جروب 3 ثانوى ( علمى علوم )

[To Be Is To Do]

بصوا من واحد لسه مخلص ثانويه عامه السنه اللى فاتت والسنادى فى اولى جامعه :
ــــــــــــــــــــــــــــــــــــــــــــــــــ ـــــــــــــــــــــــــ

كل سنه الوزير بيطلع يقول نفس الكلمتين دول حتى لو الوزير بيتغير كل سنه الكلمتين دول مش بيتغيروا " الامتحان مش بيخرج من كتابي المدرسه والامتحان بيقيس الحفظ والفهم وبيمييز بين الضعيف والمتوسط والمتميز وفيه تدرج فى الاسئله و و و و ... "

واحنا كل سنه قبل ما الامتحانات تيجى بشهر كده تظهر بقى الإفتاءات " اصل مدرسى قالى ان الامتحان حييجى صعب .. اصل مش عارف مين من مكتب الوزير وقال ان الامتحان فيه افكار كتير .. اصل المستر اللى باخد معاه على علاقه باللى بيحط الامتحاان اصل اصل اصل اصل ... "

كبرووووووووووووووووووووا من الكلام ده كله الامتحان بييجى سهل للى مزاكر وصعب على اللى مش مزاكر .. خلصت
امتحان 2012 فيزيا ( اللى هو امتحانى ) كانوا بيقولوا انه حييجى دمار وحييجى صعب عشان 2011 كان سهل والمجاميع عاليه و و و و وجهه نظرى ان الامتحاان كان عايز اللى مزاكر فقط مفيهوش لعب حتى ارشميدس اللى الناس اتضايقت منها كانت عايزه واحد فاهم نظرى مش اكتر

راعوا ان الامتحاان بييجى 6 أسأله وانت مطالب ب 5 مفيش مانع انه يجيب مسأله او نقطه نظرى تفكير شويه مفيهاش مشكله منت عندك 5 سهلين ان شاء الله تحلهم ويبقى قدامك الصعب بس ف النقطه دى ولو فكرت بتيجى بسهوله ان شاء الله

امتحان 2008 فيزيا :
ــــــــــــــــــــــــــــــ

كثر عليه الكلام وكل سنه بقى يقولولك ايه ؟ اامتحان السنادى حييجى زى 2008 وشغل الارهاب بقى والتخويف يشتغل ... الامتحان ده كان صعب . ؟ أه كان صعب ... على الكل . ؟ طبعا على الكل وساعتها تنسيق هندسه قل جدا جدا والمجاميع بشكل عام قلت يعنى لو الامتحان سهل يبقى على الكل ولو صعب يبقى على الكل ... وساعتها اصلا هما كانوا منزلين مسائل اولومبياد وقالوا حييجى منها الامتحان ومدرسى كان مدى الاسئله دى للطلبه ساعتها من باب العلم بالشئ يعنى وجه منها بس برده الاغلبيه درجاتها قلت فى الفيزيا

تلخيص الكلام ده كله :
ــــــــــــــــــــــــــــــــــــــــــــــــــ ــــــــــ

اعمل اللى عليك وزاكر واطحن نفسك وتأكد ان الامتحان بييجى سهل وكويس واكيد اى طالب عنده امتحانات ثانويه عامه سابقه ولكل المواد .... افتح وحل بنفسك وشوف مستوى الامتحان ... الامتحان مش بييجى خرافى ولا معقد .. الامتحاان عايز واحد مزاكر وحالل وبس ... زاكرت وحليت مسائل وامتحانات سابقه .. حتدخل تحل كويس جدا ان شاء الله مزاكرتش ولا حليت .. يبقى انت المسئول عن نفسك

** الامتحاان جه سهل يبقى عليك وعلى طلاب الجمهوريه كلها .. الامتحان جه صعب وعقد يبقى عليك وعلى طلاب الثانويه كلها برده
الامتحانات سهله يبقى تنسيق عالى .. الامتحانات صعبه يبقى تنسيق اقل (( علاقه طرديه ))

متسمعش توقعات حد لاى ماده ولا مدرسك حتى .. انت عندك منهج درسته كله مع المستر يبقى تراجعه كله وتحل عليه كله وتريح دماغك وييجى اللى يجيلك لانك مزاكر المنهج كله من الجلده للجلده زى ما بيقولوا انما حتتوقع او حتسمع توقعات حد يبقى ياصابت يا خابت وانت المسئول عن نفسك
مثال بسيط : امتحان 2011 عربى 3 ثانوى .. أقسم بالله سمعت ان فيه مدرسين قطعوا للطلبه بتوعهم نص " سيد قرارك " وقالولهم يا الصغيران يا نظره .. والكلام ده ليله الامتحان وراجعوا المنهج كله ما عدا النص ده ... وراحوا الطلبه تانى يوم لقوه منور فى الورقه واجبارى طبعا لو طالب سمع كلام مدرسه ومزاكرهوش يبقى هو الغلطان زى مدرسه بالظبط لان الامتحان بيجيب اى حاجه ومحدش يعرف دماغ اللى بيحط الامتحان الا هو شخصيا ...

كلمه اخيره :
ــــــــــــــــــــــــــــ

_ زاكر واعمل اللى عليك وسيبها لربنا واعرف ان كل ما اجتهدت كل ما ربنا حيوفقك ويكرمك
_ متسمعش كلام حد ان الامتحان حييجى سهل او حييجى صعب ... اسمع كلام نفسك لما تفتح الامتحانات السابقه وتحلها وتعرف انت مستوى الامتحان بييجى ازاى وتقيمه بنفسك
_ كل سنه هما هما الكمتين اللى بيتقالوا وفى نفس التوقيت برده .. (( اسطوانه محفوظه وبتتردد كل سنه ))

آسف على الإطاله ... ربنا معاكم إن شاء الله .. إللى بيرهب وبيخوف الطلبه (( إتقِ الله ))