اقر أنا المفروم أعلاااه !!

[احمد رضا]

النهارده كلامـــي تمام
كلام امبارح كان افتكاسه
اه بتاع الحـكم و النظام
و بتاع البلــد و الرئاسه

النظام معلهوش مـــلام ..
ولا الحكـم و لا الرئاسـه ..
انا إرهابي ..و انا اللـي غلط !!
ده اخر كلام ..ودي الخلاصه !!

* ؟؟؟؟؟؟ !!

مستغرب ليه ؟!
يا عمي يا سيدي ..
متستعجبـــش ..
اصل الضرب اللي انا خدته لو انت اخدته متستحملش !!

* لاء اتـ .... !!

يا بيه .. اسكت انا عندى عيال !!
عايز الامان و راحـه البـــال ..
مش كل يومين مشدود ع القسم ..
والضمانه عم او خال !!

* كلامك ده ؟ !!

ايوه كلامي و بدون تهديد
قررت امشي .. جنب الحيط
بدل ما كل يوم مفــروم
وكل يوم ايدي في حديــد

* طب قولي حكايتك .. احكي و فضفض .. حصلك ايه .. قولي رجعت في كلامك ليه ؟!

بص يا بيه ..
شتمت الريس و شتمت الحكومه ..
قولت حكومه وكلاها البارومه ..
قلـــت الريس ده ابن .... !!
قولت هو رمز النهــــــب ..

قولت و هتفت و بدون خوف
الاولي عدت علي خير ..
التانيه بعتولي غفير ..
لكن التالته يا بيه .. كات تابته
خدوني القسم ..
شوفت ع القفيان الرسم !!

اتضربت ..
اتهانت ..
اتجلدت ..
قالولي خلاص ؟ !
استكفيت ؟
قولتلهم لاء
هقول الحق
هقول و اصحي اهل البيت
هقول ان البلد بلدنا
و ميراثنا الغيط

قالولي براحتك
كيف ما تحب
كمل يا عبد المعطي الضرب
جلدوني تانـي
ادوني ف سناني
وراحوا سأليني .. خلاص حنيت ؟
قولتلهم لاء !!
هقول الحق !!
و اصحي كل اهل البيت ...
وهقول ان البلد بلدنا و ميراثنا الغيط !!

قالولي براحتك
كيف ما تحب
بس يا شاطر لازم تعـرف
ان السب .. مش اكل لب

خطفوا مراتي !!
قالولي طاطي ..
قولتلهم لاء !!
فداكي يا بلدي ..
قولة الحق !!
اغتصبوها !!
***وها !!
ف البحر رموها ..

قالولي شبعت ؟!
قولتهم لاء !!
هقول الحق
انتوا حكومه عايزة الحرق

راحوا .. راجعوا العيله فرد فرد
من اكبر حد لاصـــــغر حد
قالولي جبنالك ست الغالييييييييييين
حزر فزر تطلـــــع مييييين ؟

امي يا بيه !!!!

يبقي عايزني اقول الحق ..
ولا اقول للحق لاء ؟!!

هتفت و قولت
بطل الحق
وحق الباطل
انتم تمام و انتم أفاضل !!


شرفي و عرضي بقوا في الأرض ..
انا وولادي عايشين في البرد !!
و الناس ساكتة مبتتكلمش
واللي شجاع .. مبقاش له وش ..
وبعد ده كله .. اقول الحق ?!!..

* عندك حق ....

· ملحوظة : هذا الكلام في بلد ما .. عن حكومه ما .. عن رئيس ما .. عن شخص ما .. بقلمي انا مش بقلم ما

مستني آرائكم
ويارب تعجبكم