انا مسلم و بحب الدكتور محمد البرادعى

[Sofia El-behairy]

سألونى هتنتخب مين للرئاسة
قالولى انت مسلم و بتحب دينك و بتخاف على شريعتك هتنتخب مين
قولتلهم انا مسلم يبقى اكيد هنتخب مرشح الاسلاميين
فرحوا و قالولى مين فيهم
العوا و لا ابو اسماعيل و لا ابو الفتوح
قولتله لا بقولكوا مرشح الاسلاميين
اللى بيتبع تعاليم الدين الاسلامى
اللى مش بيغلط و لا يسب حد
اللى الدين بالنسباله جوهر قبل ما يكون مظهر
اللى الدين بالنسباله انى اشتغل و اعمل عشان ارفع بلدى انى اقف فى اعلى مناصب التتويج فى العالم و اعتز بدينى و اقول انا مسلم
هنتخب مرشح الاسلاميين اللى عمره ما رد حتى على من يسئ له مع انه استاذ قانون دولى و يقدر يقاضى اى حد غلط فيه بالباطل و يوديه ورا الشمس لكن الراجل ده مرشح الاسلاميين عشان كدة هو عنده سماحة الاسلام
متسامح و هو فى اقوى موقع
هنتخب طبعا مرشح الاسلاميين اللى بيطبق الاسلام اللى بيقول كل واحد حر فى عقيدته و ديانته وممارسة شعائر دينه
قالى ازاى يعنى تحب يكون فى كل شارع كنيسة
قولتله انت تحب ان يكون فى كل شارع مسجد رد قالى اه طبعا
قولتله و اخونا المسيحيى يحب يكون فى كل شارع كنيسة و ده حقه زى ما ده حقك
قولتلهم هنتخب مرشح الاسلاميين اللى بيطبق الدين بالفعل و ليس بالقول
هنتخب واحد بيحب الناس و بيحترم الرأى الاخر زى ما الاسلام بيقولنا
هنتخب واحد يقدر يفيد بلدى و يدينى الحرية انى اقدر اعبر عن رأيى زى ما الاسلام بيقول و اقدر اصلى و اصوم و ازكى و اربى دقنى لو حبيت و اقصر لبسى لو حبيت و اروح اصلى فى المسجد على طول من غير ما الاقى امن دولة بيراقبنى
اصل الراجل ده بيطبق الشريعة بتاعتنا و الشريعة بتاعتنا بتقول كل واحد حر ما لم يضر
هنتخب واحد يحافظ على اسم الاسلام و على اسم بلادى لانه راجل العالم كله يعرف قدره و العالم كله بيبصله نظره تعظيم و تقدير
و لما يبقى رئيس بلددى هو الراجل ده و مسلم زيى يبقى هيعطى صورة جميلة للاسلام
هنتخب الراجل الاسلامى اللى كل همه مصلحة البلد و مصلحة المسلم و المسيحى و بيشتغل عشان يقدر يعملهم حاجة و مش فارقة معاه منصب و لا اسم المهم عنده يقدر يخدم بلده و يخدم دينه زى ما الاسلام بيقولنا
هنتخب الراجل اللى بيراعى ربنا فى شغله و مؤمن بان لكل انسان دوره فى الحياة زى ما الاسلام بتاعنا بيقول
هنتخب الراجل اللى بيقولى انت حقك تاكل و تشرب و تتعالج و تتعلم و تشتغل و تعيش حياة كريمة
هنتخب الراجل المسلم اللى هو مرشح الاسلاميين اللى درس و عنده علم و ثقافة و قدرة تخليه صادق فى كلامه و يقدر ينفذ كلامه و ينفذ وعوده زى ما الاسلام بيقول
الراجل ده اسمه محمد مصطفى البرادعى
انا مسلم و هنتخب مرشح الاسلاميين محمد مصطفى البرادعى
انا مسلم و بحب دكتور محمد البرادعى فى الله


يقولون ويكررون ويكذبون ويفترون، ويا ليتهم يتذكرون قول الله: ﴿يا أيها الذين آمنوا إن جاءكم فاسق بنبأ فتبينوا أن تصيبوا قوماً بجهالة فتصبحوا على ما فعلتم نادمين﴾.

Sofia Adam : Thanway