المسلســل الكوميــدى (( يوميـــات دحـــرور )) ......... الحلقـــة الاولـــــى !!!!!!!

[Mohamed.Helmy]

السلام عليكم ...

دى أول حلقة من المسلسل يا جماعة

والمسلسل ده :

تأليف : محمد حلمى

سيناريو وحوار : محمد حلمى ..

وانا لسه مألف الحلقة النهاردة ...

أسيبكم مع الحلقة ولو عجبتكم هألف باقى حلقات المسلسل ان شاء الله ....

**********************
الحلقة الاولى
(( رمضان جانا ))
********************

أول يوم رمضان .. والناس كلها فرحانة برمضان و مستنياه وجو رمضان المعروف بدأ فى مصر كلها ..

ماعدا ياعينى بيت دحرور ..

(( خناقات و محدش بيشوف دحرور خالص ))

....

نبدأ الحلقة ..

(( دحرور نايم فى أوضته و حاضن موبايله و فجأة ))
الموبايل رن : مين هايقوم زى الشاطرين ... أنا ...
نعمات: (( أم دحرور دخلت تصحيه ) )
***************************************
نعمات : يا واد قوم تعبت قلبى وتعبت المهبول بتاعك ده .
دحرور : يوووووووه .. ياستى سيبينى أنام شوية بقى ..و بعدين الموبايل ده آلة أساسة ومش بيتعب ..انتى فاكراه كلب بلدى ؟؟
نعمات : شوف الواد وردوده ... مانت طالع لأبوك .. يعنى هاتجيبه منين ؟
دحرور : ياستى سيبنى أنام أنا لسه نايم من شوية
نعمات : مانت ماصدقت أتسحرت و مشفناش وشك فى البيت تانى ومرجعتش الا بعد الفجر .
دحرور : يوووووووووه .. عاوز انام شوية بقى ...
نعمات : تنام ايه بس .. يالا قوم علشان تجيب العيش .. عاوزنا أول يوم رمضان نفطر من غير عيش ولا ايه ؟؟ ..
دحرور : ياستى بقولك سيبنى أنام .. وبعدين أنا هصوم أساسا مين قالك ان انا هافطر .. هو انا عيل صغير علشان أفطر فى رمضان ؟؟
نعمات : طب أعمل فيك ايه ... ياواد تعبت قلبى .. قوم بقى ... ولا عاوز أبوك يقوم يلاقيك لسه ماجيبتش العيش . ينيلها علينا ع الصبح ...
دحرور : طيب ياختى.. شوية و أقوم ..
نعمات : شوف الواد وردوده .. يعنى انت هاتجيبه منين ؟ .. جاتك نيلة عليك وعلى شكلك ..

(( خرجت نعمات من أوضة دحرور و فجأة زوجها ممدوح ))


ممدوح : (( بصوت يخوف )) ..بتبرطمى بتقولى ايه ع الصبح ؟
نعمات: (( بصوت متقطع )) ..أبدا يا حاج.. هدئ أعصابك كده .. ورمضان كريم ..
ممدوح : هو الواد دحرور جاب العيش ؟؟
نعمات : (( بخوف شديد )) أيو..أيوة .. هايقوم يجيبه أهو ..
ممدوح : يقوم ايه ياختى ؟؟؟؟ ... هو لســــه هايقوووم ؟؟؟!!!! يالا روحى قوميه بدل مانيلها عليكم ...
نعمات : حاضر حاضر .. (( ببرطمة )) يعنى الواد هاجيبه من برة ...


(( دخلت نعمات غرفة دحرور ))


نعمات : قوم يا منيل أبوك صحى ..
دحرور : (( أتخض ومرة واحدة نط فى الشبشب بتاعه ومسك موبايله وقام ))
دحرور : ببرطمة .. يعنى هو دوحـــة(( دلع أبوه ممـــدوح )) لازم يقوم دلوقتى .. كنت عاوز أنام .. أوووف ..

قام دحرور و خرج م الاوضة

دحرور : صباح الخير يا بابا ...
ممدوح : مابدرى يا عم الخواجة .. لسه هتقوم ..
دحرور فى سره (( ياعم لسه الساعة 6 الصبح .. يعنى هنام و أقوم زى الفراخ ؟؟ ))
ممدوح : ماترد ياد على سؤالى .. مش بكلمكك .؟؟ ... لسه فاكر تصحى ؟
دحرور : معلش يا بابا ... أصلى نايم بعد الفجر ..
ممدوح : ليه بقى ان شاء الله ... (( باستهزاء )) كنت بتصلى ولا ايه ؟؟.
دحرور : هـــا ؟؟
ممدوح : كنت بتصلى الفجر ؟؟؟؟؟؟؟
دحرور : هـــــا ؟؟
ممدوح أتعصب و لسه هايقوم يلطشله ع الصبح ..
دحرور : آآآه الفجر .. آه يا بابا صليته أكيد .. ده أنا سهران مخصوص علشان أصلى الفـــجــ --
الموبايل مقاطعا (( حبيبى عمــل الواجب ولا اتنسى ؟ .. ماما بكرة الجمعة مافيش مدرسة ! ..))
ممدوح : يا سلاااااااام ... كنت بتصلى الفجر برضه ...رد ياخويا رد .. تلاقيه حد من أصحابك الخواجات دول.. (( جيل آخر زمن ))
دحرور : لا برضه كده .. انا مقدرش أرد على الموبايل قدام حضرتك يا بابا .. مايصحش ..
ممدوح : يا سلام ع الاحترام .... طيب ياخويا ... انزل هات العيش بالذوق ..
دحرور : حاضر يا بابا ... هو انا أقدر أرفضلك طلب برضه ..
(( ومشى دحرور وهو بيبرطم و بيقول : ده انت يا دوحة .. قال أصحابك الخواجات قال !! )) ..
ونزل يجيب العيش ...



مستنى أراءكم على الحلقة الأولى ... ولو عجبتكم هألف باقى الحلقات ...