بص بقى من الاخر كده ..جاتلك تجارة وخايف كل حاجة هتعرفها هنا فقط

[حمامة فلسطين]

بسم الله الرحمن الرحيم

من سنة - وانا لسه داخل الجامعه - احتاجت المعلومات دي

انا عايز ادخل تجارة ؟
هل الكلية سهلة ؟
ايه حكاية السقوط الكتير اللى فيها دا ؟
محاضرات ولا سكاشن ولا الاتنين مع بعض ؟
طب انا ادبي ادخل ولا لا ؟
هنجح ؟؟ فيه رأفة ؟ فيه غش ؟


اضغط هنا لمشاهدة الصورة بحجمها الطبيعى




مبدئيا .. انت دخلت الجامعة .. الجامعة تعتبر زي الجيش بس على ابسط شوية
يعنى تعتمد على نفسك .. تذاكر بنفسك .. انت اللى تجتهد عشان تعرف المعلومه .. مش المدرس ييجي يديهالك فى بيتك
وطبعا كأزهري عارف ان اى حد طالع من 3 ثانوي شايف انها بيئة للغش واكيد هيشك ان الجامعه كدا
والاجابه .. ان الجامعه مش كدا خالص .. الا فى بعض الاحيان بيبقى فيه حالات غش وبتتقلب بغم فى الاخر


مواد سنة اولى

التيرم الاول :

محاسبه I
مبادىء اقتصاد
مبادىء ادارة الاعمال
مبادىء القانون والالتزامات
رياضة بحتة
لغة انجليزية

التيرم التاني :

محاسبة II
مواد اقتصادية وتطور اقتصادي
السلوك الانساني فى الادارة
مبادىء الاحصاء
لغة انجليزية
فقة اسلامي
عقيده اسلاميه ( توحيد )
القرأن الكريم

نبذة عن كل مادة :

المحاسبه I
مبادىء المحاسبه .. يعنى تعرف يعنى ايه محاسبه
المادة دي اكتر مادة تهتم بيهم فى التيرم
لان الغالبيه بيدخل قسم محاسبه فى سنة تالته .. والكتاب دة بيعرفك يعنى ايه محاسبه وبيبني مخك على المحاسبه
مفهمتوش = هيبقى صعب عليك جدا انك تكمل
والحمد لله معظم الدكاترة والمعيدين فى المادة دي ممتازين
يعنى هتحتاج تحضر وتكتب بس .. مش هتحتاج تذاكر لو انتبهت مع الدكتور
المادة عبارة عن فصلين نظري .. تعريفات سهله ولذيذه .. وبعد كدا حسابات .. مجرد جمع وطرق
وقيود .. يعنى مثلا انت بيعت جهاز تقول الجهاز من الشخص الاول للشخص التاني
وكل ما تدخل اكتر فيها هتتوسع وهي مادة لذيذه جدا


مبادىء اقتصاد
اما دي مادة هتعرفك البلد ماشية ازاي اقتصاديا وازاي الناس بتبيع وبتكسب
وازاي نعرض وازاي نطلب وعلى اساس ايه نشتري السلعه
وازاي تفكر لو هتعمل مشروع جداد
مع بعض الرسومات البيانية
المادة تعتبر مادة نظري

مبادىء ادارة الاعمال
اما دي فبتعرفك ازاي المدير بيتصرف داخل شركته
وازاي الشركة بتمشي نفسها
ازاي خط الانتاج بيشتغل
ازاي نصدر ونورد .. ايه اعمال المدير
المادة نظري × نظري طبعا

مبادىء القانون والالتزامات
ومن اسمها واضح انها بتهتح بالقانون والعقوبات والاحكام بس ف شكل اسلامي شوية
يعنى زي الفقة .. بس على اوسع شوية
والالتزامات بتهتح بعمل العقود مثلا عقد بيع شقة وايه اللى ليك وايه اللى عليك

رياضة بحتة
لو كنت علمي .. يبقى مش هقولك غير انها حوالي 40 % من الرياضة اللى خدتها فى تالته ثانوي لا اكثر ولا اقل
ولو كنت ادبي
محتاج تبذل مجهود شوية عشان تفتكر الرياضة اللى اخدتها فى تالته اعدادي
وتحضر وتهتم .. عشان تعرف تاخد رياضة فى باقي السنين

لغة انجليزية
ودي عبارة عن مادة بتاخد ليها ملخص فى اخر التيرم تذاكرة وتخش تمحنه
انجليزي اولى اعدادي فقط لا اكثر


التيرم الاول سهل
اسهل تيرم فى الكلية كلها مش سنة اولى بس
التيرم الوحيد اللى فيه 6 مواد فقط
التيرم الاول = اساس الكلية
تهتم بيه هترتاح بعد كدا ..


التيرم التاني


محاسبة II
ودي تعتبر توسع للمحاسبه واحد
مش هتاخد حاجه جديده يعنى مش هتاخد محاسبه تانيه
هي هي قيود وترحيل لكن على اوسع
محتاجه اهتمام 100 % وحضور ومذاكرة اول بأول !


مواد اقتصادية وتطور اقتصادي
عبارة عن اقتصاد تاريخ وجغرافيا
يعنى مادة نظرية تعتبر زي مواد الادبي فيها تاريخ مصر والعالم وفيها جغرافيا لذيذه
والمادة محتاجه مذاكرة واهتمام شوية يعنى مش معنى انها نظرية نذاكر فى اخر 10 يوم

السلوك الانساني فى الادارة
ادارة اعمال زي التيرم الاول لكن فيها بيعلمك ازاي تتعامل كأنسان ومدير
او كأنسان وبياع يعنى سلوكك فى مجال التجارة والادارة والشركة
مادة لو اتفهمت متذاكرهاش يعنى خدها على انها حكايه وهتعرف تحل كويس جدا

مبادىء الاحصاء
الاحصاء مادة سهله جدا جدا فى سنة اولى
عبارة عن بيانات وجداول وحسابات بسيطه جدا يعنى زي الاحصاء اللى اخدناها فى اخر 3 اعدادي زمان
بالمناسبه اسمها مادة الامتياز

لغة انجليزية
ودي مش سهله زي التيرم الاول فى نفس الوقت لو ذاكرتها وعملت مجهود بسيط هتبقى سهله جدا
دي مادة عبارة عن 5 كتب
محاسبه - ادارة - اقتصاد - تأمين - احصاء
نفس اللى بتدرسه بالعربي هتاخد ( اجزاء ) منه فى الانجليزي
مهمتك انك تحفظ الكلمات يعنى لو حفظت كل اسبوع 15 كلمة هتدخل تحل وتنجح

فقه - عقيده
مواد شرعيه زي الثانوي بس بتوسع بسيط

القرأن الكريم
خمس اجزاء من عم لجزء الاحقاف
القرأن اكتر لجنة فى الامتحانات بيبقى فيها شد ومحاضر غش وسحب ورق
يعنى مش هتعرف تغش لا من مصحف ولا من صاحبك
يعنى تحفظ على قد ما تقدر عشان تعدي


التيرم التاني محتاج مجهود اكتر ومحتاج حضور
ومحتاج لو قدرت انك تحفظ القرأن من الاجازه او التيرم الاول



الاسئلة الشائعه

احضر محاضرات ولا سكاشن ولا الاتنين ؟
احضر اللى تستفاد منه اكتر .. واحضر مع اللى يريحك ويفهمك
يعنى ممكن تحضر لمعيد ومتحضرش للدكتور براحتك .. تعمل العكس براحتك .. تحضر للاتنين خير وبركة
اهم حاجه لو فاهم يبقى خلاص دا الغرض

هل لو حضرت اخر شهر اخدت الملخص والمنهج وذاكرت فيهم بجد بجد هنجح ؟
الاجابه لا .. مافيش حاجه بتساوي انك تاخد المعلومه من الشخص اللى هيحطلك الامتحان ويصححلك
ولما ترتاح اخر شهر ويبقى مراجعه احسن ما تتعب فيه وتسقط وتقول دي كلية فيها ظلم

هل الكلية فيها ظلم .. هل الدكاترة بتستقصد الطلاب .. انا خايف اوي ؟
الكلية مفهاش ظلم ومستعمش كلام واحد فاشل وساقط
خليك مع الناجحين اسألهم عملتو ايه عشان تنجحو ؟
عايز تنجح تحضر + تذاكر مذاكرة متوسطه + تبقى حاطط فى دماغك انك داخل تحل مش داخل تغش

ياعم انا واحد صاحبي حالل الامتحان كلة وسقط .. دنا مصححه انا وهو من الكتاب .. يبقى فيه ظلم ولا مافيش ؟
ببساطه انت مش فى مدرسه .. واللى بيصححلك ناس بقالهم سنين وعقود شغال فى المادة نفسها مش مدرس
ومافيش نظام انت لسه عيل وحرام نضيع مستقبلك .. انت راجل لو استهبلت يبقى تتحمل نتيجه غلط
اكيد الدكتور هيعرف انت حالل ولا غاشش .. مذاكر ولا ناقش .. يعنى حتى لو حالل الامتحان كلة وصح هيبقى باين عليك انت حالل بمجهودك ولا لا
وحط فى دماغك .. لكل مجتهد نصيب
يعنى ممكن تحتهد فى مادة وييجي الامتحان صعب ومتقفلش الورقة كلها ومع ذلك تلاقي نفسك جايب تقدير
لان اللى هيصححلك عارف ان حلك بمجهودك ومن دماغك


معلومات

الكلية - لزيادة العدد - مقسمه لمجموعتين كل مجموعه ليها دكاترة وجدول لكن نفس المهنج
مجموعه أ ومجموعه ب
لو اسمك بيبدأ بحرف أ ~ ع هتبقى فى مجموعه أ
اسمك بيبدا بحرف غ ~ ي هتبقى فى مجموعه ب

السكاشن بتبقى يومين فى الاسبوع بالكتير 3 والباقي محاضرات واكيد فى يوم على الاقل اجازه غير الجمعه

الكتب بتتوفر بعد اسبوع او اسبوعين من بداية الدراسة ومش بتتأخر زي ما بيقولو
والكتاب مهم جدا جدا جدا للمذاكرة وسيبك من الملخصات لان للاسف معظم الملخصات بتبقى من برة المنهج
واهم حاجه ويمكن اهم من الكتاب انك تكتب المحاضرة بايدك وتذاكرها من كشكول محاضراتك انت

الانتظام فى الحضور والتعرف على طلاب بيحضرو ومجتهدين هيسهل عليك الكلية جدا



الكلية سهله .. محتاجه مجهود بسيط عشان تاخد ال 4 سنين فى 4 سنين

اى حد عندو اى استفسار عن اى حاجه مكتوبة هنا او مس مكتوبة يقولي باذن الله هجاوب

كان معكم .. واحد كان فى سنة اولى
م
ن
ق
و
و
ل