نصايح مهمة جدا هتفيدك لو عاوز تدخل طب ^_^

[!! Dark Man !!]

البداية السلام عليكم ..

• انا عاوز اؤكد ليكم ان بأمكان اي حد انه يدخل طب باقل مجهود .. كل اللي مطلوب منك انك تذاكر اول بأول ومتفوتش حاجة منك ..

• التفوق في الثانوية العامة معتمد بشكل كبير علي المعنويات .. ولازم تشجع نفسك باستمرار وفكك من اللي يقلك انا مش بذاكر .. لان الكلام ده هيخليك متفتحش كتاب وهيحبطك اكثر ..

• اكتب كلام علي الحيطة واكتب جمل محفظة زي مثلا كلية الطب .. بحيث اول ما تشوفها تلاقي نفسك بتذاكر
  

• خلي يوم الجمعة من كل اسبوع بدل ما تتفسح فيه مع صحابك .. حاول ترجع اللي الكلاام اللي اخذته الاسبوع اللي فات

انتوا عليكم 7 موااد .. لازم تذاكركهم كلهم ومتسبش اي حاجة عليك

العربي ... اصعب حاجتين فيه هما البلاغة والنحو
ودول حلهم سهل جدا .. النحوو محتاجة فهم .. هات قطع النحو في امتحانات الثانوية العامة باجاباتها النموذجية وحلها كلها .. وبعد ما تخلص حل راجعها من الاجابات .. ونفس الكلام مع البلاغة .. هات قطع البلاغة ف السنين اللي فاتت واتمرن عليها
..
بالنسبة للقراءة والقصة .. اقريء الدرس الاول وبعدين حاول تشرحه لنفسك .. وبعد كده هات ورقة وقلم وسمع الدرس .. وقسمه لعناونين فرعية .. وحاول تفصص كل عناوين الي عناونين اصغر .. واحفظ الدرس كله وفكك من الاسئلة بتاعت المدرسين

.................................


الانجليزي .. حل كتيييييييييييييييييييييييير .. انا شخصيا كنت بحل من 7 كتب .. والامتحان كان صعب .. والحل الكتير ساعدني اني مكنش عندي ولا غلطة الحمد لله .. وقبل ما تحل حاول تجيب اجابات نموذجية للكتب اللي هتحلها وقارنها باجابتك

.....
الفيزياء وهي عندك كهربية وحديثة
الكهربية بنسبة 90 % معتدمة علي الفهم ... وهات كتاب الامتحان والماسي والوسام .. وحل اكبر قدر من الاسئلة واتمرن علي الاسئلة الصعبة .. وهتلاقي نفسك تمام .. وبرده حاول تشرح لنفسك الدرس بورقة وقلم .. تخيل نفسك انت المدرس ..
الحديثة ده كلها حفظ .. وبعد ما تخلص حفظ .. حل علي طول عشان تثبت المعلومة
....


الاحياء .. وده مادة ممتعة جدا .. محتاجة حفظ طبعا .. ولازم تعيد الحفظ من وقت للتاني عشان تثبت المعلومة لانها بتطيرررر بسرعة رهيبة وحل كل الاسئلة اللي عندك عشان تثبت المعلومة اكثر


.....
الكيمياء وده اسهل مادة .. معتمدة بشكل كبير علي الحفظ ... بس اول باب عليكم محتاج فهم .. وحل المسائل اللي فيها

...
الجيولوجيا .. الحفظ ثم الحفظ ثم الحفظ
واحفظ بورقة وقلم .. وسمع لنفسك شفوي

...
الفرنساوي .. ركز علي القواعد .. والكلمات مش هتفيدك كتير ..

....
والاهم من كل ده .. خلي كل مذاكرتك من كتاب المدرسة وبس .. وفكك من الملازم خالص لانها هتوديك ف داهية

ولو احتجتم اي مساعدة انا تحت امركم
ولو في اي مشاكل في المذاكرة ممكن تبعتلولي رسايل وشكرا