لا تفقد الأمل وابدأ من اليوم

[222ahmed222]

بصوا انا مبحبش اتكلم عن حاجه زي دي ابدا بس لو حسيت انها ممكن تفيد حد فهقول:
انا خلصت امتحانات اولى ثانوي ف شهر ميو 2009 ووالدي توفى بعدها ع طول يوم 10/6/2009
والدي كان كل شيء في حياتي بمعنى الكلمه ووفاته سببتلي تغير كبيييير ف شخصيتي وتعاملاتي مع الناس بقيت من يومها كثير الجدال برخم ع الناس بدون سبب
دا غير بقى انه توفى قبل تانيه ثانوي بشهر
دخلت الدراسه وانا حالتي المعنويه بايظه مكنتش بذاكر خااااااالص ولا كنت بروح اصلي ف المسجد زي الاول ولا اي حاجه كنت ضايع جدا ف الكيميا والفرنساوي والعربي انما الرياضه لا كنت كويس فيها لأن والدي الله يرحمه كان مأسسني فيها كويس بما انه كان مهندس يعني
المهم قعدت لحد شهر يناير يعني زي دلوقتي وانا مبذاكرش خالص بمعنى خالص وماعرفش حاجه خالص ف الكيميا والفرنساوي
لحد ما اصحابي ربنا يجازيهم عني كل خير مسكوني من ايدي وبدأوا يرجعوني للمسجد اصلي معاهم ومره ف مره قالولي يا احمد عايزين نذاكر كلنا بعد الفجر رياضه
هم قالوا كدا عشان انا شاطر ف الرياضه فعايزين يذاكروها معايا
انا قولتلهم اوك بس بشرط يبقى يوم رياضه ويوم كيميا قالوا موافقين يعني كلنا نساعد بعض
ومشيت حياتي من يومها كل يوم نصحى نصلي الفجر وبعدها نذاكر بتاع 4 ساعات كدا ولا حاجه مع بعض وبعدها نروح نقعد شوية ع النت يعني كنا عايشين حياتنا بس المهم صلتنا بربنا والمذاكره اولا ثم كله يأتي بعده
ومع شوية تنظيم وقت
يبقى الصحيان ع طول ف الفجر
صلاه وبعدها مذاكره شوية
وبعدها نرفه عن نفسنا شوية
نرجع نذاكر
عندنا درس نروحه
يعني اقصد كان لينا نظام ماشيين بيه مش اكتر التنظيم اهم شيء ف الوجود
والاهم من التنظيم هو اختيارك لأصدقائك يعني انا لولا اصحابي دول كان زماني ف اي معهد مع احترامي للجميع يعني
المهم وبقينا نذاكر كل يوم من اول شهر اتنين تقريبا
ناخد يوم كيميا ويوم رياضه
يوم الرياضه نحل فيه على باب كامل من كل الكتب واحن كلنا سوا اللي ميعرفش مسأله التاني يساعده فيها ونستفيد كلنا
ويوم الكيميا نذاكر باب كامل ونحل عليه الاسئله اللي بعده من كتاب الامتحان ونحل عليه امتحان شامل وامتحان شامل ع كل الابواب اللي قبله مع بعض
ونيجي اليوم اللي بعده ناخد باب جديد
لحد ما خلصنا الكيميا سوا حوالي 3 او 4 مرات
وحلينا عليها كتير
وعشان كدا الحمدلله بعد ماكنت ضايع ف الكيميا
جيبت 49.5 من 50
وهم الاتنين جابوا 50 من 50
يعني انت وقتك من دلوقتي نفس الوقت اللي كان معايا
بس انا مفقدتش الامل واصحابي ساعدوني فعرفت اعدي
انت لازم تعرف مين صاحبك بجد اللي يقدر يقف جنبك او مش لازم انت لوحدك
وصدقني انت وهو انتم مهما كان مستواكم بالنسبة لشهر يناير افضل من مستوايا وقتها
والدليل انكم داخلين تسألوا ازاي نذاكر ونعوض اللي فاتنا يعني اقصد ان التعليم ف دماغكم انما انا مكانش ف دماغي خااااااالص
المهم ف اي يوم من الايام
اياك وفقد الامل
لو عندك 5 دقايق فاضلينلك ع الامتحان وانت مش مذاكر ممكن تشوف كام سؤال بالحظ ييجوا ف الامتحان
المهم ابدا من النهارده وانسى كل اللي حصلك وفكر ان انت كأنك بتبدأ ثانويه من جديد
بس مش هتضيع ولا يوم فيها
وصدقني لو عملت كدا ووثقت ف ربنا وفي نفسك
عمر ربنا ما هخيب ظنك
(فَاسْتَجَابَ لَهُمْ رَبُّهُمْ أَنِّي لاَ أُضِيعُ عَمَلَ عَامِلٍ مِّنكُم مِّن ذَكَرٍ أَوْ أُنثَى بَعْضُكُم مِّن بَعْضٍ) صدق الله العظيم
فقط ليس عليك الا ان تثق بنفسك وبقدرتك على التغيير من مستقبلك ومن مستواك
وسوف يتـأتى هذا بإذن الله
اخي واختي مفيش شيء ف الوجود اسمه الوقت ضاع عليا
حتى لو ضاع اعمل اللي عليك بردو عشان تبقى قدام نفسك بعدين حتى حاولت
إنما اللي بتفكروا فيه دا بداية الاستسلام ودا هو السبب ف الفشل يعني سمعت دكتور نفسي بيقول
ان المتفائلين دايما نسبة نجاحهم بتزيد عن المتشائمين اللي ليهم نفس القدرات بنسبة 40% شايفين الفرق؟؟
ضع ثقتك في ربنا وفي نفسك وتقرب من ربنا ثم تقرب الى كتابك وحقا لن يخيب ظنك بهما ابدااااااااااااااااااااااااااااا