انا جبت 98.4 وناوي علي اسنان بدل البشري ، ايه رأيكم ؟

[د . محمد حسن]

بصي ، دي رسالة ابن خالتي ليا ، بعتهالي ع الفيس من يومين تقريبا ، هو مخلص اسنان هو
وريها للجماعة عندك ف البيت



نفكر بطريقة منطقية شوية
أولاً كلية الطب :


مشكلتها الوحيدة ان دراستها 6 سنين وآخر سنة دي بتبقي سنة ونص بالإضافة لسنة الامتياز
يعني 7 سنين ونص دراسة


وتاني مشكلة فيها انك لازم تعمل ماجيستير على الأقل
عشان تبقى مميز


ثانياً الصيدلة
مستقبلها مش حلو أوي
معظم الناس بيبقى مصيرها حاجة من اتنين

يا اما مندوب مبيعات في شركة أدوبة بيلف على الدكاترة يسوق الأدوية

يا اما بيفتح صيدلية ويوقف حد فيها
بقالة يعني

الا بقى الفلتات
يعني ممكن حظك يبقى حلو وتشتغل في شركة أدوية نضيفة مثلا
وتشارك في تصنيع أدوية


بالنسبة لأسنان بقى
أقولك مميزاتها وعيوبها

مميزاتها انها 5 سنين بس بالاضافة لسنة امتياز
ثانياً اسمك دكتور وبريستيج وحركات

ثالثاً الحمد لله شغلك مضمون سواء تتعين في الكلية لو أوائل أو تبدأ في مستوصف صغير لحد ما ربنا يكرمك وتفتح عيادة
رابعاً المناهج سهلة -نسبياً- بالنسبة لبشري وصيدلة


انا بقول نسبياً ... عشان المناج برضه رخمة في أسنان بس مش زي بشري
يعني مثلاً احنا عندنا مواد من طب بشري بندرسها في اسنان
بس بندرس بطريقة مختصرة جدا ، بندرس اللي يفيدنا في حياتنا وفي تخصصنا ده



خامس ميزة (وأهم ميزة ) ان انا في اسنان وهقدر اساعدك بإذن الله سواء في المذاكرة أو في الشغل العملي
بس لازم تيجي عندنا القصر العيني
العيوب بقى
1- أسنان بصفة عامة مكلفة جداً جداً جداً فوق ما تتخيل خصوصاً آخر سنتين
يعني ممكن تدفعلك في السنة آلافات عشان الأدوات
2- فيه ناس شايفة ان 5 سنين دراسة وسنة امتياز كتير بالنسبة لصيدلة
3- أسنان القصر العيني بقى بصفة خاصة عيبها إنها حكومية ومش كل حاجة الجامعة بتوفرهالك وكراسي الدكاترة بتاعة الشغل قديمة ومتهالكة (بس اليومين دول بدأوا يجددوا العيادات)
لو انت استقريت في الآخر على طب أسنان .. يا ريت تبقى القصر العيني .. لأنك مش هتلاقي دكاترة بالكفاءة دي في أي حتة ... بالإضافة إن عدد المرضي اللي بيييجوا عندنا كل يوم عدد مهوووول الجامعات التانية كلها بتحسدنا عليه وهتشوف كل الحالات المختلفة وتقدر تتعلم صح بإذن الله
آخر حاجة هقولهالك .... صلي صلاة استخارة كذا مرة واستخير ربنا وبعد كده قرر ... وأول ما نتقابل إن شاء الله في مصر أو في فاقوس هشرحلك نظام الدراسة في أسنان بالكامل وكل التفاصيل اللي انت عايز تعرفها
ربنا يهديك للي فيه الخبر إن شاء الله
الخير*