حلمك عمره ما كان بعيد

[الحمد والشكر لله]

السلام عليكم
انا الحمد لله اولى صيدله القاهره كنت زيكم كده السنه اللى فاتت
كنت فى تانيه ثانوى جايبه 94.8 % يعنى مجموع زى ما بيقولوا مبيأكلش عيش وطبعا مش قادره اقولكم كم الاحباط اللى كنت حاسه بيه ولما قررت انى اكمل علمى علوم على الكلام اللى سمعته من الناس انى مش هلحق حاجه والاحباط وكده لكن انا كنت داخله فى تحدى مع نفسى كبير وكنت واثقه فى ربنا لابعد الحدود وكنت افتكر دايما "ومن يتق الله يجعل له مخرجا ويرزقه من حيث لايحتسب " و"ان الله لا يضيع اجر من احسن عملا "و"فصبر جميل والله المستعان على ما تصفون" وعشت مع الايات دى ووثقت فى ربنا لابعد الحدود ومش معنى كده ان الحياه كانت سهله كنت ساعات احبط وايأس واقول مش هقدر اكمل واحس انى ضعت خلاص ولكن كنت بصارع تانى وافتكر الحلم الجميل اللى انا عايزه احققه واللى يستاهل بجد انى اتعب علشانه واقوم واكمل مذاكرتى واقول ان شاء الله هقدر كنت بحط دايما هدفى قدامى واصبر نفسى واقول هانت ولما كنت بسمع كلام يضايقنى او مثلا حليت وحش فى امتحان او فى جزء صعب مش فاهماه او ماده تاعبانى كنت بعند مع نفسى اكتر واحول الطاقه السلبيه لايجابيه عشان اثبت للناس كلها انى اقدر بعون الله والحمد لله فى تالته لوحدها جبت 98% والسنتين على بعض 97.5% وحققت حلم حياتى الحمدلله يعنى عايزه اقولكم كل ما تتعبوا وتحسوا بالفشل حط قدامك حلمك وتخيل نفسك هتبقى فرحان قد ايه لما تحقق ويوم النتيجه لما ان شاء الله تجيب المجموع اللى انت عايزه واعرفوا دايما ان ربنا شايلكم الخير وان لازم الواحد يقع ويقوم تانى عشان حلمه ويصدق ان ربنا هيكون معاه صدقونى حلمكم يستاهل ومش عيب ابدا انى اقع ولكن العيب ان انا استسلم للظروف ومحاولش ومتسمعش لحد بيحاول يحبطك بس صدق نفسك وصدق حلمك وثق فى ربنا وهو هيفرجها ان شاء الله وهيديك اكتر من اللى كنت بتحلم بيه ان شاء الله هانت يا جماعه استعينوا بالله وخليك حاطط هدفك قدام عينيك

معلش طولت عليكوا ويمكن مش بعرف اكتب كويس بس كان نفسى اوصلكم بس النقطه دى
ولو اى حد احتاج اى استفسار يقولى