اعرف ازاي تذاكر يا طالب ثانوية عامة

[The Lord Of The Rings]

بسم الله الرحمن الرحيم

الحقيقة انا احترت انزل الموضوع ف انهي قسم .. ف حطيته هنا و ارجو من المشرفين ينقلوه للقسم اللى شايفينه صح
انهارده يا جماعة و اخص طلبة ثانوية عامة .... بحاول اقدم لكم بعض النصائح العامة عن المذاكرة ف ثانوية عامة ..... بحكم ان الواحد عدى خلاص و ارتاح و انتو لسة ف البداية بقا
و الحقيقة ان فكرة الموضوع مش جديدة اوي و موجودة قبل كده ... بس اكيد ممكن تلاقوا نصائح جديدة او مفيدة ...... و التكرار مش وحش ف الحاجات اللى زي دي .... و الصراحة كان فيه موضوع جميل جدا كان كتبه زميلنا محمد البري لنصائح عن مذاكرة كل مادة على حده ... و الحقيقة قعدت ادور عليه اجيبه لكم مقدرتش ... هحاول تاني ان شاء الله

بسم الله

أولا : مذاكرتك .... من دماغك
يعني ايه الكلام ده ...... يعني مذاكرتك ف ثانوية عامة هي الطريقة اللى تريحك .... اللى انت شايف انها بتفيدك و مش بتتعبك ... و اياك تتبع طريقة حد يقولها لك لمجرد انه شاطر مثلا او كده ... لأن دي حاجة نسبية من شخص لآخر ... و اذا كنت انا بنزل موضوع زي ده ... فانا مش بنزل طريقة مذاكرة ... دي بعض النصائح و الحاجات الصغيرة اللى انت ممكن تحاول تطبقها ف مذاكرتك ... و تفيدك باذن الله .... ف اكرر تاني ..... انت تذاكر بطريقتك

ثانيا : خليك صريح مع نفسك
بمعنى .. ان ما دام احنا قلنا انك تذاكر بطريقتك و محدش يفرض عليك طريقة ... يبقى ف نفس الوقت تبقى صادق مع نفسك ... متكروتش الدرس بسرعة بداعي ان هي دي مذاكرتك .... و تقنع نفسك بانك كده ذاكرت 100 100 .... دي حاجة بينك و بين نفسك بقى ....... و يحضرني اللى حصل مع احد معارفي ... كان من النوع ده كده .... كان يقعد يقول لك ... انا راجعت الكيميا مش عارف خماشر تمناشر مرة و العربي كام مرة .... و فرحان اوي .... و لكن بعد ما ظهر الحق و خربت مالطة ... اعترف لنفسه و اللى حواليه ... بان المرة من الى كان بيقول عليهم دي .. كان ممكن يخلصها ف تلات اربع ساعات .... و انت يا اخي مش ف حاجة لكده .... مرة تمام احسن من خمسين كروتة .... و اظن انت او انتي ... بقيت ف مرحلة تقدر تتحمل فيها مسئولية ... و متضحكش على نفسك بسهولة كده ... انت بتحدد مستقبلك

ثالثا : اكتب بايدك
و دي حاجة الصراحة مفيدة جدا جدا جدا جدا للطالب ... و خصوصا ف المواد النظرية .... الكتابة باليد ... بتثبت المعلومة ... بطريقة متتخيهاش ..... تذاكر الدرس ( بطريقتك عادي ) ... و متكتبش ف ساعتها ... لأنك اساسا لسة مذاكره ملحقتش تقع منك حاجة ... لكن مثلا ممكن تيجي تاني يوم تكتب الدرس او كل اللى انت تعرفه عنه ... كل اللى في دماغك ... و بعد كده ممكن بعد اسبوع ولا اتنين و انت بتراجع الدرس ...... متفتحش الكتاب عليه على طوول كده ... لأنك كده كده حتى لو كان فيه حاجة واقعة منك .. بمجرد م تشوفها ف الكتاب هتقول ايوة ايوة انا عارفها .. و هي واقعة منك اساسا ... تعمل ايه بئا ... تراجع بانك تكتب تاني .... كل حاجة ف دماغك عن الدرس ... و بعد م تعصر دماغك ... و تكتب .... تشوف بئا ايه اللى وقع منك ... و تقارن اللى انت كاتبه ( عصارة نفوخك ) بالدرس نفسه ... ده هيديك رؤية اوضح عن مذاكرتك للدرس ... و مقياس كويس لتذكرك ... و ف نفس الوقت اهي طبعا مراجعة .... زي م كانوا بيقولوا لنا زمان ف حفظ القرآن ... لو كنت عايز تراجع سورة انت كنت حافظها ... متفتحش تقراها كده على طوول ... لأ . حاول تسمعها لنفسك و هات اخرك ف التذكر لحد م تقف ... ساعتها افتح و شوف
* حد يقول لي م انت بتقول لنا طريقة مذاكرة اهي و عايزنا نطبقها .... اقول لا .. طريقة المذاكرة اللى اقصدها هي اول مذاكرة للدرس ... انت بتدخل المعلومات ف دماغك بطريقتك ... اما الكتابة دي فهي حاجة مساعدة تعملها بعد مذاكرتك لتثبيت المعلومة ... و بعدين ممكن حد يجربها يحس انها مش فارقة معاه اوي عما كان قبل م يكتب ... و ان الكتابة بتضيع وقته من غير نتيجة كبيرة ... انا اول واحد بقول له متكتبش ...... لكن الحقيقة ان طريقة الكتابة دي جابت ثمارها مع ناس كتير .......................

رابعا : اللى يزيد عن حده ينقلب ضده
ايه ده ..... اقول لكم .... طبعا محدش يختلف على اهمية ثانوية عامة ف حياة اي طالب .... و طبعا لازم اهتمامك يزيد بيها عن السنوات الدراسية التانية ... و لكن .. في حدود المعقول .... اوعى اهتمامك يزيد عن حده ... هينقلب ضده ... ازاي ... عن طريق حاجات كتير :-
1- لو اهتمامك زايد اوي ... طبعا الحماس اللى ف الأول ده ( اللى هو طبيعي عند كل الطلبة ) هيبقى كبير اوي ...... هتذاكر كتير ... تحرق نفسك مذاكرة ... تجبر نفسك ع الكتاب .....م انت متحمس اوي لاهتمامك اهو ... غلط كبييييييييير ... المذاكرة الزيادة دي .... هتخليك توصل ف يوم من الايام ... و غالبا بيبقى ف الترم التاني ..... ان انت وصلت لحالة زهق و ملل قصوى ... او تشبع بدرجة اصح ... مش طايق الكتاب ... كرهته ...... لو تجبر نفسك تذاكر ... ممكن توصل بيك الدرجة انك قاعد قدام الكتاب ... و الكتاب مفتوح .. و انت عينك فيه ... بس مش بتقرا ... خلاص انت جبت اخرك معاه ...... و ممكن من زهقك بتقنع نفسك انك كده بتذاكر فعلا ... لأنك مش عايز تواجه نفسك بحقيقة انك مش قادر .... و نرجع بقى لنقطة الصراحة مع النفس تاني ...... خصوصا انك ف الفترة دي المفروض انك بتستعد تزود من طاقتك شوية عشان موسم ما قبل الامتحانات داخل ....... طبعا انت متخيل حالك هيبقى ازاي !!!!!!!!!!!!!
2- لو اهتمامك زايد عن الحد برضو ....... هينقلب ضده ... هينقلب لتوتر و قلق دائم ...... و خصوصا طبعا ف موسم الامتحانات و ما قبله ..... هيخليك دايما متوتر و متنشن .... لأنك مديها اهتمام اكبر من اللازم ..... و دي حاجة طبعا بتأثر عليك ف امتحاناتك .... خوفك يزيد ... و دي حاجة مش ف مصلحتك ........
3- ارجع و اقول ... ثانوية مش زي اي سنة .... لآزم تهتم بيها .... و لكن في حدود المعقوووووووووول !!!!

خامسا : محدش بيجري وراك
و دي حاجة يمكن انتم استخلصتوها من الكلام اللى فات ....... ابدا دراستك بمذاكرة عادية خالص ... متفتحش ع الرابع .... متقعدش تقول انا هاسبق انا .. ارتاح ... و الله لو عندك مقدرة .. ميمنعش ( لكن الصراحة مع النفس للمرة ال 100 ) ..... لكن ذاكر بطريقة عادية جدا .. اهم حاجة ... ميفوتكش درس معين تأجله ... تخلص كل درس اول باول .... اللى تذاكره تخلص عليه ... تبقى مذاكرة بضمير ....... و خلى الشد و الفتح ع الرابع ده ف الموسم بتاعه .... اللى هو الترم التاني ..... و النص الأخير منه على وجه الخصوص ..... ساعتها ... افتح ع التامن يا عم ...... ولا يهمك

سادسا : نظم مذاكرتك
يعني ايه بقى .... متهيأ لي العنوان باين .... لكن عايز بس انبه لحاجة ..... موضوع انك تعمل جدول لنفسك ف المذاكرة و تمشي عليه .... ده برضو موضوع نسبي من شخص للتاني .... يعني اياك تجبر نفسك على عمل جدول اذا كنت شايف انه هيعمل معاك مشاكل او حاجة ..... ناس تانيين وجدوا ان الجدول نظم لهم المذاكرة بشكل طبيعي و ماشي معاهم فل الفل .... يبقى مفيش مانع ... مش قلنا ذاكر بالطريقة اللى تريحك ....
- و لكن بشكل عام ... اللى احسن من الجدول ..... انك تنظم مذاكرتك على اساس المواد مش على اساس الوقت ..... يعني ايه .... يعني انت ف الجدول بتمشي نفسك على وقت معين تذاكر فيه حاجة معينة .... ده ممكن ف بعض الأحيان ياخد من حق مادة معينة .... مثلا انت جه عليك وقت و ف اي ظرف من الظروف مضطر تذاكر فيزيا اكتر ... عندك امتحان مثلا او كده ..... لو ربطت نفسك بالجدول ممكن تلاقي الوقت ده مثلا عربي ولا اي حاجة ....... طيب و بعدين
زي م قلت حاول تنظم نفسك من نفسك .. مش بورقة و قلم .... حاول توازن المذاكرة بين كلمادة و التانية حسب احتياجك ليها ف الوقت الحالي ... فيما لا يخل بانك تكون لامم كل المواد و مخلصها .... يعني مش معنى انك تذاكر فيزيا مثلا عشان محتاجها دلوقتي ... تنفض لمادة تانية زي العربي عندك نقص فيها .... زود فيزيا آه .... تخل بالتوازن لأ ..... دي كلها حاجات انت تقدر تظبطها مع نفسك .... و بتدخل فيها اهم حاجة قلتها فوق ( الصراحة مع نفسك ) .... أوعى تضحك على نفسك ..... انت الخسران

سابعا : اللى فات مات
دي حاجة ليها علاقة بالامتحانات ... اي نعم بدري اوي عليها .... لكن بالمرة بقى ..... اثناء الامتحانات .... اوعى تخلى حلك ف مادة يأثر ف المادة اللى بعدها ...... انا مثلا كنت ماشي مع مبدا معين ..... انا مثلا لما اخرج من امتحان .... اراجع مع مدرسي زي م انا عايز ... اتكلم و اتضايق زي م انا عايز ..... لما اروح البيت انام من التعب شوية ..... اصحى من النوم ناسي المادة دي للأبد .... مليش علاقة بيها .... كأني ممتحنتش فيها .... اعتبر " القيلولة " دي فاصل نهائى للمادة دي ...... لأن كثير من الطلبة من النوع اللى لو مثلا لقى نفسه لا قدر الله ... عنده حتة واقعة ف الامتحان ولا حاجة..... يفضل متضايق و مكتئب و حاله حال...... طبعا ده بيأثر على الامتحان اللى بعده ...و على المذاكرة بتاعته ..... دي حاجة مهمة ........ و ده برضو يندرج تحت مبدأ ... التوكل على الله

ثامنا : توكل على الله ( و دي اهم حاجة )
خليك دايما مؤمن بانك ما دام عملت اللى عليك بكل صدق و اجتهدت ... ان الله لا يضيع اجر من احسن عملا ...... و توكل على الله .... و خليك مؤمن ان ربنا عمره م هيضيع مجهودك

دي كانت شوية ملحوظات عامة ارجو انكم تستفيدوا بها
و قريب ان شاء الله نتكلم عن كل مادة و مشاكلها

التوقيع
طالب اجتاز ثانوية عامة
و بيحبكم ف الله

بلال سلامة