عروسة لصديقى [ 3 ] / زجل

[عادل حسان سليمان]

[ 3 ] عروسة لصديقى
===============
صاحبى جانى فى يوم ....وقال لقيتها ...زيها ماتلاقيش
فى جمالها وحلاوتها .....فى تعليمها واناقتها ..مافيش
تعال معايا نخطبها ...............وأبدآ بسرعة ما تأخرنيش
روحت معاه لبيتها ........وصراحة المنظر ...ما شجعنيش
هى اللى قابلتنا وقالت ......نتفق الأول ....وما تحرجونيش
عندى شروط نتفق عليها .................وما تكسفونيش
******************
أنا مديرة فى شركة وعملى .....من غيرى ما يمشيش
العريس ينظف البيت يومين وأنا يوم ولو قصرت ما يحاسبنيش
ويشترى الأكل من السوق ويطبخ بالمرة .....ولا يعطلنيش
ولما نجيب ولد ياخد اجازة يربيه ...وبأحواله ما يضايقنيش
أحيانآ بصراحة وقت الشغل عندى ..........ما بيكفيش
بأجيب شغل البيت وساعتها يخرج .......وما يزعجنيش
يروح فين ولا عند مين ....فى الكلام دا ما يناقشنيش
*****************
صاحبى وقف وقال ........يا حلوة انتى ما تناسبنيش
لاحسن تطلبى منى أرضع مكانك ...وما اشغلكيش
انتى عايزة تتجوزى واحدة زيك وازاى ...ما تسألنيش
--------------------------------------------------------
والى الزجل الرابع من ديوانى ...............عروسة لصديقى