عايز تعرف الطالب المصرى بيكره الدراسة ليه؟

[مريم السباعى.]

عايز تعرف الطالب المصري بيكره المدرسة ليه ؟


- جرب مرة تصحي من النوم الساعة 6 ا...لصبح علشان تبقي في المدرسة الساعه 7 (قلق) .

- جرب تقف في طابور المدرسة ساعه و تبدأ يومك "بالتمارين" اللي ملهاش علاقة "بالرياضة" ، مع أصوات مدرس الألعاب وهو بيقول (واحد إتنين تلاتة أربعة هوب إتنين تلاتة أربعه) طبعا مع تمارين السقفة (ضياع للوقت ) .


- جرب تدخل فصل تلاقي كل أربعة في نفس الكرسي و برضو المدرس يقول اللي قاعدين ورا خايبين (إحباط) .

- جرب تستحمل المدرس وهو بيتفلسف عليك في حصة الدين و يعلمك إن "الإبتسامة صدقة" ولما تضحك في وشه يقولك : إنت أهبل (تناقض) .

- جرب تنسي قلمك يتعوج عليك المدرس أوى و يقولك : ده القلم بنص جنيه لو مش معاك ممكن أسلفك و بعد شوية يسأل "حد معاه قلم أحمر أصحح بيه الواجب؟" (إحراج)

- جرب تنزل "الفسحة " اللي مدتها 10 دقايق متبقاش عارف تعمل ايه في الوقت ده .. تاكل سندوتشاتك .. تشتري من المقصف اللي عليه هجوم .. ولا تدخل الحمام اللي دايما مش نضيف "اصل عمال النضافة مش بيجوا علشان ينضفوا" ولا تشرب من الحنفيات اللي تصميمها نفس تصميم حنفيات البهايم "حفظكم الله" إن وجدت (إهمال) .

- جرب تسمع كلمة "يوم الأحد" إمتحان و تقول للمدرس إن يوم الأحد عندك إمتحانين .. يرد يقولك "عندكم جمعه وسبت ذاكروا فيهم" أصل المذاكرة "عقوبه" مينفعش ترتاح منها حتى يوم أجازتك (ضغط) .

جرب فرحتك بحصة الألعاب ولا الموسيقي وتلاقي المدرس بيقولك "إنزل لم الزبالة من الحوش" (صدمة)

- جرب يبقي عندك أعمال سنه و غصب عنك تستحمل "عدم إحترام المدرس ليك" ولو خرجت عن شعورك و إشتكيت بتاخد "صفر" كبير فيها .. و المدرس يقول أنا عمري ما شفته ولو إنت إعترضت يقولوا لك : يعني المدرس هيكذب ؟ (إفتراء) .

- جرب تروح بيتك الساعه 3 و أحيانا 4 و مطلوب منك تتغدى و تكتب واجب لأكتر من 5 مواد و كمان تذاكر اللي أخدته في المدرسة و تروح الدرس "الخاص" و أهلك يقولولك لازم تنام بدري .. هل يعقل إن إنسان يصحي الساعه 6 صباحا و يعمل كل ده بتركيز بدون اي راحة .. (تشتيت ) .

- جرب تخلص مدرسة و تدخل كلية و تتخرج و متلاقيش شغل . عارف بعد كل الأساليب الغير أدمية دى هيقولوا عليك ( فااااااااااااااااااااااااااااااااااااااااااااشل )