الامبراطورية الاقتصادية للجيش المصرى

[أ/رضا عطيه]

المشاركة الأصلية كتبت بواسطة محمد محمود بدر

بما ان الموضوع به هذا الحوار والجدل ، فاسمحوا لي فى التالى

احنا ما عندناش مشكلة مع الجيش، الجيش ده قوامه من الشعب، انت واخوك وابن عمك، ناس بيقضوا وقت في خدمة، وناس ظروفهم - في بعض الحالات احسن - بيدخلوا الجيش ضباط، هربا من سوق العمل الصعب، فبيتغطوا بالجيش وخدماته وشققه واقساطه الميسرة ومستشفياته ومروره من غدر الزمن في دولة هتتفرم فيها لو تعبت ولا عييت وانت معاكش تمن العلاج وزيادة. كل ده تمام ومفهوم ومقبول.

والرجالة الابطال اللي على خط النار في سينا وعلى الحدود الغربية على راس اي مصري بيحب البلد دي ودا مش محل نقاش او جدل!


احنا مشكلتنا مع البهوات، الجنرالات محدودي الكفاءة اللي كل واحد فيهم بيعمل ملايين كل سنة من دم وشقا وعمر شباب البلد دي، وفي الاخر بيزايدوا على شباب مش لاقي نصف فرصة وبيتهموا بالخيانة علشان بيطالب على استحياء بانه يعرف ميزانية المؤسسة دي بتروح فين ولا عايز يطلع كام واحد مظلايم من السجن خدوا احكام في ساعتين زمن ومن غير لا مرافعة ولا محامي.

احنا مشكلتنا مع رئيس الهيئة والمحافظ ووكيل الوزارة اللي لا يمتلك اي مهارة خارج الميري وقاعد بيخرب في الدولة اداريا وماليا من عشرات السنين.

احنا مشكلتنا مع صفقة الطيارات اللي انت جبتها على حساب الجيش للجنرالات ومش راضي تقول الحقيقة.

احنا مشكلتنا مع بدل الولاء والجنيهات الدهب والاهرام الدهب اللي بتتدفع من ميزانيات الكتايب وتروح لقادة الكتائب التانية زي نظام الجمعية بتاعة الافراح.

احنا مشكلتنا في شركات اللواءات اللي واكلة البلد. من اول قرايب مميش اللي واخد السوفلدي لحد العميد اللي بياخد مقاولات 2 كيلو في مشروع متواضع... عشرات الشركات أصحابها لواءات بياخدوا مشاريع الجيش بالامر المباشر وكأنها حق مكتسب.

احنا مشكلتنا في الاربعين عسكري اللي في خدمة فرد واحد، والاربعين التانيين المجندين في مكتبه وهم وسايط وقاعدين في بيوتهم.

احنا مشكلتنا في اللواء طاهر وعبد العاطي وجهاز الكفتة، اللي تلاعبوا باحلام الشعب واعلامك خون كل من قال كلمة حق، وفي الاخر نقلت اللواء طاهر وخرجته معاش، زي لما يكون مالوش حق الشعب يشوفكوا بتتحسبوا! هتقول لي ماينفعش القيادة في الجيش تتحاسب علشان ثقة الجنود هقول لك ما علشان كده بنقول لكم خليكم في اللي انتم بتجيدوه. وصدقني لو كنت حاسبت طاهر وعبد العاطي كفتة قصاد الناس، كان زمانك كسبت احترامهم بدل من سخريتهم.

احنا مشكلتنا مع دخول الجيش في كل المجالات الاقتصادية وهو مفيش مراقبة عليه من اي نوع. بلاش علشان الفساد يا سيدي، خليني اتطمن انك ماشي صح ومش بتؤذي الاقتصاد.

احنا مشكلتنا مع تسرب الفساد لأهم مؤسسة في البلد بشكل اوسع في ظل زيادة الاحتكاك مع السوق وزيادة سلطة البدلة العسكرية.

تخيل لما الناس بتجبر عيالهم يدخلوا جيش وفنية وبحرية حتى لو كانوا جايبين مجاميع عالية لانهم شايفين القوات المسلحة فرصة لحياة رغدة زي شركات البترول... بقى ده مش شئ يكسف لما اللي حامل لواء الدفاع عن البلد يبقى بيميز نفسه بنفسه... لو قابل ده يبقى بجد ميزان عدالتك مختل!

يا أخي احنا بعد ده كله عمرنا ما اتهمناك في وطنيتك ولا خوناكم، وانتم مفيش على لسانك غير معايرة البلد بما تقوموا به من مهام هي أصلا واجبكم، وفاكرين نفسكم اكتر مننا وطنية... يا عم شوف الشعب معاك شوية بدل ما هيقوموا يولعوا في البلد باللي فيها!



منقول

مع أنه كلام منقول لكنه مطعم بالسم الهارى فى باطن كل سطوره وحروفه


ولا انت شايف غير كدا ؟