كلمات غريبه هتسمعها فى الصيدليه - معلش استحمل

[cat2007200]

اهداء واجب قبل كل شئ
" الى شامبليون الذى فك رموز حجر رشيد"
" الى كل صيدلى دخل الصيدلة برجليه ولقى رموز لسه الباشمهندس شامبليون محلهاش"
" النهاردة - من غيرمقاطعة - هنكمل عمله ومسيرته"

طبعا المصطلحات اللى جاية هى بعض من جزء وعلى راى المثل اللى يعيش ياما يشوف واللى يدخل الصيدليات يشوف اكتر
وهى زى ما قولتلكو منطقية جدا وهتتطلب منك كل يوم فى اى صيدلية ولازم تتعامل معاها بهدوء اولا وثانيا وثالثا

1- برشام "هوا ": هو برشام الزكام وانواعه كثيرة جدا ويلاحظ ان هناك اشاعة محدش يعرف مصدرها ان بعضها بيدمر خلايا المخ
وهناك ايضا اعتقاد ان كل ما كان الصنف اقدم كلما كان اقوى فى المفعول فمثلا يقولك ال" كذا " القديم
ويطلق عليه فى بعض المناطق برشام " وانزا" وتقريبا ده تعريف ام شلبى الداية .
2- برشام " جيض حيوى" : وهو ما نسميه نحن الصيادلة خطأ بالمضاد الحيوى وهناك اعتقاد ان تركيز الكبسولة على قدر المرض يعنى لو مش عيان اوى ممكن تاخد كبسولة 250 ولو عيان اوى تاخد واحدة 500
ومش مهم اى نوع المهم انها 500 والخطأ الثانى ان مش مهم انه ياخد الشريط كله طالما الكبسولة جواها
نوع من تعاويذ القرون الوسطى اللى هتقضى على المرض
3- حرارة داخلية ": ده تشخيص ذكرته ام شلبى الداية فى اخر نشرة ليها وهو عبارة عن حاجة حاسس بيها العيان وملهاش اى اثر طبى
او اعراض ولغاية النهاردة مش قادر افهم هو عرف ازاى انها حرارة داخلية؟.
4- برشام " تمشية" : يعنى حاجة للاسهال بإعتبارها ماشية معاه وعاوز يوقفها وفيه ناس بتسميها " برشام قريطة" باعتبار انه عاوز يقرط على المسائل
5- كبسون بورق شوكولاتة : هو نفسه المذكور فى رقم " 2" وده لان فيه نوع كان بخمسين قرش كان بورقة مفضضه وهو ما يعطى احساس بأنها " انضف".
6- مش عارف " اتفسح" : وهى تعنى انه مش عارف يدخل الحمام و وقد تكون الكلمة مشتقة من مسرحية " ريا وسكينة" لما عبد المنعم
مدبولى بيكلم احمد بدير ويقوله عن الحمام " ابقى تعالى صيف عندنا" على اساس ان دخول الحمام طراوة
وفيه شئ من المتعة زى ما الواحد يتفسح وفيه طبعا تشابه بين المتنزهات الحالية والحمام لا يخفى على احد
7- قطرة " حمار" : بضم الحاء وهى ليست ادوية بيطرية ولكنها لحمار العين وقد يكون اصلها مشتقا من ان لما الواحد يضرب واحد
يقوله " هديك على حنطور عينك" وطبعا الحمار هو اللى بيجر الحنطور

8- يجعد : معناها انه عاوز يرجع والكلمة محدش عارف اصلها لغاية دلوقتى لكن هنلقيها باشكال تانية فمثلا" يستفرغ"
ودى فى الاوساط " الفافى" او " يطرش" او " يتقايى" او " يعق" وده فى الاوساط الاقل.
9- بنبظ" : والجمع بنابظ وهو ما يدعى " البامبرز" والطبيعى ان تلاقى مخلوقات بتسأل على الوان ومقاسات فيه
والطبيعى ايضا انه يتباع بالحته .
10- برهم : اى مرهم وهو مشتق من برهم الشئ اى جعله مبرهما وهو من اختراع بعض الكائنات فى حوارى القاهرة.
11- مجموعة : نفس استعمال رقم واحد اى الانفلونزا وعبارة عن نصب فى نصب حيث نضع قرص فيتامين من ارخص نوع
وقرص مسكن وقرص مضاد حيوى ومضاد حساسية من شريط فيه عشرين حباية بجنيه واى حاجة تانية عاوز
تخلص منها وتباع بمكسب 100% شرط ان تؤخذ مع بعضها وتنام على جنبك اليمين .... على فكرة دى موثقة
فى كتاب ام شلبى الداية اصدار سنة 1710 فى باب الحالات الحرجة.... احنا ناس اكاديميين
12- صاليلاك : وهو ال****اك بجميع انواعه اما الجربر ومشتقاته فيعتبر من الاكلات بتاعة المناسبات.
13- " حق فوزلين" : وهو كيس الفازلين ابو جنيه ويستعمل لاغراض التجميل حيث يقوم عليه قسم التجميل فى اى صيدلية محترمة
وينصح به كبار خبراء التجميل فى جميع انحاء العالم فمثلا صالون البرنسية فى صفط اللبن او صالون الكرتة فى
الدويقة و استورجى الباشا فى زينهم لانه بيلين الفرشة فى العربية ويمنع تشققها .
14- انبوبة " تلبيط" : وهى القطرة الطبية ودى جاية من فعل " يلبط" لانها بتتحط فى العين فبتلبط الرؤية.
15- مرهم " سمط" : يعنى عيل صغير مسموط اى عنده " حمو النيل" والتسمية غير معرفة الهوية
16- برشام اخضر : على حسب سن اللى قدامك لو صغير عيل يعنى يبقى عاوز ريفو
ولو كبير وفيه علامة مميزة فى وشه يبقى " ترامادول" نوع من ادوية جدول المخدرات
17- بلاطة : نوع من المسكنات قوى جدا وتركيزه 150 مجم ويسمى بالبلاطة لانه مبطط وده جدول مخدرات برضه
18- حقن شد اعصاب : وده اى نوع من ادوية الاعصاب وممكن تديله اى حقنة لونها احمر
19 - بسلين طويل المدد: اللى هو البنسلين طويل المدى وده بيسمى طويل المدد لانه بيتاخد مرة كل شهر " مدد ...مدد"
20- سقف البدن : وهو طبعا ليس اللوز ولكن يشير التعبير الى الام المهبل وطبعا بكده مفيش رجالة عنها سقف بدن