الفوضى يا معلمين الفوضى خش وانت تفهم

[نغم البحر]

لن أبدأ بالجملة الرنانة "فى اوروبا والدول المتقدمة "يتبعون المنهج العلمى لأنى ببساطة معنديش عقدة الخواجة" وربما سبب فشلنا هو محاولتنا لبس فستان الغرب و هو مش على مقاسنا فاصبح منظرنا وحش اوى كنا عايزين نبقى حلوين فاصبحنا اكثر قبحا
اذن :لماذا نتبع سياسة الفوضى ؟وكأنها اصبحت منهجنا المفضل !نحن افرادا ودولة نعيش الحياة اما ارتجالا ولا نتبع المنهج العملى فى التفكير من اهداف ووسائل تحقيقها او خطط بديلة ونتخذ قرارات فردية دون استشارة الاخرين مع سد الاذان
اولا :سياسة الفوضى الحكومية تتجلى فى وزارة التربية والتعليم فى ظل المعلومات الهائلة والكلام الكبير دة تلاقى كل وزير بعد الكلمتين دول يشيل سنة ستة ويحط سنة خامسة واللى بعدة يشيل خامسة ويحط ستة وفى وزير عاجبنى قوى تبقى المدرسة "زى الزفت " والعيال مش عارفين " يفكو الخط كل دة مش مهم .....المهم تلاقى مكتوب عالحيطة " مدرستى نظيفة وجميلة ومتطورة ومنتجة "بتنتج اية ان شاء الله محدش عارف كل مدرسة تتطلع شوية بلاليص كل بلاص مهمتة حمل الشنطة ورايح جاى فى جولة مكوكية لحد ميخلص العام الدراسى وربنا يفرجها ؟
اما بعد تولى سعادة الوزير يوسف والى الذى يولينا عناية خاصة فيستورد كل المبيدات والمخصبات الزراعية من جارتنا الغالية اسرائيل فكانت الخطة واضحة"مرض لكل مواطن " بس ملحقش يا عينى عشاااااااان ولاد الحرام شالوه قبل مايخلص علينا الظاهر فية واحد جاسوس اخترق وزارة الفساد وخلعة
أما وزير الداخلية الهادى دة معروف عنة "لسانة قصير وايده طويلة "بيمسك أى حد يفتح بؤوة...... الله يعفو عنه واحد جارنا كان بيتتاوب اتمسك
وبقية الوزرا مش هتكلم عنهم عشان تاريخهم مشرف يعنى وزير المالية مثلا برأ زمتة وسلم اللى فى خزنة الدولة واللى فجيبة لجمال مبارك ............اة بالمناسبة مش عايزين ننسى الريس حبيب الملايين طول مانا ماشية بادعيلة واهديلة هذه الكلمات بمناسبة رمضان كل سنة وهو طيب طبعا مع غلاء الاسعار والجو التحفة اللى عايشينه

الكلمات دى من سفير الفقراء احمد فؤاد نجم


سيدي الرئيس
في عيد ميلادك الكام وسبعين
كل سنة وأنت طيب
واحنا مش طيبين
كل سنة وأنت حاكم
واحنا محكومين
واحنا مظلومين
واحنا متهانين
ويا ترى يا حبيب الملايين
فاكرنا ولا احنا خلاص منسيين
فاكر المعتقلين
فاكر الجعانين
فاكر المشردين
فاكر اللي ماتو محروقين
فاكر الغرقانين
الله يكون في عونك - هاتفتكر مين وللا مين
في عيد ميلادك الكام وسبعين
بقول لك كلمتين
الأوله
شيلتنا طين
وهل تعلم أن النيل بقى رشاح
والجو أصبح بيئة والعيشة ولعة
والشرفا قلوبهم عالبلد والعة
وانت عاملهم مذبحة ولا بتاعة القلعة
والاقتصاد سداح
والسرقة بقت كفاح
ومصر متاحة بس للسياح
وعرض البلد بقى مستباح
والتانية
ورتنا الويل
دا الخطوة في عهدك بقت ميل
والضحك بقى نواح وعويل
والكوسة
عارف الكوسة
ممكن أقولك فيها موواويل
والجامعة بقت يا إما كباريه أو دار مسنين
والشباب معظمهم من غير خمرة سكرانين
والعلم عز على المتعلمين
والأساتذة بقم دجالين
والقادة بقم طبالين
واديني في الهايف يا حبيب الملايين
والتالتة
عارف اليابانيين
زمان في سنة اتنين وخمسين
كان عندنا تروماي وكان عندنا علم ومتعلمين
وثقافة ومثقفين
وأدبا وعلما وفنانين
وكانو اليابانيين
بالنووي لسة مضروبين
وللصدقة مستحقين
دلوقتي إحنا فين وهما فين
هما فوق واحنا في أسفل سافلين
والرابعة
أمن البلد بقى تنين
والمحاكم اتملت مظالم
والعدالة بقت كمالة
وكلمة الحق في الزبالة
وأصحابها في الزنازين
والخامسة
القطاع العام…. عام
والفساد…. ساد
وفي جتة بلدنا بيرعى
أفتكر لجنابك إيه وللا إيه
وكل ذكرى ليك بدمعة
آآآآآآآآه آآآآآآآآه
أنا كنت حالف ميت يمين
أكملهم لك تمنية وسبعين
بس هاكفيهم ورق منين
وكل سنة وأنت
واحنا طيبين