مين قال يوم ان انا هتنازل ؟!!

[أبو العلاء]

مين قال يوم ان انا هتنازل ؟

بعد ما قـتلو أخويا وصحبي

بعد ما أخدو ابني من جنبي

بعد ما سجنو الأطفال زور

بعد ما سحلو بنات وبدور

مين قال يوم ان انا هتنازل ؟!

بعد ما حلفو يمين هيحافظو ع الدستور

بعد ما حشدو الناس ف مظاهرة

لاجل يقولو ده مطلب شعبي

علشان يضحك بيه ع الناس

وقفل أي مظاهرة ضده بالترباس

شوفت بناتنا شايلة زهور

في الأقفاص

مين قال يوم ان انا هتنازل ؟!!

ياللي خرجت اخترت رئيسك

ورضيت يابني خلاص بنصيبك

ليه تلجأ لسلاح العسكر ؟!

قالك راح اخلّيها مدنية

ومليش أي طمع هتشوفوا !!

قال :أنا بَكْره محسوبية

لكن مصلحتي بعدّيها

يبقى ازاي انسى واتنازل ؟

وأشارك يابني ف مهازل

لو حافظ على صوتي ف الأول

واحترم الديمقراطية

لكن قال : مصلحتي تعدّي

والإعلام بيطبّل بلدي

دخّل ابنه مناصب عُليا

والدنيا ف إعلامنا وردي

مع إن الإعلام ده زمان

طلّع عين أولاد الريّس

لمّا ابنه اتقدم لوظيفة

وقعد لمّا يصيبه الدور

يبقى ازاي أنسى واتنازل ؟

أنا مش هسكت ع اللي خان

وهقاطع لعب البهتان

واوعى تقوللي ليه مش نازل ؟

أو توصفني بالإخوان

بعد ما شوفت بعينك كدبه

بعد ما شوفت بعينك لعبه

عاوزه يخدك تاني ف عِبّه

يبقى صراحة انتا بتترازل

حاطط بين الفهم وبينك

مليون عازل