و لما تترقى فينقص مرتبك يبقى أنت أكيد أكيد فى مصر.....و يبقى أنت أكيد مدرس (ملطشة)

[مصطفى محجوب ثابت محمد]

و لما تترقى فينقص مرتبك يبقى أنت أكيد أكيد فى مصر.....و يبقى أنت أكيد مدرس (ملطشة)
مصر بعد الثورة أهانت معلميها أعظم و أكبر اهانة فى تاريخ التعليم فى مصر و ده له أسبابه و أرجوا أن يتسع صدر الجميع و يرد على بالدليل و ليس التضليل :
قبل الثورة عملونا كادر طلع على تحسين حياتنا مش قادر و مع ذلك فرحنا بيه
بعد الثورة شالونا الكادر اللى مش قادر لما ادوا كل الناس 200% على الاساسى الجديد و استثنا العلامة الكبير و الخبير الاقتصادى المصرى العظيم الدكتور سمير رضوان معلمى مصر لأنهم بيخدوا كادر و أقسم بالله أنه ما يعرف غير اسم الكلمة و لا كلف نفسه و قرأ تفاصيل القانون و بعدها لما لقيوا نفسهم أخطئوا و ظلموا المعلم قالوا نوصله ال 200% و لكن على الاساسى القديم لأنهم بيخدوا مكافئة امتحانات و لا يدرون ماذا يحدث لنا فى الامتحانات و الاستراحات اللى بنام فيها على الارض و حصار أهل بعض مدن مصر الشرفاء لنا لا بيع و لا شراء حتى يغش الطلاب على مرآى و مسمع و علم رجال الامن ..........بعدها الكتور محمد مرسى بيدور على موارد يزود بها زملائه من أساتذة الجامعات و مجبشى سيرة المدرسين حتى مذيعة القناة الاولى لما شرحت خطة ال100 يوم الاولى و قالت أنه سيحسن من وضع المعلمين بعدها قالت أقصد معلمين الجامعات كيف بمن يريد أن يرتقى بالتعليم يهتم بالدور الاخير و الاساس خربان هنفضل طول عمرنا نغير فى الثانوية العامة القوانين و نزود فى أساتذة الجامعات يعنى هنبنى الهرم من فوق و أجدانا من سبعة آلاف سنة قالونا ابنوا الهرم من تحت و العالم كله يبنى من تحت واحنا بس فى العالم العباقرة ..........لك الله يا مصر ......فى التعليم لا ضباط جيش نفعوكى و لا أساتذة الجامعات هينصفوكى ...لما مرشح للرئاسة انتخبه نصف الشعب ما يعرفشى أن العمرة فى مكه مش فى دبى يبقى فين التعليم ........دول مش عايزين تعليم دول عايزين تعتيم