حوار مع رئيس جهاز المخابرات

[حميد بدوى]

حوار مع رئيس جهاز المخابرات

سألونى وقالولى بعد التحية
والصراحة كلة كان مية مية
وأوراقى سليمة وزى الفل
مع أن فى الاساس
مفيش اوراق

اول سؤال ياترى عندك عيال؟
قولتهم عندى اتنين ومستنى التالت
قالولى كمان مش عامل تحديد النسل؟
انت عايزنا نربوك ونربوا العيال
أنت كمان مش تخلى عندك أهلك أصل
قولتهم أصل انا لية فى الحكاية دية راى
سيادتة رد وقالى وكمان ليك راى
قولتهم هي الخلفة سياتك حرام
رد سيادتة وكمان اتتكلم فى الحلال والحرام
انت شكلك كدة ارهابى

قولتهم لا والله أنا بس بقو ل اسبابى
رد سيادتة هو احنا علشان سمعنا ليك كلمتين
علشان تعرف ان احنا ديمقرطيين
هاتقول اى كلام وتعمل معانا حوار
انت دلوقتى فى قلب جهنم يعنى فى وسط النار
هأتعمل اية قولتهم ادعى واقول استر يا ستار
قالة سيادتة اية رايك بالنسبة للمولود الجديد
بدل ما انت مستنية نخلية هو اللى يستناك
قولتهم وعلى اية وقالى بالمناسبة دا اذا ربنا حياك
انت ناوى تسمية اية قولتهم الاسم اللى انتم تختاروة

رد سيادتة وبصلى من تحت لفوق وقلى انت لابس كدا لية
قو لتهم قميص وبنطلون هوسيادتك فية اية؟
رد وقلى هو انت اللى هاتسألنا والا اية؟؟؟
قلت فى سرى لية؟
نطق سعادتة وقلى القميص بكم وقولتلة هو دة حاجة تهم؟
رد سيادتة وقلى هو انت كمان هاتدخل فى شغلنا اتلم!
وبعد احلى تحية جانى كذا قلم هدية
بصلى وقلى انت شكلك كدا بتشم
قولتلة سيادتك انا عندى اللحمية
قالولى تصدق ان دمك خفيف شوية
وعلشان كدا احنا هانتوصوا بيك

بس انا مش عجبانى حاجة قولتلة سيادتك ربنا يخليك
قالى القميص..، قولتلة المربعات اللى فية مش متظبطة
قلى سيادتة لاالكمام اية رايك لما يبقى بنص؟
قولتلة على طول قص سيادتك بتاخد رايى
قلى علشان تعرف ان احنا بنحبوا الحوار
شوفت ازى قولتلة سيادتك صاحب القرار
فلى طب والبنطلون اية رايك لما يتعمل شورط؟
دى سيادتك كدا انت بتدلعنى احلى دلع،
تصدق انك بقيت جدع وبدءت تفهمنى

قولتلة انا فى الخدمة وتحت امر الامن العام والامن الخاص
وامن البدنجان واى حاجة فى مصلحة النظام
قلى بس فية حاجة قولتلة اية واللي تأمر بية؟
قلى احنا لما بنقطعوا مابنقطعوش قماش
قلت ازى ياافندم سيادتك
قلى احنا بنقطعوا ايادى ورجول
وصوبعك اللى كلها فن فى اكل العدس والفول
واللى نازل بيها كتابة زى ما تقول قول
وقاعد تقول اشعار ضد الحكومة وضد النظام
وناسى انك محكوم من يوم ما اتولدت لحد اليوم المعلوم

اية رايك فى عملية تفصيل من جديد
تستقبل بيها المولود الجديد بالعربى هانعملولك عملية قص
وبدل ما أنت واحد صحيح هانعملوك نص
اية رايك لما نحطوك تحت المقص
قولتلهم ان كان البنطلون والقميص معلش
انما موضوع ايدى ورجلى ميحكمش

قولتهم انا طول عمرى بحب البلد وتراب البلد
رد سيادتة وقالى ما احنا البلد
وواجب علينا نعلموك تحبنا ازاى
علشان ما يبقاش الموضوع جهجهونى
رديت قولتهم واللة العظيم عندكم حق
انا طول عمرى بشكر فى جهاز الامن
وبقول هو اللى مستحمل بلاوى البلد
قلى سيادتة وقلى مش قولتلك احنا البلد
قولتلة قصدى الشعب
قلى ما احنا برضة الشعب
قولتلة انتم البلد والشعب وامال التمانين مليون دول مين
قلى دول بيتسموا ولاد الكلب المرة دى شدة ودن
المرة اللى جاية اتبقى فية قطع ايد ورجل
علشان تعرف ان احنا عندنا صبر

قولتهم والله العظيم انتم خيركم على الكل
والبلد زى الفل وانا قلبى من نحيتكم طارح جانيين طل
وطارح ياسمين وفل
انا مش عارف الناس دى عايزة اية الناس دى خلتها خل
ربنا يخلينا الحكومة
ويخلينا رجال الامن
وقمت من النوم زى المجنون
احسس على ايدى ورجلى
واخد عيالى فى خضنى وابص فى صوابعى
وادور على دفترى وقلمى
بجد أحنا عايشين فى مدن الرعب
وربنا يستر على البلد ويستر على الكل
وأنتم اخرتكم زى الفل

الشاعر
عبد الحميد بدوى

قبل الثورة