متعة إضاعة الوقت

[BaNZeR]

فكرت ملياً .. في عنوان الموضوع الذي سيخطه قلمي من جديد

وقررت أخيراً أن يكون موضوعي عن "متعة إضاعة الوقت"

نعم
فقبل أن أتخذ قراري بالرحيل والاختفاء
كنت أحد أكبر من يضيعون وقتهم هنا بهذه البوابة
وهو ما كان نتاج فراغاً كبير لم يكن هناك ما يشغره
وهو حال أغلبية من كانوا ومن يزالون يترددون هنا

الوقت مصيره حيضيع ... بس حد فينا بيفكر حيضيعه في ايه ؟؟

سبل إضاعة الوقت كتيرة جداً ...
أبسطها إنك تبقى قاعد بتقلب في الصفحات
عمال بتقلب بتقلب .. مش عارف انت بتدور على ايه
بس انت بتدور وخلاص

طب يعني انت عايز تتكلم عن ايه ؟؟

انا يا سيدي عايز اتكلم عن مفهوم
"التطوع"
اه
التطوع أنواعه كتيرة جداً

بس خلينا نتكلم دلوقتي عن وجودنا احنا هنا
كل واحد فينا هنا موجود بيضيع وقت
هل احنا بنضيعه صح ؟

كل عضو او مشرف موجود هنا دلوقتي يسأل نفسه
هو انا بعمل هنا ايه ؟
هل بس بضيع وقت فاضي عندي ؟
هل بس مقضيها ما بين أقسام الكورة والاهداءات والرسايل الخاصة ؟

ولا هدفي اكبر من كدا ؟
مش عيب إني اسأل نفسي ده
عادي ... انا كنت واحد من الناس موجود بس بيضيع وقته هنا
حتى ولو كنت بفيد الناس
مجرد إني حبيت المكان وحبيت الناس اللى فيه
بس ليه مبتديش اراجع نفسي وأخد نية جديدة بوجودي هنا ؟
أه
أخد نية إني حتطوع بوجودي هنا ... ومش لازم ابقى مشرف عشان اعمل ده

اتطوع بإنك تنقلنا معلومة مفيدة .. موضوع جديد
ضيفلنا خبرة جديدة
علمنا مما علمت شيئاً
سواء كنت مدرس او ديزاينر او حتى بتعزف بيانو
وجودك كمشرف او اداري ف المنتدى
ده من أسمى أنواع التطوع عالسوشيال ميديا
اللى يحتاجني حساعده واللى اعرفه حوصله

خد نية .. النية لوحدها بأجر

بس طبعاً ... كل شيء بمقدار

حياتنا الواقعية لسه ليها علينا فروض كتير لازم نوفيها

يمكن المنتدى بالنسبالي كان نقطة تحول كبيرة ف حياتي
اتعلمت فيه ابسط أنواع المسؤولية .. اتعلمت اختبر شخصيتي مع الناس
اتعلمت فيه الديزاين وابتديت انفتح عالسياسة
عرفت ناس يعتبروا الآن من اقرب الناس ليا عالسوشيال ميديا
واللى كان نواة دخولي بشكل أعمق لعالم "التطوع"
واللى لسه حيكونلها - بإذن الله - موضوع مستقل لاحقاً
وإنك ازاي فعلاً .. تعرف تضيع وقتك صح

ياترى بقى ... إنت كنت جاي هنا ليه ؟
وخدت النية ولا لسه ؟