دفعة ثانوية عامة 2016

[Mohamed_Hamza]

المشاركة الأصلية كتبت بواسطة islam977

الناس اللي كانت فتالتة السنة اللي فاتت
كنتوا بتجهزوا لموضوع تعبير العربي ازاي؟؟

مش محتاج تجهيز ولا حاجة
بس حاول تكتب موضوعين تلاتة كدا من دلوقتي لحد الامتحان عشان تدرب نفسك ع الكتابة بس، مش تتدرب لاول مرة في ورقة الامتحان يعني.
والوظيفي هات الرسالة ليلة الامتحان او لو عندك الاضواء او اي كتاب مراجعك هتلاقي فيه نماذج على كل حاجة منهم بردو اكتبهم بنفسك مرة..
وشوف مواضيع التعبير المتوقعة واحفظلها كام استشهاد عشان تكتبهم لو جه موضوع منهم... الرسالة ليلة الامتحان كان عامل كدا السنة اللي فاتت، كان جايب استشهادات للمواضيع المتوقعة..
اما اثناء الامتحان اي حاجة تيجي فبالك اكتبها، ولازم تنام بدري ليلة الامتحان عشان تعرف تكتب لو نمت متأخر او طبقت مش هتلاقي فدماغك حاجة تكتبها مش تعرف تكمل سطرين على بعض.
-شوف الموضوع اللي هتعرف تألف فيه اكتر واختاره
-اكتب في اول صفحة التعبير الوظيفي وافكار التعبير الابداعي.
-ال3 صفحات اللي بعدها اكتب فيهم الموضوع.
-اكتب من 7 افكار كدا وانت طالع... لحد 11 فكرة مثلا (ماتزودش اوي عشان تلاقي وقت تكتب في الافكار اللي انت كاتبها دي كلها).
-ماتسبش سطر، بس سيب سطر بين كل فكرة (فقرة) والتانية
-في اول كل فقرة سيب حوالي 1سم (او مكان كلمة)، واكتب حوالي 6 سطور كدا في الفقرة وانهي الفقرة في نص السطر احسن.
-اياك تشطب
-اياك تعمل حاجة تستدعي الشطب، يعني مش تزنق نفسك في كلمات صعبة سواء صعبة في قواعد الاملاء او النحو.
-فكر بردو في الجملة اللي هتكتبها على بعضها عشان مش تشطب.
-لو لا قدر الله اضطريت تشطب كفاية خط واحد ع الكلمة الغلط وبس، بس حاول ماتشطبش يعني عشان المصحح اكيد بيشوف شكل الموضوع اول حاجة فلما يشوف الشطب هينقصك.
-التصحيح بالشبر
-اي استشهاد اكتبه في سطر لوحده مش جمب الكلام العادي، بس السطر اللي قبل الاستشهاد دا لازم يكون آخره النقطتين دول : عشان قبلهم فعل قول.
-متنساش علامات الترقيم، بس اوعى تبدأ اي سطر بعلامة ترقيم.. مش مكانها خالص.
-ابدأ الامتحان بالتعبير الوظيفي وافكار الموضوع الابداعي، وبعدين باقي الفروع، وسيب كتابة موضوع التعبير للاخر... عشان وانت بتحل باقي الفروع هيجيلك افكار لموضوع التعبير او هيجي على بالك كلام في الموضوع سجله وارجع تاني لحل باقي الفروع.. في الاخر هتلاقي عندك حاجات كتير تكتبها... وبردو لو انت سايب سؤال مش فاكر اجابته في باقي الفروع، وانت بتعمل الموضوع ممكن تفتكر اجابته فتروح تكتبها... فلو بدأت بالتعبير مش هتعرف تعمل حاجة من دول.
اهم حاجة وانت داخل الامتحان تحط فدماغك انك داخل تقفل، وان الموضوع اللي هيجيلك هيكون سهل وهتعرف تكتب فيه، اي حاجة هتستصعبها هتلاقيها صعبة فعلا.
تاني اهم حاجة، يكون معاك ساعة وانت بتمتحن، وتكون محدد وقت لكل سؤال دي احسن حاجة كنت بعملها صراحة وانقذتني فامتحانات كتير، يعني مثلا تقول التعبير الوظيفي دا ربع ساعة: من 9:00 ل 9:15 سؤال القراءة والقصة كل واحد فيهم ربع ساعة بردو من كذا ل كذا. وهكذا، عشان الوقت مايسرقكش وتلاقي نفسك مكتبتش حاجة في التعبير فالاخر.. فخد بالك احسنلك اعمل كدا.