اسكتوا يا ولاد ... مش المرتب زاد !!!

[أحمـدنجـم]

المرتب زاد يا ولاد ..... المرتب زاد
وف شهر سبعة احنا على ميعاد
المرتب زاد
وخلاص هبني الدور العاشر
وهخلي تليفوني مباشر
واجيبلي بودي جارد ياباني
وسكرتيرة لشغلي تباشر
تقعد ويايا وتغني واللمب الحمرة هتنقاد
م المرتب زاد يا ولاد المرتب زاد

حد يقرصني في لباليبي .... مش مصدق
وهركب شوالين لجيوبي ..... مش مصدق
مش راح افكر ابقى سعودي ....
ولا يوم هخرج بره حدودي ....
لا تقولي يورو ودولار ..... الجنيه
ولا عايز ريالات ودينار ..... الجنيه
مهما هيغرق او يتمزق هو الفرود هو الواد
م المرتب زاد يا اولاد المرتب زاد

وانتي يا سوسو يللي خطبتك من خمسين شهر واسبوع
مامتك مش هتقول يا خبتك سيبي الواد ابو جيب مقطوع
الشق هجيبها على النيل ..... نيل .. نيل
وهجيبلك خط ف موبينيل .... نيل .... نيل
ونصيف في باريس ونشتي ف بوركينا فاسو يا سعاد
ما المرتب زاد يا ولاد المرتب زاد

وانا راح اسدد كل ديوني ويمكن اساهم في ديون مصر
واسعد كل اللي يصحبوني واعزمهم عندي في القصر
واعمل بارتي على البيسييييييم ...... سيم سيم
وف صحتكو عصير برسييييييييم ...... سيم سيم
اشربوا ياما هتشربوا تاني
اتزحلقوا دا بلاطي قشاني
اوعاك تحرن او يوم ترفس لتلاقي نفسك متقرفص
جوه غريب اللي ف بغداد
المرتب زاد يا ولاد المرتب زاد

يا مرتب يا ابن ألمبوحة
دي زيادتك صبحت مفضوحة
يا مرتب تسمحلي أقولك المتغطي بيك عريان
بعد 11 سنة يا مرتب من تعييني افضل غلبان
ولاعتي خلاص مش هملاها م البنزين غلوه سبعين
حتى الجواميس قالت ليهم لازم لبني يزيد خمسين
والسكر قالك يشمعنى زودته ... هديله العين

كادر ونيلة ايه يا منيل
دا والله مرتب عيل
دي خسارة فيك الكشوفات
على ايه عاملينلك ادارات
خليت شكلي زي ولية .... والله لهدي دروس خصوصية
اوعو حد يقف قدامي .... دا انت خليت غيري حرامي
مش راح نحرق تاني المبي ..
هحرقك انت يا حارق قلبي
وهزفك زفة ليقالك
كل الناس جارية وجيالك
تاخد جنبك آخر صورة وتقولك غنوة مشهورة

يا مرتب يا ابن المبوحة دي زيادتك صبحت مفضوحة
ابكي عليه وقولي .. دا كان ميجيبش البوري
ابكي عليه وشلشلي دا خلا لبسي بهدلي
ابكي عليه و بس دا كمان ميجبش العدس
يا مرتب يا ابن ألمبوحة