محتار تدخل طب ولا أسنان ولا صيدلة ؟ الجواب عندنا

[medoash]

بسم الله الرحمن الرحيم

مبدئيا مبروك لاى واحد جاب مجموع عالى يدخله كلية قمة بس احب اقولك ان دى بداية المشوار مش نهايته ابدا !

فى ناس كتير زيك جابوا مجاميع عاليه جدا ودخلوا كليات قمة وللاسف بيسقطوا كل سنة وبيشيلوا مواد وفى ناس بتجيب مقبول وناس جيد جدا وناس امتياز مع انهم كلهم كانوا جايبين نفس رنج المجموع فى ثانوية عامه وكانوا من اوائل الطلبة !!

ودا هيودينا لحتة مهمة جدا اولا ان الثانوية مش نهاية المطاف زى ما كانوا بيقولولك فى البيت لكن هيا نقطة الصفر فى بدايه مشوار حياتك المهنية اللى تعبك فيها ومجهودك الذاتى هو الطريق الوحيد لنجاحك اى نعن هتشوف كوسة واولاد دكاترة وظلم بس فى الاخر محدش هينجح فى مهنته غير بمجهوده وثانيا متحاولش ابدا تدخل كلية قمة انت مش حاببها لانك لو مش حاببها هتعانى كتير اوى فيها وممكن تفشل تمام فى دراستك .

________________________________

بصوا بقى يا شباب انا اما كنت فى سنكم كانت نظرتى للكليات زي نظرتكم دلوقتى نظرة قاصرة جدا بحكم صغر السن وبحكم عدم الاحتكاك بالنظام الجامعى وكدا .. يعنى انا اما بفتكر نظرتى وتخيلاتى عن المجمع الطبى عموما وانا فى ثانوى بضحك على نفسى اوى .. يعنى كان بالنسبالى طالب فى طب دى حاجة كبيرة اوى والبالطو الابيض حاجة يعنى بتخيلها فى احلامى وكذلك لقب دكتور .. لكن اما دخلت كلية لقيت الحاجات دى عادية جدا وطالب المجمع الطبى زيه زى اى طالب فى الكون والكليات سواء كانت قمة او مش قمة مش فارقة كتير عن بعضها واللى يفرق هوا مجهودكم الشخصى واحلامكم بس فقط لا غير

عشان كدا عاوزين نبنى رغبتنا فى التنسيق على اساس الحاجات اللى اقولها مش على اساس التخيلات والتفكير اللى ممكن تكتشفوا بعد كدا انه تفكير وتقدير قاصر للامور .
_______________________________
بصوا بقى انت كطالب جايب مجموع عالى وشايف نفسك محتار بين تلت كليات لازم تعرف مزايا وعيوب اى كلية وعلى اساسها هتبدء تحدد

كلية الطب

اولا كلية الطب عبارة عن ست سنين دراسة ثم سنة امتياز وهى عبارة عن سنة عمل بالمستشفيات الجامعية يعنى المجموع سبع سنين .

طبعا تفاصيل المواد لا تهمكم اوى لكن يعنى فى الملخص انت بتدرس مواد اساسية فى الطب زى الهستولوجى والفسيولوجى والبيو والتشريح ثم الباثولوجى والميكرو والفارما ... بعدين بتبدء تدخل فى دراسة راوندات جراحه ورمد وانف واذن وحنجرة ونسا وتوليد وباطنة ... تخصصات يعنى والراوندات دى بتبقى عمى يعنى بتروح الاقسام دى فى المستشفى وبيبقى العيانين هناك وبيتشرحلك تشخيص الامراض المتعلقة بكل قسم .

المميزات :
_ دراستك لجسم الانسان دراسة ممتعه .
_مهنة راقية.
_ مستقبلها المادى كويس جدا وكلما اجتهدت كلما زاد مستواك المهنى والعائد المادى.
العيوب :
_ الدراسة على حجم ما هى ممتعه لكن صعبة وتحتاج مجهود خصوصا فى اخر سنتين.
_ طول اعوام الدراسة وكمان عشان تكون دكتور محترم لازم بعد اما تخلص الامتياز تعمل ماجستير فى تخصص من التخصصات ودا عاوز طبعا واحد عنده استعداد انه يكون عنده حب للمهنة والدراسة عشان يقدر يستحمل السنين دى كلها .

كلية طب الأسنان

الدراسة فى كلية طب الاسنان خمس سنين بالاضافة الى سنة امتياز يعنى المجموع ست سنين .

بالاختلاف عن طب الدراسة فى اسنان بتبقى اسماء السنين " اعدادى .اولى.ثانية.ثالثه.رابعه" ودا فى جامعه اسكندرية واعدادى بتبقى فى كلية علوم وبيتدرس فيها كيميا وفيزيا وحيوان ونبات ولغه كتمهيد لكن النظام دا اتلغى فى معظم جامعات مصر والنظام المعمول به هوا خمس سنين عادى من اولى لخامسة يعنى مفيش حاجة اسمها اعدادى .
الدراسة بعد السنة الاعدادى فى اول سنتين يعنى اولى وتانية بتبقى عباره عن مواد من كلية طب "اللى هيا المواد الاساسية اللى قلناها فوق تبع طب " بس طبعا بتبقى مناهجها اقل فى الكمية ومش بيبقى فى تركيز جامد على العملى بتاعها زى طب . بالاضافة الى مواد تخص تخصص طب الاسنان
ثم اخر سنتين ودول بيبقى فيهم دراسة لتخصصات طب الاسنان بالاضافة الى شغل عملى فى العيادات بتاعت الكلية .

المميزات :
_ دراسة ممتعه ايضا واسهل بالمقارنه مع طب
_ مهنة راقية
_ ايضا مستقبلها المادى كويس جدا جدا
_ قلة عدد سنين الدراسة بالمقارنة مع طب
_لا تحتاج ماجستير لممارسة المهنة بشكل احترافى يعنى ممكن يكفيك البكالريوس فقط .
_ الشغل العملى الفعلى فى العيادات بيبدء اثناء الدراسة .

العيوب :
_ المصاريف اثناء الدراسة مكلفة جدا " الطلبة بيصرفوا على الشغل العملى ثم بيصرفوا مصاريف العلاج بتاع العيانين فى اخر سنتين من جيوبهم " ودى حاجة مكلفة للطلبة .
_ هناك تخصص صعب جدا العمل فيه الا بعمل ماجستير وهوا تخصص تقويم الاسنان كما ان تخصص زراعه الاسنان يحتاج الى كورس يتكلف من خمسة الى عشرة الاف فى المتوسط قبل بدء العمل فيه.
_ تكلفة تجهيز العياده مكلفة " دى فى حال انك اخترت فى بدايه حياتك انك تفتح عيادة ليك لوحدك
مباشرة "

كلية الصيدلة

كلية الصيدلة عبارة عن خمس سنين دراسية وفى اسكندرية واعتقد فى كل جامعات مصر ايضا عبارة عن سنة اعدادى فى علوم واربع سنين اخرى فى صيدلة .
الدراسة فى كلية الصيدلة مختلفة عن طب واسنان شوية لانها بتعتمد بشكل كبير جدا على الكيمياء والنبات يعنى نقدر نقول معظم موادها العصب الاساسى بتاعها هوا الكيميا والطلبة بتدرس فيها الكيمياء العضوية بشكل اساسى والتركيب العضوى الكيميائى للمواد وبتدرس كمان النباتات الطبية كلها والتفاعلات الدوائية .

المميزات :
_ مهنة راقية لكن للامانة اقدر اقول فى مصر انها مهنة راقية الى حد ضعيف نظرا لان الصيادلة مش واخدين حقوقهم بشكل كبير .
_ العائد المادى كويس جدا بس بيحتاج لعدد ساعات من العمل اكثر من طب واسنان نظرا لان معظم الصيادلة دلوقتى مصدر رزقهم من العمل بالساعه فى الصيدليات او العمل كمندوب لشركات الادوية او العمل فى مصانع الادوية والتنوع فى الشغل بتاعها دا كويس بس بيحتاج لمجهود .
_ الدراسة ليست بالصعبة وليست بالسهلة يعنى نقدر نقول الدراسة معقولة .
_ قلة عدد سنين الدراسة .

العيوب :
_ الكلية زى ما قلنا بتعتمد على الكيميا بشكل اساسى ودا ممكن يكون عيب خطير جدا لو انك دخلتها وانت مش بتحب الكيميا لكن لو العكس هتبقى الدراسة ممتعه جدا .
_ العمل فى الصيدلية قد يعتبره البعض تقليلا من قيمة المهنة كما ان العمل كمندوب لاحد شركات الادوية بيخلى الصيدلى يروح للدكاترة ويلف عليهم وممكن بعض الدكاترة تحرجة او تجرحه او تطنشة وممكن يقع فى خطأ شرعى بالاتفاق مع الطبيب على كتابة بعض الادوية بعينها وبالتالى الكثير بيعتبر العمل كمندوب لا يليق بمهنة الصيدلة .
_ زى ما قلنا مهنة الصيدلة مش واخده حقها فى مصر ودى برضه احدى العيوب .

_______________________________________-

فى النهاية بقى نصيحتى وخبرتى كطالب فى السنة النهائية بكلية طب الاسنان جامعه الاسكندرية وطبعا بعد ما تستوعبوا الكلام اللى فوق دا واللى ممكن يكون فيه بعض الاخطاء من نظر زمايلى فى صيدلة وطب .

أولا : الكليات التلاتة الفروق ما بينهم بسيطة متخليش حد يقنعك بحاجة غير كدا .

ثانيا : المستقبل المادى متقارب جدا واللى هيفرق بين طالب وطالب فى الكليات التلاتة او طالب وطالب فى نفس الكلية حاجة واحده بس وهى الاجتهاد الشخصى يعنى اللى هييجى يضحك عليك ويقلك ادخل اسنان كمثال وهتلاقى الفلوس نازلة عليك بعد ما تتخرج كدااااااااب ونفس الكلام بالنسبة لصيدلة وطب " اللى هيفرقك هوا اجتهادك وحبك للمهنة بتاعتك واصرارك على النجاح غير كدا لا "

ثالثا : بالنسبة للبنات انا رؤيتى ان انسب كلية ليهم كلية صيدلة بالكتير اوووووووى اسنان مع انى منصحش بيها بردوا لكن طب للبنت بتضيع عمرها وبتبذل مجهود وفى الاخر بتتجوز وبتشتغل فى المستشفى تقضية واجب ودا مش معناه ان طبعا مفيش بنات هتدخل طب لكن انا بوجه كلامى للبنت اللى مش فارقة معااها اى كلية من التلاتة لكن لو البنت حابة طب اوحابة تخصص معين ومتمسكه بيها خلاص .

بالنسبة للولاد انا شايف افضل خيارين هما طب واسنان ودى ميمنعش انه يدخل صيدلة بردوا عشان محدش من اصحابنا فى صيدلة يزعلوا بس دا تصنيفى على حد اللى شفته .

لو الولد عاوز يبقى دكتور وعنده عياده ومش فارقه معاه التخصص ومش من هواه الدح لسنين طويله يعمل اللى انا عملته ويدخل طب اسنان هيخلص اوام اوام وهيشتغل علاطول من غير
ماجستير لو حب.

لو الولد محتاج تخصص معين فى طب هوا حابه ومستعد يذاكر ست سنين ويعمل ماجستير عشان يبقى دكتور فى تخصص معين يبقى يدخل طب .

لو حابب صيدلة بردوا مفيش مشكله يدخلها .

_________________________________

كدا انتهى الموضوع واتمنى اكون افدتكم واعتذر عن اى تقصير واى حد محتاج استفسار انا فى الخدمة وشكراااااااااااااااااااااااااااااااااااااااا