فرصة ؟!!

[**تسابيح**]

السلام عليكم ورحمة الله وبركاته
ازيكم ياجماعة ؟
يارب تكونوا بخير ...
ومبروك علينا الانتصار يارجالة بجد رفعتوا راس مصر
انا ع فكرة قبل اي حاجة انا لا مع البراعي
ولا مع الأحزاب ولا اخوان ولا حزب الوطني
أنا واحدة مصرية عادية
زي معظمنا
لحد امبارح بس كنت بقول اننا مش عايزين الريس
يمشي بئا عشان زهقنا وحقنا لدماء الأبرياء
ورحم الله شهداء مصر ...يارب
ويدخلهم فسيح جناته

بصراحة لما طلع وقال انه مش هترشح تاني
وانه هيغير الدستور وهيعدل البلد وانه
مش خاين ولا عميل
لانه لو كان مش خايف ع البلد بجد
كان عمل زي بن علي وساب البلد تولع ولا همه حاجة
والطيارة الخاصة جاهزة ....
وكمان هو لازم يغير الدستور لانه لو مشي ومش غير الدستور يبقي هنعيد الكره مرة تانية
وكمان هنمشي ع الدستور القديم لان نائب الريس مش هينفع انه يغيره ..لانه مش الريس
ببساطة ياجماعة رغم كل الكراهية اللي كانت في قلبي ليه...
لكن رغم دا كله مش حبااا فيه ع فكرة
بس حباا في مصر وشعبها فينا احنا...

الناس اللي بتشتغل في القاهرة مثلا وبتقبض باليوم
بقالهم 9 أيام موقوف حالهم ومش عارفيين يروحوا
شغلهم ...
والله فعلا
اعرف ناس معرفة شخصية
بيشتغلوا في القاهرة منهم مش قبض مرتبه ومنهم
اللي بيشتغل في اليوم وبقاله 9 أيام مش معاه فلوس
وما خفي كان أعظم
يعني فيه ناس عرفت تصرف حالهم وناس لا....

انا عارفة ان اللي اتعمل دا كان كويس وغير في البلد
لكن كان فيه سلبيات مش من المصريين نفسهم
بس من عناصر اجنية عارفة ان مصر دولة
كبيرة ولو سقطت يبقي الكل هيسقط ....
يبقي البلد هتنخرب ....
وهم عايزيين كدااا ....
والاقتصاد اللي انضرب والسياحة والآثار
كنوزنا اللي اتسرقت ......
لكن في نفس الوقت وسط الناس اللي ف ميدان التحرير
المصيبة الكبري أجانب وناس عايزة تخرب بلدنااا

وكمان ياجماعة فيه حاجة تانية
المظاهرات دي قامت ليه؟!! مش عشان الظلم والفقر اللي الناس عايشة فيه ....مش عشان البطالة .....
ما هي فين ناس بتشتغل دلوقتي في بطالة ومش لاقية تأكل ..
والبلد كل شوية بتتخرب
وكمان دلوقتي بقينا نأكل في بعض

شوية مع الريس وشوية ضده
وشوية عامليين يتخانقوا ....
وعمليين يشتموا في بعض
وكلنا مصريين والله اعلم هيحصل ايه تاني ...

انا مع بقائه اللي خلانا نستحمل الراجل 30 سنة مش هنستحمل
6 شهور كمان ...
ياجماعة مصر مش تونس ولا هتكون تونس ...!!
مصر بلد الامن والامان منخليش ناس مندسة تقضي
ع فرحتنا دي ...
نجرب كداا
الحكومة الجديدة واديننا عارفينا الشارع فين !!
لو مش عملوا ونفذوا مطالبنا الشارع جانبنا اهو
بالله عليكم الناس اللي بتموت دي سواء من الضرب او الجوع بعد كداا مش حراام
وع الأقل يعني مأظنش ان فيه بلد عملت زيننا..
كفاية الخوف اللي كنا عايشيين فيه ........
الحوار مفتوح للجميع
بس بالله عليكم احنا اخوات واحباب ومصريين زي بعض
ومع بعض يكون الحوار عاقل وموضوعي وبعيدااا
عن أي حاجة ...واي كلام جارح ...
سواء كلمة الاتهام بالنفاق او اي حاجة
لان الكلمة دي كبيرة اووووي والله العظيم ...
ومينفعش تتهم بيها مسلم زيك بالضبط ...
انا كتب الموضوع بسرعة من غير ترتيب الأفكار
لان الأفكار متلغبطة بطبيعة الحال
فعذرااا