلعو يوريهولو

هتسمع منه كلمه واحده

برااااااااااااااااافو يا بني

اسمك ايه يا حبيبي و هيسجل اسمك في ورقه

كرر الحكايه دي تضمن انك هتاخد ال 40 درجه و امتحان الفاينال بيبقي سهل جداااااااااا و زي السنه اللي قبله بالضبط

باختصار

دي مادة امتياز مرتفع

وفعلا المادة سهلة ياشباب ... فمتتخضوش منها فى الاول وركزوا مع الدكتور واللى متفهمهوش روحله المكتب

ياهناه ياسعده لما حد بيرحله المكتب ... بيفرح بيه وكدة هو تلميذ نجيب وعاوز يفهم قبل ما يمشى

____________________________

الكترونيات 1


دكتور مصطفي رضوان

اطيب دكتور قد تراه في حياتك

زي ما مش هقول قالتلك ان كان المعظم بيحب دكتور عاطف بس كان في ناس مش بتحبه

دكتور مصطفي رضوان مفيش حد مش بيحبه

علي فكره ده كان احسن دكتور في سنه اولي حسب الاستفتاء

اما عن الماده نفسها

تقدر تسميها فيزياء ثانويه عامه

اسهل ماده في التيرم او اسهل ماده في الكليه كلها

الماده دي بتتقسم الي 3 اجزاء

محاضره

سيكشن

معمل

المحاضره مش بيتاخد فيها غياب

السيكشن بيتاخد فيه غياب و اسيمنت و عليه 10 درجات

اما المعامل فدي 10 درجات في ايديك

بمعني

هتحضر معمل تاخد درجه و نص علي طول كده

يعني احضر الكل يبقي انت معاك 10 درجات

امتحان الاليكترونيكس بتاع الميد تيرم بيقي عباره عن اسئله اختيارات

الاسئله دي بقي زي الاسئله اللي جت ال 70 سنه اللي فاتو بالضبط

مش بيتغيروا

يعني بردو ماده امتياز مرتفع

ملحوظه : الاليك اكتر ماده شفت الناس جايبين فيها امتياز

____________________________

مادة الانجليزى

لحد دلوقتى دكتور ايهاب عبدالله كان ادانا

زى اى سنه الانجليزى دة بالsense

يعنى هيكون المرة دية عن الجرامر بردو وهكذا والمقاطع syllables وبعض الاشياء من تلك الجرة

مخبيش عليكوا ... لو ايهاب عبد الله ... محاضراته لذييذة جدا بس الامتحانات كنت بحسها غريبة شوية

يعنى كل واحدة والانجليزى بتاعه

معنديش كتير اقوله فيها

____________________________

مقدمة الحاسب( introduction to computer )


ديه مادة تعتبر في اولها نظرية شويه محتاجة حفظ

لانها بتتكلم عن مكونات الكمبيوتر ووظيفة الاجزاء وده بيبقي الجزء الاول

الجزء التاني بقي بيبقي عايز فهم اكتر من الحفظ

لاننا بتكلم فيه عن كيفيه تخزين المعلومات في الكمبيوتر ( متتخضوش اسعل جزء اصل )

بعد كده بقي الجزء التلت وده بقي اهم جزء

لكن هتبددا تاخد فيه اساسيات البرمجة

اه نسيت اتكلم عن الدكتورة بتديها واحدة اسمها فاطمة عمارة

المادة ليها سكاشن ولابات ولا تنين لاازم نحضروهم عشان بيتاخد فيهم الغياب وده عليه درجات طبعا

وده بردو بالاضافه للمحاضرة ( عشان كانت ساعات بردو بتاخد الغياب )

اللابات بتاعت المادة ديه ليها امتحان مستقل بيها وبردو الدرجات بتاعته بتنضاف لل40 درجة بتوع اعمال السنة

السكاشن حسب المعيد بس في الغالب هتستفاد منها ان شاء الله

اما بالنسبة للامتحانات بتاعتها فكانت السنة الي فاتت كويسة ( لانها اول مرة تدي المادة ديه علي سنة بتاعتنا ) فمنعرفش الاسئلة ازاى بالظبط

____________________________

مادة الادارة

دكتور هشام عبد السلام

المادة حاجتين

محاضرة : بيتاخد كل مرة شابتر

سكشن: بيتحل فيه بوكلت زى شييت كدة بتختار انت شركة وتطبق عليها اللى بتاخدة فى المادة من ادارة وتخطيط وتحديد اهداف الشركة وكدة

المادة باة

حقيقى مش عارفة اقول مثلا بتتذاكر ازاى

يعنى كل واحد بيشق طريقه لفهمها

هى رغم انها ادارة ... لكن الدكتور بيهمه جدااا تكون فاهم واسئلته بتعتمد على كدة

الا فى بعض المبادئ دية بتتحفظ والمدارس

لكن المصطلحات مش عليك حفظها ... المهم تفهمها وتفتكرها

الناظم العام فى الامتحان

الاسئلة فى الامتحان الاغلب اختيارات ... وبعدين بيجيب مسألة او سؤال تكتب فيه شوية

لكن امتحانا كان كله اختيارات متعددة

هو الامر على اد ما يبان ان هو كويس ... لكن الاسئلة دية بتخدع

واية تااانى ؟؟

اة وكمان حاولوا تحضروا المحاضرات

يعنى على الاقل هتكون اخدت فكرة عن الموضوع بدل ما تقرا الشابتر لوحدك ودة كتاب الانجليزى بتاعه بيلف ويدور

سيبكوا من الرسايل السلبية دية باة

المادة دية لو اتفهمت صح وعرفت تلاقى طريقك فيها ... مش هتلاقى مشكلة فيها بجد ان شاء الله

==========================================

اما عن مواد التيرم التاني


1- ماث 2

كل الحكايه انها امتداد لماث 1

مع انها مختلفه عن منهج ثانوي

الا اني شايف انها اسهل و اجمل بكتييييييييييييييير من ماث 1

____________________________

برمجه 1


الماده دي شعارها

" للاذكياء فقط "

انا داخل الكليه عشان الماده دي

و ده اللي كنت حاطه في دماغي

لما كان حد يقولي دي ماده صعبه كنت انت اللي مش بتفهم

لحد ما اخدتها و الحمد لله اكتشفت اني كنت صح

هيديهالك د محمد الرملي

هو مش هيعلمك برمجه بس

هو هيعلمك ازاي تتعلم لوحدك و تعتمد علي نفسك و دي اكتر حاجه استفتدها منه

اساسا انت في حياتك العمليه هتتعلم لوحدك غصبا عنك و لو مش بتعرف تعلم نفسك يبقي انت مش هتنفع في الكمبيوتر ساينس

و اديني بحذرك اهو

متسمعش كلام اي حد يقولك البرمجه صعبه او الرملي مش بيعرف يشرح

ملحوظه : دي الماده الوحيده اللي انا جايب فيها امتياز مرتفع ( انت اكيد احسن مني و ان شاء الله 12 امتياز مرتفع )

____________________________

الاحصاااااااااء

احم ... هى تنقسم الى احصاء و مبادئ الاحتمالات

مبادئ الاحتمالات دى كويسه و فيها من الاحصاء بتاعت ثانوى شويه سيبكوا من الامتحان اللى انتوا امتحنتوه ده
خالص بس المنهج سهل والله

اما الاحصاء هى بصراحه عايزه منك مجهود شويه

متعتمدش على المحاضره بس ولو مفهمتش كويس من المحاضره اوعى تزعل نفسك خالص

انا عن نفسى كنت بفهم من السكاشن اكتر من المحاضره بس لااااااااازم تحضروا لان الدكتور بيقول حاجات مهمه

ولازم تجتهد مع نفسك برضه و عايزه حل كتيييييير

اما الدكتور بتاع الماده فهو غالبا دكتور : عاصم ثروت

متركزوش فى شخصيته اوى لانه بجد شخص من الشخصيات العبقريه اللى قابلتها فى حياتى .

هتقولولى و هى دى حاجه وحشه دى حاجه حلوه اوى ..

هقولوكوا هو مشكلته انه عاوز كل الناس زيه و بالفعل بيعاملهم على انهم كده بس لو شاف منكوا الاهتمام ده هيتعامل معاكوا كويس اوىىىىى

____________________________

مادة الاقتصاد

زى ما احنا ملاحظين ان كل ترم فيه مادة تميل للنظرية شوية

دية باة المادة النظرية الترم دة ... بس مقولكمش

متعة جداااا على فكرة وفيها شاباتر اقتصاد رياضى والاستايل العلمى

المادة جميلة جدا والكتاب اصغر كتاب فى تاريخ الكلية

الدكتور : ابو السعود

دكتور تماااام جدا ومحترم جدا ما شاء الله

الامتحان كان بيسألنا تحبوا يبقى عامل ازاى

غالبا بيميل الى انه يكون اختيارات متعددة لانه مش عاوزك تحفظ اكتر من انك تفهم الدنيا ماشية ازاى

==========================================

الاقسام
======

علوم الحاسب و معنى بعلوم الحاسب الاساسية و البرمجة و هندسة البرمجيات و نظم التشغيل و خلافه

نظم المعلومات و معنى بقواعد البيانات و كل ما يتعلق بالتعامل مع كمية البيانات الضخمة و التنقيب و البحث فيها

تكنولوجيا المعلومات و معنى بشبكات الحاسبات فى الاساس و كل ما يتعلق بها و بعض التقنيات التطبيقية
المتقدمة كمعالجة الصور و الرسم بالحاسبات وهو قسم لذيذ جدا لكن المشكلة أن فرص عمله بتكون بره أفضل لان المجال ده مش منتشر فى مصر قوى

دعم القرار و ده قسم مختلف شوية و يتميز بالتركيز على نمذجة النظم و التفكير الشامل فى النظام system thinking و فيه رياضة كثير و كمبيوتر اقل

لكن لاحظ انه خمس ترمات (اولى و ثانية و نص ثالثة) مشتركة بين طلاب الكلية و 3 ترمات فقط للتخصص
يبقى انت فعليا 63% من دراستك متطابقة مع جميع الخريجين و 23% متطابق مع قسمك فقط (التخصص الرئيسى) و 14% متطابق مع قسم آخر (التخصص الفرعى)

=========================================

مجالات العمل

متوفرة ان شاء الله وحسب الشطارة بردو

فى ناس بتشتغل كdesigner ودة بيعمل تصميم فلوشارت مثلا للبرنامج وتخيل لكيفيه سيرة ودة مهم اوى

وعندك بردو ناس tester دول بيختبروا البرنامج ويحاولوا يطلعوا الثغرات ويتم المعالجة عشان يوصل لافضل شكل للبرنامج بدون ثغرات

وفى بأة الcoder ودة اسهل ما فى الامر .... مجرد بيكتب الكود على اساس التصميم

وفى اقسام عمل كتير باة حسب اللى معاكى

=================================================

حاسبات عين شمس

اولا المواد

First semester

1101 Introduction to computer& application 3-4
1102 Discrete Structures 3-2
1103 Physics
3-4
1104 Mathematics (1) 3-2
1105 English (1) 3-2
1106 Operation research 3-3

Second Semester

1201 Structured programming 3-4
1202 Computer packages 2-5
1203 Electronics 3-3
1204 Mathematics (2) 3-2
1205 English (2) 3-2

__________________________________________________ _

اقسام حاسبات ومعلومات جامعه عين شمس

computer science(CS)

ودي خريجهال بيبقي computer programmer
هذا القسم تتعلم فيه البرمجة بلغاتها المختلفة سواء سى ++ أو جافا أو سى شارب .. القسم ده من أكثر الاقسام الذى يشهد أقبال واسع وفرص العمل فيه متاحة بشكل كبير فى مصر

Information systems(IS)

خريجها بيبقي system analyst
قسم يعتمد على كيفية عمل قواعد بيانات وحاجات زى الاوراكل وهكذا وهو من أكثر الاقسام المطلوبة للعمل بشهادة خريجين كتير

computers systems(C.Sys)

ودا قسم جديد بيهتم بدراسة الهارد وير بجانب دراسة البرمجه

scientific computing(SC)

والقسم دا بيدرس كيفية الربط بين البرمجه وبين العلوم الطبيعيه مثل الفزياء والرياضيات

و كذلك الحال في جامعة القاهره .. مع اختلاف اخر قسمين
__________________________________________________ ___

نظام الدراسه

مدة الدراسه 4 سنوات ..3 سنوات والتخصص في سنه رابعه

وفي بعض الجامعات مثل القاهره التخصص في تالته ورابعه

والتخصصات في كل الكليات 4 تخصصات هنتكلم عنهم بعدين

مناهج الكليه اللي بتدرس داخلها .. لا يقوم بتأليفها اساتذه او دكاتره من الكليه لأنها مناهج عالميه اي .. ان كل دارسي ال computer science مثلا في العالم كله بيدروسوا نفس المناهج من نفس الكتب .. ونفس المؤلفين .

لذلك في ميزه حلوه اوي في الكليه وهي .. انه خريج الكليه او الطالب يستطيع ان يسافر لأ مريكا مثلا ليستكمل دراسته او للدراسات العليا او للعمل دون الحاجه لعمل معادله علي عكس اي كليه اخري .. لأنه من المعروف ان الجامعات المصريه غير معترف بيها عالميا غير في الدول العربيه بس ... وطبعا دي ميزه تتفرد بيها كليات الحاسبات والمعلومات


ملحوظة : بالنسبة للقسم الخامس فى عين شمس هو (Basic Sciences)

و واضح انه جديد لانى لم اجد معلومات عنه

منقـــــــــــــــــــــــــــــول