طريقة عمل الكفتة سريعة وهايلة بالصور

[رنا rana]

§ المكونات:
- كيلو لحمة مفرومة
- 200-250 جرام ليه ضانى ودة اللى بيخلى الكفتة طرية مش ناشفة
- بصلة كبيرة مفرومة ومعصورة من ميتها (يعنى نفرمها بالكبة ونعصرها بإيدينا ودة من الحاجات المهمة عشان الكفتة ماتفكش عند الشوى)
- كوب بقسماط ناعم
- ملح-فلفل-بهارات –قرفة-جنزبيل
- حزمة بقدونس مفرومة ناعم فى الكبه
ودى صورة بكل المكونات


§ الطريقه :
- نلخبط كل المكونات على بعضها


- وبعدين عالكبة نحط حبة حبة ومهم قوى نشغل على السرعة المتوسطة

لغاية أما اللحمة تدور معاكم زى الصورة دى


-بعدين مانستعجلش ونحط الكمية كلها لإن لازم يكون الفرم ناعم يعنى عامل زى العجينة
ودى تانى حاجة تخلى الكفتة ماتفكش وهى بتتشوى
ودة شكل العجينة

- وبعدين نبتدى نصبع زى ما إنتم شايفين وشايفين كمان العجينة ناعمة إزاى





وبعدين باسحب العود وأكرر العملية لغايه أما المقدار يخلص

- ( أنا بعد ما عملت العجينة قسمتها نصفين نصف شلته فى الفريزر لمرة تانية والنصف التانى هو اللى أنا صبعته)
ودى صورة المقدار اللى إتصبع يعنى نصف العجينة :


- ناخد صوابع الكفتة عالتلاجة بس طبعا نغطيها ونسيبها ساعة أو أكثر ودى تالت حاجة ما تخليش الكفتة تفك وهى بتتشوى خلوا بالكم معانا دلوقتى تلات حاجات

- الشوى :
- أنا باستخدم أسهل حاجة اللى هى شواية البوتاجاز بارش على قاعدتها شويه ملح ودة بيقلل الدخنة وباحط ورق فويل عليها علشان يكون تنضيفها سهل بعد كدة وباحط الصوابع على مرتين وبتكون الصوابع متوزعة فى نصف الشوايه بعيد عن الحروف وبعيد عن بعضها وباغير ورق الفويل فى المرة التانية عشان الكفته ماتتحرقش وما استعجلش و أحط الصوابع كلها مرة واحدة لازم يكون فيه براح بين صوابع الكفته عالشواية بس الصورة حتلاقوها مختلفة لإن الموبيل فصل شحن فما عرفتش أصور وكانوا عندى جعانين فبعد ما أكلتهم عملت 5 صوابع مخصوصه عشان أعرف أصورها بس الشوايه ممكن تستوعب تمانية بالشروط اللى إحنا قايلينها
- لازم الشوايه تسخن الأول وتكون النار وسط لا عالية ولاواطية
- وبارص الصوابع واغطيها دقيقة وما باحاولش أقلب خالص لغاية أما تبتدى المادة الدهنية تنزل من الكفتة ساعتها باكون ضامنة إن الكفتة مش حاتلزق فى الشواية واقلب عالناحية التانية و أغطى كمان دقيقة لحد ما تبتدى المادة الدهنية تنزل من الناحية التانيه كدة أقلب كمان كدة مافيش مشكله لإنى ضمنت إن الكفتة مش حاتلزق وأستمر فى التقليب فى كل الجوانب عشان الكفتة ماتتحرقش من أى جنب وممكن هنا أوطى النار شويه عن الوسط
ودى مراحل الشوى بالتصوير البطئ فيديو يعنى



هنا إبتديت أقلب لإن المادة الدهنيه إبتدت تنزل من الكفته













- أول ما حس إن الكفتة إستوت أشيلها وأغير ورق الفويل وأكمل بقية المقدار
- ودة الشكل النهائى بس خدوا بالكم بقدونس التزيين لازم يكون متنشف كويس ومغسول طبعا