قصيدة للشعب على لسان الريس....مش أنا اللي كاتبها متودوناش في داهيه!!!

[السيد صابر]

السلام عليكم ورحمة الله وبركاته
وانا بقرأ في النت لقيت القصيدة دي
وعاجبتني أوي رغم ما فيها من أشياء لا نرضاها ولكنها الواقع
حاجه كده زي اللي بيقولو عليها البلاك كوميدي أو الكوميديا السوداء
واحد من الناس بيعبر عن حال مصر لكن مش على لسانه ولكن على لسان الريس


يللا نشوف عظمته بيقول إيه.......

يا شعبي حبيبي يا روحي يا بيبي **يا حاطك في جيبي يابن الحلال

يا شعبي يا شاطر ياجابر خواطر ** يا ساكن مقابر وصابر وعال

يا واكل سمومك يا بايع هدومك ** يا حامل همومك وشايل جبال

يا شعبي اللي نايم وسارح وهايم ** وفي الفقر عايم وحاله ده حال

أحبك محشش مفرفش مطنش ** ودايخ مدروخ وآخر انسطال

أحبك مكبر دماغك مخدر **ممشي أمورك كده باتكال

وأحب اللي شايف وعارف وخايف **وبالع لسانه وكاتم مقال

وأحب اللي راضي وأحب اللي فاضي ** وأحب اللي عايز يربي العيال

وأحب اللي يائس وأحب اللي بائس ** وأحب اللي محبط وشايف محال

وأحبك تسافر وتبعد تهاجر **وتبعت فلوسك دولار أو ريال

وأحبك تطبل تهلل تهبل **عشان ماتش كورة وفيلم ومقال

وأحبك تأيد تعضد تمجد **توافق تنافق وتلحس نعال

لكن لو تفكر تخطط تقرر **تشغلي مخك وتفتح جدال

وتبدأ تشاكل وتعمل مشاكل **وتنكش مسائل وتسأل سؤال

وعايز تنور وعايز تطور **وتعملي روحك مفرد رجال

ساعتها ح اجيبك لا يمكن أسيبك ** وراح تبقي عبرة وتصبح مثال

ح ابهدل جنابك وأذل اللي جابك **وحيكون عذابك ده فوق الاحتمال

وامرمط سعادتك واهزأ سيادتك **واخلي كرامتك في حالة هزال

وتلبس قضية وتصبح رزية **وباقي حياتك تعيش في انعزال

ح تقبل ح احبك, ح ترفض ح البك **ح تطلع ح تنزل ح اجيبلك جمااااال

على فكرة مش أنا اللى كاتبها لا خوف ولا جبن
رغم ان الجبن نص المجدعه يعني
ولما بتدخل فيه الحكومة يبقى المجدعه كلها