افكار منقذة (لكل من فاته قطار المذاكرة فى الثانوية العامة) ارجو التثبيت

[222ahmed222]

بسم الله الرحمن الرحيم
في الأغلب الرياضه 2 بتبقى اهم ماده الطالب بيركز عليها عشان فروعها المتعدده وكمان صعوبتها على بعض الناس ناهيك عن انها الماده الأساسيه ال بتأهلك للكليات الهندسيه بمختلف انواعها
معضلة الرياضه اتنين الكبرى تشعبها ..... يعني انك تلاقيها الماده الوحيده ال 6 فروع بخلاف اللغه العربيه طبعاً
ودا ال بيجهد الطالب فيها وهو بيذاكرها انه مش عارف يمشي ف ايه ويذاكر ايه ويذاكره ازاي
طبعاً انا سبقني الباش مهندس حسن وقال بما فيه الكفايه ربنا يجزيه خير
بس انا هعيد التنبيه ببعض النقاط السريعه كدا وربنا يوفقني ف ال هقوله ويوفقكم في مذاكرتكم وامتحاناتكم يارب
...............
الميكانيكا
الميكانيكا تقريباً اهم فرع بالنسبه للطالب او اهم فرعين يعني
خصوصاً انهم هم الاتنين جداد على الطالب مخدهمش قبل كدا
وبرغم كدا الميكانيكا ممكن تحسها صعبه اوي بس تلاقيها اكتر فرع بتجمع فيه درجات ف الامتحان وانت مرتاح
اغلبكم هيقول ازاي ياعم انت شكلك مش فاهم حاجه
هو بعيداً عن امتحان السنه ال فاتت ال كان صعب بس انا بتكلم عن كل سنه
الميكانيكا مفيهاش اختراعات يعني الأفكار بتتكرر هي هي بس بيغير ف الارقام وحاجات بسيطه جداً ف المسائل
يعني مثلاً بدل ما يقولك ان سياره كانت طالعه منحدر بقت نازله من على منحدر
فرقت ف اييييه معاك غير ف الحدود بتاع معادلة الاتزان ؟؟؟
وهتكمل المسأله زي ماهي بالضبط
فالميكانيكا لو حليت فيها 4 امتحانات تقريباً هتبقى لميت كل الأفكار ال موجوده فيها
وأهم شيء تحل الامتحانات الصعبه زي بتاعة السنه ال فاتت وطبعاً طبعاً 2008 الامتحان التوب
طيب الميكانيكا بتتذاكر ازاي؟
هو دا الشيء ال كان تاعبني وانا بكتب المشاركات عن الرياضه سواء رياضه واحد او اتنين
ان السؤال سخيف بصراحه الرياضه بتتذاكر ازاي ؟ :D
ماعرفش بصراحه هي طريقه واحده عند كل الناس
اقرا القوانين واحفظها وافهمها قبل ماتحفظها واقعد حل امتحانات
مفيهاش فكاكه يعني
وقبل ما احل امتحانات اكيد لازم احل امثله على الدرس نفسه ال ذاكرته
وياريت لو قبل ماحل مسائل كمان ذاكرت كام مثال محلول
يعني الخطوات بالضبط
1- فهم ثم حفظ القانون
2- مذاكرة بعض الأمثله المحلوله
3- حل بعض الأمثله والتدرب عليها بالقلم
4 - عند الانتهاء من الفرع كاملاً يتم النقل إلى الإمتحانات وحل بعض الامتحانات والأفضل ان تحل منها قدر استطاعتك
يعني لو قدرت تحل 200 امتحان حل مش هتخسر حاجه بل بالعكس دا بيثبت المعلومات عندك اكتر من المسائل العاديه
وكمان بيديك الثقه ف نفسك إنّك لما تدخل الامتحان تعرف تحله لأنّك حليت زيه واصعب منه قبل كدا مليون مره

طيب لو حبينا نقول المذاكره نفسها تاخد مننا كام وخلوا بالكم يعني ان دا اهم فرع قولنا ف الرياضه
الاستاتيكا الباب الأول والتاني والتالت بسلطاتهم ببابا غنوجهم يوم واحد
لأنّ الباب الأول والتاني اساساً مفيهمش شغل يعتبروا مدخل لعالم الاستاتيكا
واقصد اليوم دا يتعمل فيه ايه ؟؟ اذاكر قوانين واشوف امثله محلوله ع كل باب واحل كام مثال ع كل باب منهم بردو
طيب هحل امتحانات ؟ لأ استنى خليك معايا شويه
الباب الرابع والخامس سوا ياخدوا يوم تاني
ونفس النظام
........................
نيجي للديناميكا
الديناميكا فيها شوية افكار حلوه فمحتاجه تركيز شويه
بس عاوز اقولكم ان احياناً بيجيب قوانين حفظ
يعني يسألك عن تعريف القدره مثلاً ومش عايزها تعريف رياضي لا تعريف كقانون المصطلح بتاعه ف اللغه العربيه يعني
والحاجات دي كلها موجوده عندكم ف الكتب بمختلفها يعني متخافوش
وهي حاجه حلوه منه انه يجيبهالكم بتبقى درجتين مضمونين كدا ف آخر سؤال
الديناميكا البابين الأول والتاني ف يوم نفس نظام الاستاتيكا
والباب التالت والرابع يوم تاني بس دا يوم هيبقى مرهق شويه وهياخد مذاكره كتير بس لازم نستحمل وانا عارف انها غلطتي انا والله عشان اخرت جداً عليكم بس انا متأكد انكم لو عرفتوا ظروفي هتشفقوا عليا والله
المهم كدا خلصنا مذاكرة الفرع ف 4 ايام
نعمل ايييه ؟
هناخد يوم خامس بقى دا نعيش فيه امتحانات على قد مانقدر
نقعد نحل امتحانات ميكانيكا قدر المستطاع والمسأله ال منعرفهاش نشوف حلها ونرجع نذاكر الباب بتاعها بسرعه عشان نتدارك اخطائنا
وطبيعي هتلاقوا حاجات متعرفوهاش بس مع كتر الحل كل دا هيتلاشى بإذن الله