اتحاد طلبة الدبلومات الفنية الى اتظلموا فى التنسيق .. عاوزين نرجع حقنا ادخل بسرعه

[Bellsh]

بسم الله الرحمن الرحيم
السلام عليكم ورحمه الله وبركاته

اخوانى / اخواتى طلبة وحملة الشهادات الفنية والمعاهد الفنية ......

ان الساكت عن الحق شيطان اخرس وان الظلم ظلمات يوم القيامه .........

كلكم عارفين ان احنا اتظلمنا فى التنسيق ظلم فاجر وان كانت كلمة فاجر اقل ما يقال على ما فعله هذا التنسيق ب***نا و***نا وضياع اهدفنا فى دخول كليات كانت فى يوم من الايام حلم من احلامنا

كلكم عارفين ان التنسيق نسبته اترفعت عن السنه الى فاتت ب 4 % تلك النسبة الجنونية والتى اعتقد انها ماحصلتش فى تاريخ الدبلومات الفنية او الشهادات الفنية عموما على مدار تاريخها والى مش مصدق يشوف تنسيق السنين الى فاتت

يعنى لما الاقى هندسة القاهره تنسيق 2007 بتاخد من 87 وبقدرة قادر فى تنسيق 2010 تاخد من 93 ده تسموه ايه ؟

لما الاقى كلية تربية حلوان فى 2006 وفى 2008 بتاخد من 85 و 84 والاقيها بقدرة قادر بقت فى 2010 بتاخد من 89 لا يبقى ده مش صح

لما الاقى فى تنسيقى وانا بكتب الرغبات معهد عالى تكنولوجيا بنها واكتبه فى رغباتى ولما نتيجة التنسيق تظهر والاقيه مش موجود من ضمن الكليات ولا حتى ليه اى ذكر فى اى جريدة ( لا يبقى فى حاجه غلط ) يمكن المعهد اختفى وان ممكن يكون رحلوه او باعوه او اى حاجه بقى

لما الاقى زميلى فى الثانوية العامه تنسيقه 2010 يجيبله طب من 94 ويجيبله هندسة من 86 وانا هندسة تجيلى من 93 ده يبقى حرام وافترى وظلم بين !!!!!!!!!!!!!!!

طبعا سامعكم كلكم بتقولوا طيب وهنعمل ايه يا فااالح ؟

هرد عليكم واقولكم يعنى هنحط ايدنا على خدنا ونقعد نعيط ونندب الحظ والزمن الى وجدنا فى بلد ما حدش فيها يعرف الرحمه

ولا هنلعن اليوم الى ضحينا فيه بالثانوى من اجل الدبلوم عشان نخش كلية هندسة وفى الاخر نضيع الضياع المبين ؟؟

لالالالالالالالالالا والف لالالالالالالالالالالالا

عاوزين مانسكتش عن حقنا عاوزين نوقف وقفه رجاله ونوقف جنب بعض ونشوف حل لموضوعنا ده

طيب برضو سامع فيكو واحد بيقول يعنى انته هتغير التنسيق ولا هتخليهم يعيدوه مثلا ؟!!!

اقوله احنا مش اقل من اى حد فى طلبة مصر بل بالعكس احنا فينا ناس مستواها احسن من طلبة الثانوى العام ... ولما نشوف اخوانا طلبة الشهادات المعادلة الى اتظلموا زينا رافعين قضايا على الوزير وصل عددها دلوقتى 14 قضية يبقى الناس دى مش ساكتة على حقها يبقى الناس دى تقدر تعمل حاجه وانا اسأل الله العظيم رب العرش العظيم انه ينصرهم ويرجعلهم حقهم ... يبقى احنا نوقف جنبهم ونساندهم وهما كمان يساندونا عشان لما كلنا نتحد نبقى لينا كلمه قويه جدا جدا جدا وان شاء الله نعمل حاجه

طيب سامع واحد بيقول طيب ودلوقتى هنرفع قضايا احنا كمان ؟؟ هقولك ان احنا هنتجمع كلنا ونتفق على يوم فى هذا الاسبوع ده ونروح كلنا كتله واحده مكتب التنسيق او نطلع على مكتب الوزير ونطلب مقابله معاه ونعرض عليه مشكلتنا ونخليه يشوفلنا حل يا اما نتحد مع اخوانا فى الشهادات المعادلة ونرفع معاهم القضايا وان شاء الله ربنا يرجعلنا حقنا

طبعا هتقولوا هنتفع على التجمع امته وهنعمل ايه

انا عامل جروب على الفيس بوك اسمه اتحاد طلبة الدبلومات الفنية دفعة 2010 ياريت الكل يخش يشارك معانا هنا او فى الجروب ونعرف اصحابنا كلهم بالتوبيك وبالجروب عشان نبقى عدد كبير ونتفق على يوم كلنا نروح مع بعض ان شاء الله ونعرض عليهم مطالبنا ان التنسيق ده نسبته تقل زى ما قلت نسبة تنسيق الثانوية العامه

ياريت يا جماعه ما تنفضوش ده مستقب حرااام عليكم لو سكتوا عن حقكم .....

شعارنا لالالالالا لتنسيق 2010 الظالم للكل

وده عنوان الجروب
http://www.facebook.com/#!/group.php...38910192814279

وانا متابع معاكوا هنا فى التوبيك برضو ... وياريت ادارة الموقع تساندنا وماتحذفش الروابط بتاعتنا لاننا مش بنعمل دعايه احنا واقعين فى مصيبه ولازم نشوفلها حل وبأقصى سرعه لان فاضل على الدراسة اسبوع