" عمو السيد "

[EL BASHMOHANDIS]

بسم الله الرحمن الرحيم

الحياة عطاء, وتضحية مادام فيك قلب ينبض

الحياة صراع, وكد , واجتهاد ما دامت انفاسك تحرك ضلوعك

ده _يا احبائي_ مش كلام كتب او شعارات مدونة في الاماكن العامة , او كلمات رنانة تقال في المناسبات , لا دا

حقيقة , وواقع بنشوفو كل يوم , ولكن ممكن مش متعوده عينينا انها تشوف الحجات الحلوة .....

هسيب الكلام جانب بسيط من موضوعي واسيب الحقائق والواقع اللي بشوفهم كل يوم هما اللي يتكلموا ....

من وانا صغير كان في "عمو السيد " الراجل الكبير اللي بيبيع طماطم عندنا في الشارع , راجل زي العسل لسانو بينقط سكر زي ما بيقولو كان اللي مش عايز يشتري يشوفه لازم يشتري .

المهم عمو السيد دا جه فترة وقطع ومعدش بينزل , كل الناس راحت تسال عليه ومفيش حد يعرف حاجه عنو ...

بعديها بحوالي شهر لقينا عمو السيد الراجل الجميل راجع بعربيتو هيا هيا والطماطم الجميلة المنورة هيا هيا , لكن ...

لقيناه لابس نضاره سوده .." الف سلامة يا عم السيد .. مالك ؟ " عمو السيد " اتعمى " ..

صدقوني انا مش بحكي فيلم عربي ..

متتخيلوش حجم الزعل اللي كان على وش كل واحد اتكلم مع عمو السيد او اتعامل معاه في يوم ...

المهم ... لقينا مراة عمو السيد الست الكبيرة اللي عمرنا ما شوفنهاها في يوم في اللي سايقة العربية وبتبيع مكانو وهو قاعد في اخر العربية ...

متتخيلوش قد ايه المنظر ده اثر فيا جامد وحسسني ان بجد الدنيا لسه بخير , ولسة في تضحية , واخلاص .

دا نموذج من عشرات النماذج اللي في ذاكرتي ونفسي انقلهالكم , لكن الغرض من موضوعي اوصل رساله مش الغرض اني اكتب كمية كلام ممكن يكون رسالته في سطرين بس ...

واتمنى ان موضوعي يلمس حاجة جواكم , واتمنى اني اكون رسمتلكم صورة _ ولو بسيطة _ عن الاخلاص , والاجتهاد , والتضحية , اللي اتفقنا انها مش شعارات او كلمات في خطب رنانة .

المشاركة مفتوحة للجميع

ولو حد عندو نموذج يخدم فكرتي وموضوعي يتفضل ..

تحياتي