تجربتى

[Dr.abo ali]

السلام عليكم ورحمة الله وبركاته


معلش انا هحكى لكم تجربتى مع الطب البيطرى علشان كثرت الاراء عن الطب البيطرى وعن الناس اللى داخله الكليه ومش حباها وكمان الناس اللى بتشتم فى كليتنا


فمعلش استحملونى شوية يمكن افيد حد فيكم او اغير فكرة اى حد عن الكلية فياريت فعلا الناس تقرا الموضوع كله

انا زى معظم طلاب الثانوية كنت عايز طب بس الفرق ان انا فعلا كنت عايز ادخله مش زيهم وخلاص وده لعدة اسباب منها : 1- انى بحب مجال الطب جدا يعنى دا ميولى الشخصى
2- امنية والدى انه يكون حد من اولاده فى طب بشرى
3- انى انا ولد وحيد وعندى ما شاء الله 6 اخوات بنات ونفسى احقق امنية والدى والعيلة واكون دكتور بشرى
4- انى بحب اخدم الناس وشايف انى اخفف الامهم تكون حاجةجميلة جدا
5- انا بلدنا (قريتى ) مفيهاش دكاتره كويسين وانا كان عندى طموح انى اتميز فى المجال دا

فالمهم عرفت النتيجة وعرفت انى مش هدخل طب طبعا كل امالى اتحطمت بس فى طريق تانى وهو طب خاص قدمت فعلا طب خاص وكمان عملت تظلم علشان انا كنت عارف انى مظلوم فى التصحيح ففى النهاية بعد الاستخارة وسؤال الناس عن طب خاص وبيطرى ففى ناس كتير رجحت بيطرى بس انا نسيت اقولكم ان عمى دكتور بيطرى فى السويد وهو شجعنى على طب خاص ليه ؟ علشان مجال البيطرى فى مصر مش كويس

بعد كدا طلعت نتيجة التظلم ومطلعليش درجات وبعدها طلعت نتيجة طب خاص وكانت النتيجة ان انا متقبلتش ليه ؟ علشان الجامعة عملت تنسيق داخلى واخدت من 97,3% ساعتها عرفت ان ربنا كتبلى بيطرى وكنت من قبل النتيجة بعد الاستخارة قلت يا رب انا راضى باللى انت هتختارهولى
فى حالجة لازم تعرفوها ان بعد ما طلعت النتيجة واحد صحبى جاب 90% عرض عليا ان نروح لواحد يدخلن بالواسطة وانا قلتله ( لأ ) ليه لانى رضيت بقدر وعرفت ان دا اختيار ربنا ومردتش ادخل وعلى فكرة صاحبى ده دخل دلوقتى الجامعة طب

بعد كدا لما قريت عن مجالات الكلية اتذهلت فعلا ولقيت ان الكلية فعلا اقسامها رائعة وشغلها هيكون اروع فى حاجات كتير زى معامل البحوث والطب الشرعى وحاجات تانية كتير وحسيت دلوقتى فعلا ان هى دى الكلية اللى انا كنت عايزها على الرغم انى لسه مدخلتش الكلية بس انا الحمد لله داخل وحابب الكلية ليه ؟ علشان راضى بقدر ربنا وكمان علشان مجالات الكلية الرائعة

وبقول للناس اللى كانت عايزه تدخل صيدلة فرصتك مضعتش ممكن تفتح صيدلة من طب بيطرى يكون فيها 30% ادوية بيطرية والباقى بشرى وممكن تفتح معمل تحاليل يعنى مجالات عملك كتيرة جدا

فبقولكم ياريت تبص للكلية بنظرة تفاؤل وياريت الناس تقرا عن مجالات الكلية فعلا هتحب الكلية

حاجة اخيرة اى حد يتكلم معاك و يقولك دى كلية ................. اتكلم معاه عن مجالات الكلية قله دا انا ممكن افتح صيدلية واو افتح معمل تحاليل او اشتغل فى القوات المسلحة او اشتغل فى الطب الشرعى او اشتغل فى الموانى او المزارع او الحجر الصحى وانت هتلاقيه اتسمر ومقدرش يتكلم معاك


اسف فعلا على الاطالة بس فعلا عايز افيد الناس