موضوع أعجبنى

[kamal azaz]

بسم الله الرحمن الرحيم
السلام عليكم ورحمة الله وبركاته

في وقت من الاوقات خرج مجموعة من صيادين الفيلة في غابات جنوب افريقيا لعملية صيد ومن المعروف ان الفيل الافريقي مميز دايما بالعاج اللي بيمتلكه عشان بيتباع بأسعار غالية وكان الفيل نيلسون هو احد الافيلة اللي عايشة في الغابات الافريقية ووقع أسير للصيادين اللي كانو خارجين لعملية صيد لفيل وأخدوا منه نابين العاج اللي عنده ووباعوه لأحد حدائق الحيوان اللي موجودة في أفريقيا
وفي الأول لما الفيل بيروح لحديقة الحيوان بيربطوا رجله برباط قوي جدا جدا جدا عشان لما الفيل يحاول يهرب بيكون صعب انه يقطعه من شد وقوة الحبل اللي مربوط في رجليه وبعد ما يعدي عليه فترة بيغيروا الحبل ده بحبل عادي خالص رفيه بيربطوا فيه رجل الفيل وبكده بيفضل طول حياته مربوط بالحبل ده وكان هو ده اللي حصل مع نيلسون الغلبان لما راح لحديقة الحيوان وبعد ما عاش فترة في حديقة الحيوان
وفي يوم من الايام كان في طفل ذكي وبيلاحظ الحاجات الغريبة اللي الناس مش بتاخد بالها منها ولاحظ الطفل الذكي ده ان الفيل نيلسون مربوط بالحبل الضعيف العادي وفي نفس الوقت الفيل مش بيحاول يقطعه ولا يهرب من الربطة اللي هوفيها ف قرر يسأل الحارس هو ليه الفيل مش بيحاول انه يقطع الحبل اللي هو مربوط بيه ده
وبدأ الحارس يشرح للطفل حكاية الفيل نيلسون من البداية وان السبب في انه مش بيحاول انه يهرب انهم خلوه يفتكر انه مربوط بحبل قوي زي ما جه في البداية وقعد نيلسون يحاول يقطع الحبل عشان يقدر يهرب مقدرش ولما فضل فترة بيحاول ومعرفش يقطع الحبل أتعود خلاص انه مستحيل يقدر يهرب وانه مش هيعرف يهرب تاني من المكان ده بقيت حياته وانه استسلم للأمر الواقع اللي هو عايش فيه وقاله الحارس ان هو ده السبب ان الفيل نيلسون مش عارف يهرب من هنا لأنه مش عارف قدراته الحقيقة في حين انه في لحظة لو اكتشف ان الحبل ده اضعف من قدراته وقوته هيقطعه وهيقدر يحرر نفسه من الحبس اللي هو عايش فيه
ونصح الحارس الطفل الصغير انه مهما كان القيود اللي الناس بتحطها حواليك خليك دايما فاكر انه بيغيروا الحبل الضخم بحبل تاني ضعيف وساعتها هتقدر تحرر نفسك
الفيل نيلسون زيه زي ناس كتير عايشين في قيود من الماضي وعدي عليها زمن طويل وهما لسة عايشين فيها
وعمل بعض العلماء تجربة علي الجراد ب أنهم حطوا جرادة جوة برطمان فيه مية وقفلوا الغطاء وسابوه حوالي خمس دقايق بدأت الجرادة في الاول تحاول تخرج برة البرطمان وقعدت تنط وتتخبط في الغطاء وكررت المحاولة اكتر من مرة وبعد كده استسلمت للأمر الواقع وبطلت تنط ووقعت جوة المية وفتح العلماء الغطاء بتاع البرطمان عشان الجرادة تنط وكانت المفاجأة ان الجرادة بطلت تحاول تخرج برة البرطمان مع ان الغطاء اتشال وماتت غرقانة
وهو ده بالظبط اللي بيحصل مع الناس انهم بيفتكروا ان القيود اللي موجودة عليهم هتفضل معاهم طول الحياة في حين انه لو اكتشف ان الحبل بقي ضعيف او ان غطاء البرطمان اتشال خلاص وحاول يهرب كان خرج من الالم اللي هو عايش فيه
ولكن معظم الناس عايش بقيود أخطر بكتير من اللي بيحطها ليهم اللي حواليهم هي قيود الافكار السلبية
( مش هقدر احقق نجاح في حياتي – مش هعرف انجح في الشغل اللي كلفوني بيه – مش ممكن ابدا اكون غني – انا مقدرش افتح شركة – صعب اني اكون مدير في شركة عالمية – الناس مش ممكن تصدق مشروعي – بابا مش هيوافق علي طلبي.......) وكتير من الافكار السلبية اللي ممكن يكون عايش بيها نسبة كبيرة جدا من الناس
وهي دي الحبل الضخم اللي اتربط من زمان جدا ساعة لما بدأت تحط الافكار دي في راسك وقررت تخليها معاك ومفكرتش ابدا تستبدل الافكار دي باأفكار ايجابية
وأفكارك زي ما احنا عارفين هي السبب في واقع الحياة اللي انت عايش فيه ونتايج الوقت الحاضر اللي انت ممكن تكون مش راضي عنها هي سبب افكار الماضي اللي انت لسة متمسك بيها وحان الوقت انك تاخد قرار قوي جدا انك تحرر نفسك من الحبل الضخم اللي انت رابطه في رجلك ومعطل بيه نفسك عن نجاحك وعن تغيير حياتك مش كده برده ؟؟؟؟؟؟
قرر من اول دلوقتي انك تغير افكارك السلبية عشان تقدر فعلا تغير حياتك اللي انت يمكن تكون مش حاببها
قرر انك متكونش الفيل نيلسون من اول دلوقتي ومهما كانت العقبات او الظروف او التحديات قول لنفسك باذن الله هقدر وباذن الله هعرف وباذن الله انجح وتوكل علي الله وابدأ في طريقك الجديد اللي انت قررت تكون فيه وحرر نيلسون اللي جواك من القيود اللي موجودة ف رجليه
والسلام عليكم ورحمة الله وبركاته