داخل ثانوية منازل ومحتاج تساعدونى وتفديونى بخبراتكم

[صابر ادريس]

السلام عليكم ورحمه الله وبركاته

يا شباب انا قدمت ثانويه عامه منازل انا مادخلتش ثانوية قبل كده عشان كده محتاج خبراتكم وبالاخص
عاوز اعرف اكبر كم من المعلومات عن سنه اولى يعنى هناخد مواد ايه وايه المواد الى اخد فيها دروس اروح مراكز ولا اظبط مع مدرسين واخد لوحدى مع العلم ان كنت دبلوم صنايع يعنى الحمد لله ابيض فى الانجليزى والعربى تقريبا شبه نسيته والكيميا والاحياء دول تقريبا هبقى اول مره اشوفهم بالنسبه للرياضه والفيزيا يعنى عندى فكره كويسه عنهم عشان كنت باخدهم فى الدبلوم بس الكلام ده من وقت كبير برضو ياريت يا جماعه تقولولى اعمل ايه وابدأ الدراسه ازاى وهل فى مواد اكتر اذاكرها لوحدى عشان انتم عارفين الظروف انا بشتغل تقريبا اليوم كله ومعنديش غير يوم واحد اجازه بس تقريبا فى كده حوالى 4 او 5 ساعات كل يوم دول اقدر اذاكر فيهم

ياريت الناس تعرفنى على المواد يعنى هاخد ايه التيرم الاول والتيرم الثانى وفى نفس الوقت عاوز نصيحه اللغه التانية اخدها ايه بحيث تكون مناسبه لظروفى وكده
اخر حاجه عاوز اقولهالكم برضو انا الموظف بتاع الشؤون قالى انته هتاخد نفس الى بياخدوه الطلبه وهتمتحن فى نفس الوقت معاهم يعنى كل حاجه زى ماهيه
انا متابع معاكم هنا فى المنتدى على مدار السنه وربنا يوفقنا جميعا