حكاية الجنيه والدولار

[محمد محمود بدر]

هى ايه حكاية الدولار؟ وليه قرار خفض قيمة الجنيه؟ وهل صح ولا غلط؟ وايه نتائجه؟


هى ايه مشكلة الدولار؟

مشكلة الدولار ان مصر بتستورد بـ 60 مليار دولار فى السنة، يعنى فاتورة الاستيراد الشهرية 5 مليار دولار.

مصر معاها كام؟

16.5 مليار دولار احتياطى اجنبى (يعنى يكفى استيراد 3 شهور).

فين الأزمة؟

ان مواردنا من النقد الأجنبى مش قادرة تغطى فاتورة الاستيراد، يعنى مفيش دولار فى البنوك، وبالتالى بيلجأ المستوردون للسوق السوداء لشراء الدولار. زيادة الطلب على الدولار فى السوق السوداء رفع سعره لحد ما وصل 13 جنيه فى حين ان سعره الرسمى 7.83.

ليه فى مشكلة فى موارد الدولار؟

خد عندك (البيانات التالية هى أرقام العام المالى 2015)....

السياحة: بتدخل حوالى 7.5 مليار دولار سنوياً، السنة دى مش هتكمل 5 مليار على بعض بعد سقوط الطيارة الروسية، قتـل السياح المكسيكين بالخطأ، مقتـل الطالب الايطالى والارهاب فى سيناء

قناة السويس: بتدخل 5 مليار دولار سنوياً، هتقل لان من ناحية فى ركود عالمى فالتجارة العالمية بتقل ومن ناحية تانية انخفاض اسعار البترول العالمية خلت ناقلات البترول تستخدم طريق رأس الرجاء الصالح مع انه أطول بس عشان ارخص عشان يعوضوا جزء من خسايرهم.

الاستثمارات الأجنبية: بتدخل 6.4 مليار دولار، مشكلة المستثمر الأجنبى انه مش هيدخل فى بلد عملتها ليها سعرين. مثال: لو انا مستثمر داخل بمليون دولار وحولتهم جنيه على سعر نقول 7 عشان اشتغل فى مصر يعنى داخل ومعايا 7 مليون جنيه، اشتغلت وكسبت 20% يعنى بقى معايا 8.4 مليون جنيه بحالهم، حبيت أخرج لقيت مفيش دولار او الدولار بقى بـ 9 جنيه، يعنى هاخرج بـ 933 الف دولار بعد ما كنت داخل بمليون يعنى خسران.

التصدير: بنصدر بـ 22 مليار فى السنة (خللى بالك وبنستورد بـ 60) منهم حوالى 8 مليار صادرات بترولية. طب ده سعر البترول بيقل؟

يبقى طبعاً عوائد الصادرات البترولية هتقل. طب لو سعر البترول العالمى زاد؟ برضه عوائد صادرات البترول هتقل لان الابار بتاعتنا نشفت ومحتاجين ننقب عن ونحفر ابار جديدة لكن امكانياتنا ما تسمحلناش وبالتالى محتاج مستثمر أجنبى يدخل ينقبلك لكن مش هيدخل عشان النقطة اللى لسة قايلنها ونفضل دايرين فى نفس الحلقة المفرغة (مع العلم ان مصر واحدة من الدول صاحبة اقل التكاليف فى انتاج برميل البترول بيقف بـ 10 دولار، تكلفته فى السعودية 12 دولار بالمناسبة) طب والصادرات غير البترولية؟ مش عارفين يصدروا عشان مش لاقيين الدولار اللى يشتروا بيه السلع الوسيطة المستخدمة فى الانتاج (ودوخينى يا لمونة) بالاضافة ان أهم الأسواق اللى بتستورد مننا هى ليبيا وسوريا واليمن وطبعاً المشاكل الأمنية اللى عندهم معطلة صادراتنا.


عوائد المصرين العاملين بالخارج: 20 مليار دولار طبعاً هتقل لان مفيش حد هيرجع بدولاراته يغيرها فى البنك بـ 8.88 والصرافة على أول الشارع هتشتريه منه بـ13 .

الدعم الخليجى: بعد ما دول الخليج دعمت مصر بـ 12.5 مليار دولار فى صورة منح بعد 30 يونيو 2013، مش هييجى دلوقتى انغام ومنير يغنوا لهم فدول يقولوا "يا هلا والله" ويجيبوا زكايب الدولارات ويحدفوها فى حجرنا. انخفاض أسعار البترول العالمية دخلتهم هما نفسهم فى أزمات اقتصادية وبدأوا فى تطبيق سياسات تقشفية (السعودية على سبيل المثال لأول مرة فى التاريخ تحقق عجز موازنة 95 مليار دولار فى 2015 نتيجة تمثيل عوائد البترول لـ 80% من ايراداتها). اخرهم هيدخلوا لك استثمارات عشان يستفيدوا هما كمان.



يتبع