الصوت (قصه متجدده بقلمى الخاص)

[تامر الطويل]

الصوت

الحلقه الرابعه

تقف اميرة وهى سنده امير وهو فى شبه غيبوبه من كتر الضرب اللى انضربه من عمها واولاده وتشاور لتاكسى وتقوله

اميرة/ تاكسى

مستشفى السلام ياأسطى

السواق/ إركبى ياهانم

واول ما يوصل التاكسى قدام مستشفى السلام

تنزل اميرة بسرعه تنده للممرضين علشان يشيلوا امير وفعلا يهجم المرضين ويشيلوا امير ويدخلوة على اوضه الجراحه

وتنزل اميرة الحسابات تدفع فلوس تحت الحساب للمستشفى ، ولما ترجع تلاقى امير خرج من اوضه الجراحه واتنقل لغرفه ، تسأل الممرضه وتقولها

اميرة / لو سمحتى غرفه الاستاذ أمير إللى لسه جاى فى حادثه الضرب ، غرفه كام ؟؟

الممرضه / غرفه 213

وتدخل اميرة الغرفه واول ما تدخل تلاقى امير نايم على السرير ومفتح عنيه فتقوله

اميرة / حمد الله على السلامه ياأمير

امير/ أخيرا قولتيها أمير من غير أستاذ
أنا لو أعرف إن الضرب هيخليكى تقوليلى ،
أمير بس ، كنت إنضربت من زمان

اميرة / كلك زوق ياأمير

امير / فين الموز ولا البرتقال؟؟
إنتى داخله عليا من غير حتى ربع كيلو موز
إيه البخل ده
أنا بهزر على فكرة أنا كفايه عندى زيارتك ليا دى باالدنيا كلها، انا نفسى اقولك

وساعتها يدخل شخص ضخم لابس بدله سوده ونضاره سوده يبص لامير ويقوله

الشخص / إنت أمير نور الدين؟؟

امير / أيوة أنا زفت مش وقتك خالص ، انا كنت لسه هخرج مشاعيرى وأحاسيسى للمزة ،
مين حضرتك؟؟

الشخص/ انا العميد حسام توفيق
المخابرات العامه

امير / نعم
يانهار إسود
أنا برئى والله ما أعرف الشبكه ولا الجواسيس ، حتى
البنت دى معرفهاش

العميد حسام / إهدى ياأستاذ أمير
أنا هنا بخصوص المستندات إللى موجوده عندك

امير / مستندات ايه ؟؟

العميد حسام / الاوراق الخاصه برجال الاعمال
إللى بسببها شقتك ولعت وكنت هتموت

امير / لا والله يعنى إنتم كنتم عرفين إن شقتى هتولع
وبرغم كده مش عملتم أى حاجه
إيه كنتم عوزنى مشوى

العميد حسام / فين الاوراق ياأستاذ أمير ؟؟؟

امير / فى البيت عندى

العميد حسام / إزى فى البيت والبيت ولع؟؟

امير / لا ء ياباشا ما أنا .........

الصوت / ( بلاش تقوله )

العميد حسام / فين باالظبط يااستاذ امير ؟؟

الصوت /( بلاش تقوله )

يبص امير حوليه ويقول فى سره

امير / إنت تانى عاوز إيه المرة دى ياوش المصايب؟؟
وإزى مش أقوله ده مخابرات ياأهبل ، بس معاك حق فعلا لازم أتأكد !!

امير / سياده العميد
ممكن أشوف الكارنيه بتاعك

العميد حسام / إيه إنت مش واثق فيا؟؟
إتفضل الكارنيه بتاعى ده حقك

وياخد امير الكارنيه بتاعه يبص فيه وبعدها يدهوله وهو بيبص حوليه وبيقول فى سره بغضب ، الله يخرب بيتك صوت غبى هيودينى فى داهيه ، اهو طلع مخابرات ياغبى

اميره / طيب ممكن أمشى انا ياسياده العميد ؟؟

امير / ايه البياعه دى يااميرة !!

وانا اللى افتكرتك الحته الطريه اللى فى حياتى

العميد حسام / ثوانى ياانسه اميرة وانا اللى هسيبكم وهمشى ،

وبعد ما إطمنت على شخصيتى يااستاذ امير ، فين الاوراق بقه؟؟
ولا تحب أجيبك رسمى لمقر المخابرات العامه وهناك هعرف منك كل حاجه

امير / لالالالالالالالالالالالالالالالالالا
إيه ياباشا أنا بهزرمعاك

الصوت /( بلاش تقوله )

امير / ربنا يخدك هتودينا فى ستين داهيه

العميد حسام / فين الاوراق؟؟

امير / الاوراق فى ......
إيه ده انا فقدت الذاكرة إنت مين ياعم
إنتى مين ياأميرة ؟؟

اميرة / إنتى مين يااميرة !!

إنت مجنون والله مجنون

العميد حسام / إظاهر إنك مش هتيجى باالزوق
عتريس .. حسين
هتولى الاستاذ ده والبنت إللى معاه دى
يعم وهى مالها بس سيبوها

وساعتها يدخل ظابط ومعاه قوة من الشرطه ويخرج مسدسه ويوجه للعميد حسام والرجلين اللى معاه ويقولهم

الظابط / إرمى سلاحك إنت وهو،
كله على الارض ... كله على الارض

امير / مين إنت كمان؟؟

الظابط / أنا الرائد أيمن
أمن دوله

يبص امير حوليه بإستغراب ويشاور على العميد حسام ويقول

امير / امال ده مين ؟؟

الرائد أيمن / ده من رجاله رجل الاعمال توفيق حسين
وكان جاى ياخد منك المستندات ويخلص عليك
بس إحنا كنا مرقبينه كويس
ولحقناك فى الوقت المناسب

ويشاور الرائد ايمن للقوة بتاعته فيخرجوا العصابه بره الاوضه فيبص امير حوليه بإستغراب ويقول

امير / ايه ده فين اميرة ؟؟

دى كانت لسه هنا جمبى ،
إنت فين يامزة

الرائد أيمن / متخفش الانسه أميرة كويسه
بس أنا خرجتها بره علشان عايز أقولك كلام مهم
رجل الاعمال توفيق حسين مش هيسيبك فى حالك أبدا
خلى بالك من نفسك

امير / هو إيه ده !!

هو انا إللى هخلى بالى من نفسى وإنتم مش هتخلوا بالكم منى

الرائد ايمن / إحنا مرقبين كل تحركاتك ياأستاذ امير متخفش

امير / أنا أخاف ، أمير عمرة مايخاف
هو إنتم مش هتعينولى حراسه على بيتى
ولا أعتمد على نفسى ولا إيه ظروفكم

الرائد ايمن / إحنا مرقبينك من بعيد لبعيد متخفش ابدا وأنا جمبك

امير / كل رجال الشرطه بيقولوا كده وفى الاخر إحنا إللى بنموت
والبوليس بيجى ديما فى النهايه

وهو مشغل واوى واوى واوى
سرنتكم المعروفه وتنزل النهايه على الفيلم
وأموت أنا بقه

الرائد ايمن / إيه إللى بتقوله ده ياأستاذ أمير متخفش طول ما أنا جمبك
أسيبك دلوقتى ترتاح وياريت الانسه أميرة
متعرفش أى شئ عن كلامنا ده
سلام

ويمشى الرائد ايمن من الاوضه وساعتها تدخل اميرة جرى وتسأل أمير وتقوله

اميرة / أمير فى إيه ياأمير ؟؟ ومين الناس دى؟؟
وعايزين منك إيه؟؟

امير / إيه ده إنتى خايفه عليا ولا إيه!!

امير ة/ أه طبعا لازم أخاف عليك مش إنت مسكلى قضيتى

امير / نعم ياختى بس كده

امير ة/ أمال إنت فاكر إيه

امير/ مش فاكر أى حاجه خالص

إمشى يااميرة ، إمشى ،ماهو يوم مش باين من أوله

وتمشى أميرة من الاوضه ويقعد امير لوحده يفكر فى كل اللى حصله وفاجاه يسمع صوت بيضحك وبيقوله

الصوت / ( هههههههههههههههههه)أخدت بومبه يامعلم

امير / مين بيتكلم؟؟

الصوت / مش عارفنى
انا الصوت
هههههههههههههههههههه
.................................

والى لقاء قادم وجديد من

الصوت

بقلم

تامر على الطويل

أمير الجروح