|
||||||
| اجتماعيات طالب منتدى خاص بالطلاب لتبادل المعارف والحلول للمشكلات التعليمية والمسابقات والألغاز الهادفة |
|
|
أدوات الموضوع | انواع عرض الموضوع |
|
#1
09-08-2014, 08:30 PM
|
|||
|
|||
دفعة 2015 ... اليكم تجربتي
السلام عليكم ورحمة الله وبركاته
ازيكوا يا ابطال الثانوية 0 عاملين ايه ربنا يعينكوا وتحققوا اللي نفسكو فيه السنادي ان شاء الله حبيت اكتبلكوا موضوع عن تجربتي انا واختي التؤام في الثانوية العامة 2014 انا الحمد لله بفضل ربنا جبت و99.51واختي جابت 98.78 واتقبلنا في طب المنصورة ............ اهم حاجة في الثانوية العامةتكون علاقتكو بربنا كويسة ومتفوتوش فرض ولا تاخروه ويا ريت نتوب لربنا توبة نصوحة عن كل ذنب كنا بنعمله قبل كده بنية ان ربنا يوفقنا في الدنيا والاخرة خليكو مع ربنا علي طول مهما يحصلكوا قربولوا واشكولوا هترتاحوا جداااااااااااااااااااااا ......... فيه دعاء جميل كنت بدعي بيه دايما والحمد لله ربنا استجاب لدعايا يا ريت كلكوا تدعوا ربنا بيه اللهم إني أسالك بأن لك الحمد لا إله إلا أنت المنان بديع السموات والأرض يا ذا الجلال والإكرام يا حي يا قيوم اللهم أشهد أنك أنت الله لا إلهإلا أنت الأحد الصمد الذي لم يلد ولم يولد ولم يكن له كفؤا أحد,, اللهم اني اسالك .....+ اللي هتدعوا بيه ........... النصايح دي خلاصة تجربتي انا واختي ..... وللأمانة اختي اللي كتبتها بعنوان كيف تصبح دحيحا في 40 يوم >>>>> دحيح بمعني متفوق أولا الاستعداد النفسي : اولا عاوازاك تتخيل نفسك وانت في الكلية المحترمة الى بتحلم بيها عاوزاك تتخيل كل حاجة حلوة ممكن تحصلك فيها ازرع جوا نفسك انك قدها وقدود ناس كتييير تقولك ياعم احنا ايه الى هيوصلنا للناس الدحيحة دي دول مووس وبياكلوا الكتب اكل وليه ناكلها لما ممكن نذاكرها بصوا سيبيوكوا من الكام ده والى يقولك الكلام ده اعرف انه عاوزك تفضل تحت وماتنجحش ابعد عنه نهائي عشان ده كلام لا بيودي ولا يجيب حطها ببساطة الناس الى انت شايفها اوائل الدفعة او الزبدة بتاعت الدفعه وتترعب لما تشوفهم وتخاف وتقول انا عمرى ماهجيبها دول الثانوية اتعملت عشانهم بس انت زيك زيهم على فكرة o_O مستغرب ليه مش انتوا كلكوا سواسية انتوا كلكوا داخلين 3 ثانوي ومحدش له افضلية على حد دلوقتى انت وهو الفرق بينكم هو ورقة الامتحان كلكوا دلوقتى اوائل الدفعه ومفيش تمييز دول بشر والله مش كائنات فضائية جاية من المريخ دول ناس عادية جدا بس الفكرة في انهم عرفوا الطريق الصح للمذاكرة والتفوق ومشيوا عليه مش اكتر واحنا هندلك عليه بامر ربك تمام اتفقنا اننا كلنا واحد محدش يقلل من قيمة نفسه لان لو انت اتعاملت مع نفسك كده هتلاقي المدرس بيعاملك كده برده هتلاقي زمايلك بيعاملوك كده برده انت مراية للى جواك ديما خلى صورتك احلى واحسن ومش من فراغ لا ده من تعب وكفاح نتفق تانى اتفاق الصعب سهل بالكفاح متقولش الدرس ده رخم م مش فاهمه هسيبه انا كده فاشل مش فاهم حاجة متقولش مادة صعبه وهتضيعني لا قول مادة سهلة بس عايزة مجهود ابني جواك حلمك بايديك هات ورقة كبيرة واكتب عليها عبارات تشجيعية اكتب مثلا صدق نفسك تتصدق انت السر والمبدا مفيش مستحيل بإذن الله هجيب مجموع خش خدلك دش كلية. ...... جايالك ياغالية وليا فوق الالف حلم حلم اعمل فيسات بتضحك في كل مكان وعلقها على الحيطة هيئ لنفسك الجو المناسب درس مفهمتوش ايه يعني قدامك السنة كلها تقراه تانى وتفهمه تانى ودور على شرح له في كل مكان لخصه بنفسك ابتكر اى طريقة عشان تذاكرها وتحفظها في دماغك ماما وبابا واخواتك ليهم دور برده اوعى تزعل ماما وبابا عشان دعواتهم متقفش وربك يرضى عليك ديما لو انت قلقان او مدايق روحلهم وخد رايهم احكيلهم مشاكلك وحسسهم انهم اصحاب مشورة وخد رايهم في كل حاجة ومتقولش مالهمش في الطحين لا والله دايما بيبقوا على صواب ولو ليكوا اخوات امبر منموا برده خليهم دايما متابعينكوا ويشجعوكوا اعرف ان الى بيجي بسهولة بيروح بسهولة يعني الثانوي عاوزاك تتعب عشان تحقق حلمك الى ناوى يقضيها مايكملش قراءة عشان لانه محطش هدفه قصاد عنيه وسعى ليه لا ده خد طريق الكسل والراحة فاحنا هنتعب بس واحنا فرحانين وراضيين هنتعب عشان نرتاح بعدها همة وعزيمة واراده على قهر الصعاب حمان متنسةش علاقتكوا مع ربنا اوعوا تفرطوا في صلاتكوا دي همزة الوصل مع ربكوا هتدعيه انه يوفقك ازاى وانت ناسيه من حياتك متقولش انا مكنتش بصلي ودلوقتى بصلي عشان يوفقنى وكده ماينفعش احب اقولك انه مش عيب تقرب لربك وانت في حاجة اليه وتدعيه لكن العيب هو انك تبطل وتبعد بعد ما ربك يفك كربك تمام يعني هنبدا ننتظم في صلاتنا وندعيى في التراويح كتييييير اوى ها بقى استعديتوا نفسيا لرحلتنا مع الثانوي ؟! استعينوا بالله .......... المدرسين والدروس بلاش اختلاط كتيير بزمايلك عن الدروس والمدرسين و رفاق الكفاح زمايلكوا لان بطبيعه الحال كلكوا حاليا عمالين تحجزوا دروس بقى وكلام نعناع احنا عندنا 7 مواد سواء بقى علوم او رياضة او ادبي اولا نتفق على مبدا ... ..ممنوع الدبل في الدروس اوعوا بجد تاخدوا درسين في مادة طيب انت محتار بين اتنين والاتنين شاطرين هقولك جرب ده وجرب ده بس كله اول شهر وبعدها لازم تحدد ازاى؟! هتمسك كل مدرس بعد 3 او 4 حصص وتمسك ورقة وقلم وتكتب مميزات كل واحد وعيوبه بكل الصدق وبعدها هتحدد مين الافضل الي مميزاته تزيد عن عيوبه وتستقر على واحد طيب الدروس انظمها ازاى ؟؟ اضغطها كلها في يومين ولا لا ؟ بص الافضل انك تنظمها على الايام يعني ماتضغطوش الدروس كفاية اوى اوى 3 دروس في اليوم اكتر من كده استهبال بنت عم اجلال عشان احنا مفيش يوم ان شاء الله هيعدي من غير مانزاكر اتفقنا ؟! حط مادة علمى مع حفظ نوع يعني مثلا خلى يوم فيه عربي واحياء فيزيا وانجليزي فرنساوي وكميا وكده بقى هنسيب يوم في الاسبوع فاضي خالص عشان نلم فيه كل الاسبوع ولو عندنا امتحانات نجهز لها وعادة بيبقى الجمعه طيب المدرسين لازم يكونوا وراك اول باول امتحانات مستمرة طول السنة عشان متنساش والله بقى لو امتحانات مفاجئة نيهاهاهاهاها مينفعش تاخد عند مدرس شاطر ومش بيراجع لا مهمة المراجعة ومهم ان المدرس يكون عارف نقاط اللعب في المنهج وله خببرة وتكون واثق ف مدرسك ومتغيرش بعد 3 شهور ))))زمايل الكفاح((((0 بص بقى من الاخر الثانوية االعامة عاوزة انعزال عن زمايلك زمايللك ابعد عنهم لانهم بجد افة الدروس هى لقاء الناس الى من سنك ويجي فلان يشكر في المدرس العلانى الى بياخد عنده ويعملك البحر طحيينه وفي الاخر تلاقيه داير زى النحلة على مدرس تانى وهتلاقي بقى نوعية من بتوع احنا ماذكرناش ماعملناش مااكلناش وهكذا احباط في احباط عشان كده ابعد على قد ماتقدر من البيت للدرس ومن الدرس للبيت سلامات من بعيد وماتخشش في حوار الاساتذة ياجماعه والله العظيم الصحاب دول اكتر ناس بتضيع بجد ايه ييعني ابقى منعزل عن الناس سنة وبعدين ارجعلهم بلقب دكتور او مهندس او اعلامى اعرف ناس والله ماضيعها الا الصحبة السوء الافضل تاخد دروس في بيتك لو تقدر مش هتقدر خليها مجموعه صغننه اربعة مثلا ولازم التلاتة دول يختاروا بدقة مش شرط يبقوا شاطرين قد ما لام يكونوا مش من النوع اللى بيحب الضحك والهزار والهيافة وتضييع الوقت يكونوا ناس هادية طب بتاخد في سنتر دي فرصتك يخلص الدرس من هنا وتجرى ع طول عالبيت كلمة والله لو سمعتها من حد ممكن تضيع كل اليوم في التفكير فيها موبايلات بلاش وتلفونات بقى ورغي المشكلة مش انك بتضيع وقت بس لا انت طول اليوم وانت بتذاكر بالك هيبقى مشغول لا تلقائيا بالموقف الي سمعته تماااام ؟؟ الخلاصة درسين في مادة لا لو الضرورة حكمت اوووووووووووووووى يبقى مادة واحدة وبلاش برده مجهودك انت اهم من المردس المدرس يدوب بيحطك على اول الطريق دول حلقتين والباقي علي الجروب ده https://www.facebook.com/groups/1486...8399279019452/ ................... ودول نصايح صغنتتين كده وقت الراحة استغله في حاجة تكسر الملل ومتسحبش منك وقت كتير افضل حاجة ممكن تعملها انك تبعد عن النت خصوصا الفيس بوك لانه مليان متاهات ولو دخلت عليه مش هتقوم وهتضيع وقت كتير استغل النت في فهم حاجات مش فاهمها بس لو عالفيس يبقي بلاش ممكن تدخلوا هنا تعرفوا الحاجات المفيد عالنت https://www.facebook.com/groups/1486...4611669398213/ ممكن تاخد ساعة او اتنين في الأسبوع تتفرج ع التلفزيون او تاخدهم نوم او تقعد مع اهلك تتكلم معاهم النوم 8 ساعات ميزدش عن كده وميقلش عن 6 أيا كان السبب عشان ميضيغش التركيز التزموا بكتاب المدرسة جداااااااااااااااااااااااااااااااا قبل أي كتاب خارجي او مزكرة ليه بقي؟؟؟ لان ببساطة معظم المدرسين اللي بيصححوا بيلتزموا بنموزج الإجابة حرفيا واللي بيبقي من كتاب الوزارة والطالب اللي كاتب بنفس المعني ولكن بصيغة اخري بيبقي معرض انه ينقص يبقي نضمن نفسنا من الأول ونزاكر منه حلو كتييييييييييييييييييييييييير الحل الكتير مفتاح التفوق والتمكن من المادة كل اما هتحل هتزيد ثقتك بنفسك وهتبقي جاهز للامتحان حلو أسئلة الأعوام السابقة 70 في المية من الامتحان منها خليك دايما فاهم المادة قبل ما تحفظها لان الامتحان بيجمع بين الاتنين في الاغلب لما تحس باليأس اوعي تستسلم واوعي تسيب اللي حواليك يملوك احباط ويحسسوك بالعجز <مرة في حصة الاحياء 2 زمايلي في الدرس قالوليلي ان الأستاذ امتحن المجموعات امتحان صعب جداااااااااااااااااا ومحدش عرف يقفله واعلي درجة كانت 21 من 25 ..وخوفوني جدا وطبعا اما الأستاذ جه يمتحننا من كتر الخوف والتوتر اللي كنت فيه جبت 19 من 25 ويومها رجعت محبطة وبعيط لان زمايلي اللي في الدرس جابوا درجات اعلي مني في الامتحان ده > بس طبعا مستسلمتش رجعت يومها ودعيت ربنا يوفقني ومضيعش تعبي ورحت جبت الامتحان وكتبت عليه ( ان شاء الله انت هتكون سبب اني اطلع الأول ) اجتهدت ومبقتش اسمع للي حواليا والحمد لله ربنا كرمني وطلعت الأول علي مدرستي والأول علي ادارتي خلاصة القصة دي ...تفاءل  خلي دايما عندك طموح انك هتحقق اللي بتحلم بيه مهما اتهزمت بعتذر ان كان اسلوبي في الكتابة ملخبط شوية واي سؤال اتفضلوا 
|
| العلامات المرجعية |
«
الموضوع السابق
|
الموضوع التالي
»
العرض الشجري
|
|
جميع الأوقات بتوقيت GMT +2. الساعة الآن 04:17 PM.
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
Copyright ©2000 - 2024, Jelsoft Enterprises Ltd.
